Dual PanelLaskar Kristus si tutus
1Tapi kam, o anakku, lias ate Dibatalah mpegegehi kam, si nggo jadi sikerajangenta erdandanken persadanta ras Kristus Jesus.
2Kai si nggo ibegindu i bas aku nari i lebe-lebe nterem saksi, endeskenlah man kalak si ertanggung jabab, si ngasup ngajarkenca ka man kalak si deban.
3Ikutlah kam i bas ngenanami kiniseran jadi laskar Kristus Jesus si tutus.
4Sekalak laskar si sangana ertugas la icampurina urusen kegeluhen si deban gelah ngena ate komendanna.
5Sekalak si ikut i bas perlumban labo banci menang adi la kin patuh nandangi peraturen-peraturen si lit i bas perlumban e.
6Sekalak perjuma si nggo latih erdahin arus ndat bagin si pemena i bas ulih jumana nari.
7Ukurkenlah kai si kukataken man bandu, sabap ibereken Tuhan man bandu kengasupen ngangka kerina si enda ndai.
8Ingetlah Jesus Kristus, si nggo ipekeke Dibata i bas si mate nari. Ia kesusuren Daud, bagi ikataken i bas Berita Si Mehuli si ku beritaken e.
9Erdandanken kupembarken Berita Si Mehuli e nge maka aku ngenanami kiniseran, janah igariken pe aku bagi kalak jahat. Tapi kata Dibata labo tergariken,
10emaka megenggeng aku i bas kai pe guna kiniulin anak-anak Dibata si terpilih, gelah ia pe banci ngaloken keselamaten si reh arah Kristus Jesus, ras kemulian si rasa lalap.
11Tuhu me kata enda, "Adi nggo kita mate ras Ia, kita pe pagi nggeluh ka ras Ia.
12Adi tetap megenggeng kita, ras Ia ka pe kita pagi erkuasa. Adi si persoken Ia, IpersokenNa pe kita.
13Adi la pe kita setia, Ia tetap nge setia, sabap labo banci IpersokenNa bana."
Si erdahin si dat pujin
14Ajarkenlah perpulungen janah persingeti i lebe-lebe Dibata gelah ula ia rubati kerna sada-sada cakap.
15Usahakenlah gelah dat pujin kam i lebe-lebe Dibata, bagi sekalak si erdahin si la mela kerna dahinna, sekalak si ngajar alu pinter berita si benar i bas Dibata nari.
16Sirangilah ranan si la tuhu dingen si sia-sia, si perasatna nirangken kalak ras Dibata.
17Si iajarkenna e njajat bagi penakit kanker. Dua kalak i bas guru-guru e gelarna Himeneus ras Piletus.
18Duana ia nggo nadingken pengajaren si benar. Genduari nggo kemamangen ibahanna piga-piga kalak si nggo tek man Jesus Kristus alu ngataken maka kekeken kalak si tek nggo jadi.
19Tapi palas si nteguh si nggo ipanteki Dibata labo terugur. I babo palas e lit tersurat, "Itandai Tuhan SikerajangenNa," bage pe, "Ise ngakuken maka ia sikerajangen Tuhan arus ItadingkenNa perbahanen-perbahanen si la payo."
20I bas rumah si mbelin lit erbage-bage pinggan ras mangkuk, lit si ibahan i bas pirak nari bage pe i bas emas nari janah lit ka pe si ibahan i bas kayu nari bage pe i bas taneh dah nari; lit si ipake guna keperlun si mehaga, lit si ipake guna keperlun biasa.
21Adi lit kalak si mbersihken dirina i bas kejahaten-kejahaten enda nari, ipakeken me ia guna si mehuli, sabap nggo iendeskenna dirina dingen erguna man tuanna. Nggo isikapken ia guna ipake i bas dahin si mehuli.
22Tadingkenlah sura-sura si jahat i bas kalak nguda. Usahakenlah ndalanken kai si tuhu-tuhu ngena ate Dibata, nehken tanggung jababndu selaku kalak si tek, nehken keleng ate dingen nggeluh alu dame raduken kalak si tutus mindo penampat man Tuhan.
23Ula campuri percakapen si sia-sia dingen la rorat. Ietehndu maka arah si e turah perubaten.
24Suruh-suruhen Tuhan la banci rubat. Arus ia mehuli man ise pe, sekalak guru si mehuli dingen saber,
25janah alu lemah-lembut ngajarken kalak si erlawanen ras kam. Banci jadi ibereken Dibata man kalak enda kesempaten jera i bas dosa-dosana nari dingen meteh si tuhu-tuhu ngena ate Dibata.
26Alu bage jore ukurna mulihken janah pulah ia i bas siding Iblis nari, si nggo naban dingen maksa ia ngikutken sura-surana.