Dual PanelPertenget Salomo
1Enda kap pertenget Salomo: Anak si pentar eme kap keriahen bapana, anak si lenge e kap erbahanca ceda ate nandena.
2Kebayaken ulih kejahaten la kap lit untungna, tapi kebujuren mulahi kalak i bas kematen nari.
3Kalak bujur kutera pe la ipelepas TUHAN kelihen, tapi sura-sura kalak jahat la IpebentasNa.
4Kalak malas jadi musil kap, tapi kalak mejingkat, kebayaken jadi ulihna.
5Kalak pentar rani kap i bas paksana, tapi man kemelanken adi lit si tunduh tupung paksa peranin.
6Kalak bujur ndatken pasu-pasu, tapi i bas kata-kata kalak jahat terbuni biak pemunuh.
7Kalak bujur jadi kesangapen si lalap inget kalak, tapi kalak jahat meter ilupaken.
8Kalak si rukur nggit megiken ajar si mehuli, tapi kalak si melasken kata-kata si la erluhu bene.
9Kalak bujur nggeluh la biar-biaren, tapi penipu la banci lang ketunduken.
10Kalak si la pang encidahken kebenaren, ipeturahna kap perubaten; tapi si mandang alu terang-terangen dame kap atena.
11Babah kalak bujur desken sumbul kegeluhen, tapi i bas kata-kata kalak jahat terbuni biak pemunuh.
12Nembeh ate mabai perjengilen, tapi keleng ate la naktaki kesalahen.
13Kalak si erpemeteh melasken kata-kata si payo, tapi kalak lenge perlu iukum.
14Kalak pentar, ipepulungna pemeteh asa bancina, tapi adi kalak lenge ngerana, ipekekena perjengilen.
15Kebayaken engkawali kalak bayak, kemusilen engkernepken kalak musil.
16Ngelakoken si mehuli kegeluhen kap upahna, tapi dosa mabai kalak gelah tole mahan dosa.
17Ise si ngergaken kata ajar, kegeluhen kap sikerajangenna, tapi kalak si la nggit ngakuken salahna, bene me ia.
18Kalak si relem-elem perguak kap, janah si percekurak, ia kap kalak lenge.
19Reh lalana ngerana, reh belinna dalan erdosa, adi pentar kin kam tentu kam la pet ngerana.
20Kata-kata kalak bujur desken pirak murni kap; perukuren kalak jahat, la lit sitik pe gunana.
21Kata-kata kalak bujur, erguna man jelma si nterem, tapi kebodohen kalak bodoh erbahanca cilaka dirina jine.
22Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken.
23Kalak bodoh meriah iakapna erbahan salah, tapi kalak pentar meriah iakapna ngelakoken si mehuli.
24Kalak bujur seh kap sura-surana, tapi kalak jahat kai si ibiarina kal, eme jadi man bana.
25Adi reh galumbang mbelin, mombak me kalak jahat, tapi kalak bujur paguh rasa lalap.
26Ula pada suruh kalak malas, sabap erbahanca latih ukur saja nge; bali ras cuka si erbahanca ipen ngilu, bagi cimber si erbahanca meser mata.
27Patuhlah man TUHAN, gelah kam cawir metua, kalak jahat mate ope denga seh paksana.
28Pengarapen kalak bujur kempak keriahen kap perlawesna, pengarapen kalak jahat tetap sia-sia.
29TUHAN kap si ngkelini kalak bujur, tapi IkernepkenNa kalak si erbahan jahat.
30Kalak bujur nggeluh la biar-biaren, tapi kalak jahat ipelawes i bas taneh pusaka nari.
31Kalak benar pentar kal rananna, tapi kalak jahat isompel me babahna.
32Kalak bujur ietehna melasken ranan si mehuli, tapi ranan kalak jahat gelgel erbahan pusuh mesui.