Dual Panel1I bas Pertua nari. Man kekelengenku Gayus, si kukelengi tuhu-tuhu.
2O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli.
3Meriah kal kuakap kenca reh piga-piga kalak seninanta kalak Kristen, janah nuriken man bangku uga bujurna kam bagi biasana pe kam nggeluh i bas kebujuren nge.
4La lit si banci erbahanca ukurku teriahen asangken megi anak-anakku nggeluh i bas kebujuren.
Gayus ipujiken
5Temanku si kukelengi, tutus kal atendu ndahiken dahin si ilakokenndu guna senina-seninanta kalak Kristen, aminna gia pe ia la itandaindu.
6Nggo isaksiken senina-seninanta e i lebe-lebe perpulungen si i jenda kerna kekelengenndu e. Mehuli kal adi isampatindu ia rikutken si ngena ate Dibata i bas ia nerusken perdalanenna.
7Sabap kalak enda lit i bas perdalanen guna Kristus, alu la ngaloken kai pe i bas kalak perbegu nari.
8Dage kita kalak Kristen rutang nampati kalak si bage, gelah kita pe ikut muat bagin i bas pembarken Berita Si Mehuli i bas Dibata nari e.
Diotrepes ras Demetrius
9Pernah kukirim sada surat man perpulungen enda, tapi Diotrepes si pebeluh-beluhken minpin e, la mperdiateken aku.
10Erkiteken si e, sanga aku reh pagi ku bongkar nge kai si nggo ibahanna eme penghinan ras cakap si la tuhu si ikatakenna kerna kami. Labo terjeng je saja; lebih asa si e la ia nggit ngalokenca senina-seninanta kalak Kristen e adi ia reh, janah iambatina pe kalak gelah ula ngaloken senina-seninanta e, dingen iusahakenna pedaratsa i bas perpulungen nari!
11Teman si kukelengi, ula usih kai si jahat, tapi usihlah kai si mehuli. Ise erbahan si mehuli asalna i bas Dibata nari; ise si erbahan jahat la nggo idahna Dibata.
12Kerina kalak mujiken Demetrius; kebenaren e jine pe mujiken ia. Kami pe ikut nambahi kesaksin e, janah ietehndu maka kai si ikataken kami e tuhu kap.
Salam pendungi
13Melala denga ateku si kuturiken man bandu, tapi la kubahan e alu pena ras tinta.
14Kuarap maka lanai ndekahsa banci kita jumpa, gelah banci kita ngerana sebabah. (1-15) Kemalemen ate ras kam gelah. Teman-teman si i jenda ngataken mejuah-juah man bandu. Kataken pe mejuah-juah man teman-teman si i jena sada-sadai.