Dual Panel1Enda me kata si ibelasken Nabi Amos; ia sekalak permakan i kuta Tekoa nari. Dua tahun ope denga linur si mbelin e, ipetangkas Dibata man Nabi Amos kerna negeri Israel. Tupung si e si jadi raja i Juda eme Raja Usia, dingen i Israel eme Raja Jerobeam anak Joas.
2Nina Amos, "TUHAN erdengum i Deleng Sion nari; SoraNa erlenggur i Jerusalem nari. Mbalmbal jadi kerah dukut Deleng Karmel melus kerina."
Ukumen Dibata man negeri-negeri sekelewet Israel Siria
3Nina TUHAN, "Anak kota Damaskus la erngadi-ngadi erbahan dosa. Erdandanken si e la banci lang Kuukum ia. Sabap ierikna kalak Gileat desken ngerik gandum alu gereta besi pengeriken.
4Erkiteken si e Kubenterken api ku bas istana si ipajekken Raja Hasael janah Kuciluk benteng-benteng Raja Benhadad.
5Pintu-pintu gerbang Kuta Damaskus Kuperperken, dingen Kupelawes kasa kai kalak si ringan i Baluren Awen bage pe si erkuasa i Bet-Eden. Penduduk negeri Siria ibaba tertaban ku negeri Kir."
Pilisti.
6Nina TUHAN, "Anak kota Gasa la erngadi-ngadi erbahan dosa. Erdandanken si e la banci lang Kuukum ia. Sabap ibabakenna jadi tabanen keri sada bangsa, jenari idayakenna jadi budak man bangsa Edom.
7Emaka kubenterken api ku tembok-tembok kota Gasa dingen Kuciluk benteng-bentengna.
8Kusasapken penduduk Asdot bage pe si ngerajai Askelon. Kuukum kota Ekron, janah kerina kalak Pilisti si tading denga la banci la mate."
Tirus.
9Nina TUHAN, "Anak kota Tirus la erngadi-ngadi erbahan dosa. Erdandanken si e la banci lang Kuukum ia. Sabap ibabakenna keri sada bangsa, ku bas pembuangen i negeri Edom, janah la ipatuhina perpadanen perdamen si ibahanna ras senina-seninana.
10Erkiteken si e Kubenterken api ku tembok-tembok kota Tirus dingen kuciluk benteng-bentengna."
Edom.
11Nina TUHAN, "Kalak Edom la erngadi-ngadi erbahan dosa. Erdandanken si e la banci lang Kuukum ia. Sabap iayak-ayakna seninana kalak Israel alu pedang, janah la lit sitik pe mekuah atena. Pernembeh atena la ersibar, janah la ipelepasna nimpet-nimpet.
12Erkiteken si e Kubenterken api ku tembok-tembok kota Teman, dingen Kuciluk benteng-benteng Bosra."
Amon.
13Nina TUHAN, "Kalak Amon la erngadi-ngadi erbahan dosa. Erdandanken si e la banci lang Kuukum ia. I bas perang lako nambahi daerah jajahenna, iburtaskenna beltek pernanden si sangana mehuli kulana i Gileat.
14Erdandanken si e Kubenterken api ku tembok-tembok Rabba, janah Kuciluk benteng-bentengna. Kenca bage terbegi sora surak-surak perang i bas wari perang e, janah pertempuren gara desken angin kaba-kaba.
15Rajana ras kerina kalak si erpangkat ibaba ku pembuangen."