Dual PanelPendilo gelah jera
1O kalak Israel, begikenlah ende-enden tangis-tangis si kuendeken man bandu.
2Israel, singuda-nguda e nggo guling lanai nari ia keke-keke! Ampar-ampar ia i bas taneh, la lit si petedissa.
3Nina TUHAN si Erdolat, "Sada kuta i Israel, ipeberkatna seribu serdadu, tapi seratus nari ngenca mulih; kuta si deban, ipeberkatna seratus serdadu, tapi sepuluh ngenca selamat mulih."
4Nina TUHAN man kalak Israel, "Marilah, dahi Aku, maka kam nggeluh.
5Ula kam lawes ku Berseba lako nembah. Ula darami Aku i Betel, sabap Betel masap pagi. Ula kam lawes ku Gilgal, sabap anak kota e keri pagi ibuang."
6Dahilah TUHAN maka kam nggeluh. Adi lang, desken api si gurlah me Ia, maka meseng IbahanNa bangsa Israel. Meseng me anak kuta Betel ipan api e, janah ise pe la ngasup nimpetisa.
7Cilaka me kam, o kam si nalihken kebujuren si pentar jadi nggeduk, dingen ndampesken kebenaren ku taneh.
8TUHAN kap si njadiken bintang-bintang, bintang Kartika ras bintang Timur. IsalihkenNa kegelapen jadi suari, suari jadi berngi. IlebuhNa lau Lawit je nari IamburkenNa ku doni. GelarNa e me kap TUHAN.
9Kalak si mbisa IkernepkenNa, benteng-bentengna IradaskenNa.
10Segat atendu man kalak si pang alu terus terang mandang kam, dingen nembeh atendu man kalak si nuriken si tuhu-tuhuna i bas pengadilen.
11Kalak si musil-musil itindasndu janah ipaksandu ia mereken pagena. E maka aminna nggo pe ipajekkenndu rumahndu gedung batu, labo pagi kam ngianisa; nggo pe isuanindu kebun anggur si mejile, labo pagi inemndu lau anggur e.
12Kuteh nge uga belinna dosandu janah uga lalana kejahaten si ilakokenndu. Kalak bujur itindasndu, ngalo duit sisip kam, janah iolangi-olangindu kalak musil maka ola datca keadilen i bas pengadilen.
13E maka i bas paksa si bage, sip saja kalak pantas sabap paksa jahat kap e.
14Daramilah si mehuli, ula si jahat, maka kam nggeluh. Adi bage TUHAN Dibata si Mada Kuasa tuhu-tuhu rembak ras kam, bagi si ikatakenndu rusur.
15Cigalah atendu man kejahaten, ngena atendu si benar, janah arus iperdiatekenndu gelah keadilen menang i bas pengadilen. Mbera-mbera mekuah ate TUHAN man bangsa enda si lit denga tading nggeluh genduari.
16Erkiteken si e, enda kap si ikataken TUHAN Dibata si Mada Kuasa, "Lit sora tangis ras ngandung i tiga ras i pasar-pasar. Subuk perjuma pe idilo gelah nangisi kalak si mate radu ras kalak upahen si beluh ngandung.
17I bas kebun-kebun anggur pe tangis ngandung kalak kerina. Si enda kerina jadi erkiteken mentas Aku arah tengah-tengahndu." Bagenda me nina TUHAN.
18Andiko, cilaka me kam si ertedeh ate nandangi kerehen wari TUHAN! Kai kin untungna man bandu kerna wari e? Wari e, wari kegelapen kap man bandu, labo terang.
19Tupung si e bali kap ras sekalak jelma si pulah i bas babah arimo nari tapi ndabuh ku babah buaya! Tah pe bagi sekalak jelma si mulih ku rumahna; tupung tertande ia ku dingding, itagut nipe tanna!
20Wari TUHAN, tuhu-tuhu sada wari si gelap labo lit sitik pe terangna.
21Nina TUHAN, "Ciga ateKu perayan-perayan agamandu; mutah Aku ngidahsa!
22Adi ibahanndu persembahen tutungen ras persembahen gandum, la Kualoken. Asuh-asuhen si nggo ipeburburndu janah ipersembahkenndu bangKu pe la Kualoken.
23Ende-endenndu pe gejek Kuakap; pengadilah e. La ateKu bage megiken sora kulcapindu.
24Tapi bahanlah maka keadilen erburak-burak desken lau sumbul, dingen kebujuren desken lau belin si la pernah kerah.
25O kalak Israel, kidekah kam Kubabai erdalan arah gurun pasir empat puluh tahun dekahna, la kap lit Kupindo persembahen gelehen ras persembahen si deban.
26Tapi genduari, perban nggo isembahndu gana-gana Sakkut raja nu dibata-dibatandu, bage pe Kewan e me bintang si isembahndu jadi dibatandu, e maka arus pagi ibabandu gana-gana e
27tupung Kubaba kam ku pembuangen ku sada negeri i lepar Damaskus," bage nina TUHAN, si tergelar Dibata si Mada Kuasa.