Dual PanelGuna kepentaren
1Pelajarilah si kukataken man bandu o anakku, janah ula kal kam lupa si kuturiken man bandu.
2Megermetlah nandangi kepentaren jenari cubakenlah ngantusisa pe.
3O anakku, pindolah pemeteh, seksekilah ndatken pengertinna.
4Daramilah e desken ndarami emas, ayakilah e desken ndarami erta si terbuni.
5Alu bage maka ietehndu kai ertina erkemalangen man TUHAN, jenari idatndu me pemeteh kerna Dibata.
6TUHAN kap si mereken kepentaren, i bas Ia nari kap manusia ndatken pemeteh ras pengertin.
7Man kalak benar ras bujur IberekenNa penampat ras ampang-ampang.
8TUHAN si ngkawali kalak si bujur perbahanenna janah iampang-AmpangiNa kalak si tutus man BaNa.
9Adi idengkehkenndu aku, ietehndu kai si bujur, si benar dingen adil. Ietehndu pe kai si arus ilakokenndu.
10Kam jadi kalak pentar janah pemetehndu mereken kesenangen man bandu.
11Kebeluhen dingen pengertinndu kap si ngkawali kam,
12dingen ia si ngambati kam maka ula ngelakoken si lepak. Ipedauhna kam i bas kalak si erbahan perjengilen nari alu rananna.
13Kalak si bage la nggit ngikutken peraten Dibata, erkiteken ia erdalan i bas kegeluhen si dem alu dosa.
14Meriah iakapna ngelakoken si salah janah ndarami kepuasen i bas perbahanenna si jahat.
15Ia penipu dingen la terteki pe.
16Ngasup me kam nulak diberu gutul si nami-nami kam alu cakap medalit gelah kam guling.
17Diberu si bage la keleng atena perbulangenna, nggo lupa ia padan si ibelaskenna man TUHAN.
18Adi lawes kam ku rumahna, e ertina kam erdalan kempak kematen. Ndahi ia seri ras ndeheri doni kematen.
19Kalak si ndahi ia asa ndigan pe lanai banci mulihken; lanai ndigan pe ia mulihken ku bas dalan kegeluhen.
20Dage o anakKu, arus maka iusihndu perbahanen kalak si mehuli dingen nggeluhlah i bas kegeluhen si benar.
21Sabap kalak si nggeluh rikutken si ngena ate Dibata, eme kalak si bersih ukurna, ia kap si tading i bas negerinta enda.
22Tapi kalak jahat dingen perdosa isintapken Dibata me i bas negeri enda nari desken dukut si iruah i bas taneh nari.