Dual Panel1Jabu si mehuli jadi arah kepentaren diberu, tapi iruntuhken alu kemotunna.
2Kalak bujur erkemalangen dingen patuh man Dibata, kalak si la bujur igombangina kap Dibata.
3Kalak lenge peganjang-ganjangken bana arah mbue ngerana, tapi kalak pentar rananna jine si engkawalisa.
4Adi la lit lembu penenggala, la lit ulih juma, alu gegeh lembu, mbue ulihna.
5Saksi si bujur lalap ngataken situhuna, saksi si la bujur bual kerina kesaksinna.
6Kalak si meganjang rukur kutera pe la banci pentar, tapi kalak si lit ukurna menukah iakapna erlajar.
7Ula perteman kalak motu, la lit si banci iajarkenna man bandu.
8Ngkai maka pentar kalak beluh? Erkiteken ietehna kai si ibahanna. Ngkai maka lenge kalak bodoh? Erkiteken iakapna kai pe nggo ietehna.
9Kalak bodoh la diatena pe adi ia erdosa, tapi kalak bujur mesikel maka dosana ialemi.
10Meriah ntah mesera, pusuhndu ngenca nggejapsa, kalak si deban labo igejapna penggejapenndu si tuhu-tuhuna.
11Rumah kalak bujur tetap paguh, tapi rumah kalak jahat nandangi runtuh me.
12Mawen-mawen iakap kalak kempak kegeluhen dalan si idalanina, tapi situhuna kempak kematen kepeken.
13Tupung tawa e, banci jadi terbuni ate ceda, kenca lepas keriahen, nimai ndele ate.
14Kalak jahat inanamina nge bekas kejahatenna, kalak bujur pe inanamina nge bekas kebujurenna.
15Kalak bodoh tek ia kerina, kalak pentar ijagana perjingkangna.
16Kalak pentar gelgel ia megermet, dingen isilahkenna si jahat, kalak bodoh la megermet dingen melantar erkai pe.
17Kalak si perampang, ilakokenna perbahanen si bodoh, kalak pentar lalap teneng ia rukur.
18Kalak lenge inanamina me kelengenna, kalak pentar, pemeteh kap si jadi ulihna.
19Kalak jahat erjimpuh nge pagi i lebe-lebe kalak si bujur ukurna, mindo ia gelah ikelengi.
20Kalak bayak nterem temanna, tapi kalak musil temanna jine pe ernembeh ate man bana.
21Adi kemalemen ate sura-surandu, mehulilah man kalak musil, adi megombang man kalak si deban erdosa kap.
22Ise ngelakoken si mehuli, iteki dingen ndatken kehamaten, ise si erbahan jahat papak kap ia.
23Erdahinlah maka kam nggeluh, adi ngeranai janah kundul-kundul saja ngenca, musil me kam.
24Kalak pentar terpuji erkiteken kepentarenna, kalak bodoh terberita perban kebodohenna.
25Adi sekalak saksi ngataken si tuhuna, ikelinina kap kesah kalak, kune si erbual icilakakenna kap temanna manusia.
26Kalak si erkemalangen man TUHAN, teneng geluhna, janah keluargana pe dat kecion.
27Erkemalangen man TUHAN e kap palas kegeluhen, kalak si bage isilahina kap kematen.
28Adi nterem rayatna, ermulia me raja, adi la ras rayat runtuh me kuasana.
29Kalak si la pedas merampus, pentar kap, kalak si perampang encidahken kebodohenna kap.
30Ketenengen ukur mahanca kalak mejuah-juah, cian ate seri ras penakit kangker.
31Si erbahan mehuli man kalak musil, ipermuliakenna kap Dibata, si nindih kalak si kekurangen ihinana kap Dibata si Nepasa.
32Kalak jahat guling erkiteken kejahatenna, tapi kalak bujur terkawal perban kebujurenna.
33Kalak beluh pusuhna dem alu kepentaren, tapi kalak bodoh la diatena pe kepentaren.
34Kebujuren kap mahanca bangsa jadi mulia, dosa si erbahanca bangsa jadi juru.
35Pegawai si beluh ngena ate raja, tapi adi la ngasup ndahiken dahinna iukum.