Alkitab Mobile SABDA
[VER] : [KARO]     [PL]  [PB] 
 <<  Amsal 17 >> 

1Madin man la erbengkau tapi dame, asangken man rula-ula i bas rumah si dem perjengilen.

2Suruh-suruhen si cerdik engkuasai anak si gutul, dingen ngaloken tading-tadingen tuanna ras senina-senina anak ndai.

3Emas ras pirak iane i bas api, tapi pusuh manusia Dibata si ngujisa.

4Kalak jahat megiken perukuren si jahat, kalak perbual ndengkehken kata guak.

5Si nokoh-nokohi kalak musil dingen mesera, igombangina kap Dibata. Si meriah iakapna ngidah kalak kena cilaka, iukum kap ia.

6Orang tua gedang atena ngenen kempuna, kemegahen anak-anak eme kap orang tuana.

7Kalak si mehamat la nggit melasken kata la tuhu, kalak lenge ibelaskenna ranan si la erguna.

8Lit kalak si erpengakap maka uang sogok desken kuasa-kuasa, iakapna alu uang sogok kai pe banci jadi.

9Adi atendu isenangi kalak, alemi kalak si ersalah man bandu, adi salah kalak ipeinget-inget, e encedaken perkade-kaden kap.

10Sekali iajarken, kalak pentar mbue dat pelajaren seratus kali icambuk, kalak lenge la nggit megiken kata.

11Man kalak si rusur peturah kiniseran, kematen reh ndahi ia desken sada persuruhen si merawa.

12Madin jumpa ras beruang si kebenen anak, asangken jumpa ras kalak bodoh si sangana ngelakoken kebodohenna.

13Kalak si mbalas kiniulin alu kejahaten, i bas rumahna nari pe la terpelawes kejahaten.

14Menaken perjengilen seri ras murtasken paya, emaka tambaklah ope denga ndauh maler launa.

15Nembeh ate TUHAN man kalak si mulahi kalak jahat, bage pe ngukum kalak si la ersalah.

16Percuma kalak bodoh ngkeriken duitna lako ndarami kepentaren, sabap la lit pengertin i bas ia.

17Teman tetap encidahken atena keleng, kai gunana sekalak senina adi labo ikut i bas nggejapken kiniseran?

18Kalak si la rukur ngenca, si njamin utang kalak si deban.

19Kalak si erngena ate man dosa, ngena atena erbahan perubaten. Kalak si encidah-cidahken kebayakenna eme si ndarami kiniseran.

20Kalak si rukur dingen pengeranana jahat, asa ndigan pe la jumpa si mehuli, tapi cilaka.

21Anak si rusur erbahan kebodohen, melala iberekenna man bapana kendelen.

22Keriahen desken tambar si mereken kejuah-juahen, adi ukur serbut erbahanca daging kertang tading tulan.

23Hakim si korupsi erbuni-buni ia ngaloken sogok, eme sabapna la banci jumpa keadilen.

24Perayaken kalak pentar eme pemeteh, tapi kalak bodoh la ertentun tujunna.

25Anak si bodoh nuhsahi bapana, dingen ceda ibahanna pusuh nandena.

26La patut adi kalak si la ersalah idenda; adi kalak si mehuli iukum, keadilen jadi ceda.

27Kalak si beluh rukur iangkarna nge ngerana, kalak si saber ukurna ia kap kalak si pentarna.

28Kalak bodoh pe iakap cerdik dingen pentar, adi ia sinik dingen la ngerana.


  Share Facebook  |  Share Twitter

 <<  Amsal 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel