Dual PanelPujin nandangi kepentaren
1Pirak banci idat i bas pertambangen, janah emas pe lit inganna i ja ia ianai.
2Besi ikali i bas taneh nari, tembaga ilebur i bas batu nari.
3Ingan si gelapna pe idalani manusia, lubang si mbagesna i bas taneh pe isiksikna; i bas ingan si gelap e nari, manusia ngkali batu-batu si terbuni.
4Ndauh sirang ras ingan manusia, i bas ingan si la pernah idedeh nahe jelma, i bas liang si mbages dingen mesuni, manusia erdahin janahna cerawis-cerawis i bas tinali.
5Pangan manusia turah i bas taneh nari; tapi arah teruh taneh e, kerinana getem bagi si ipan api.
6I bas batu taneh lit sapir si meherga, janah i bas abuna lit emas suasa.
7Dalan ku pertambangen e, kuliki pe la ngidahsa, janah liat-liat pe la pernah kabang arah babona.
8Singa tah rubia-rubia meliar si deban pe, la pernah erdalan arah dalan si melungen e.
9Batu si piher ikali manusia, deleng-deleng ikurukna arah palasna.
10Asum ia erbahan liang arah deleng batu, ijumpaina erbage-bage permata si meherga tuhu-tuhu.
11Isiksikna terus ku ulu lau belin arah gugung, janah kai si terbuni italangi kempak terang.
12Tapi i ja banci idat kepentaren? I ja ingan erlajar gelah dat pengertin.
13Kepentaren la lit ijumpai i bas manusia, ergana si tuhu-tuhu, la ise pe metehsa.
14Kelbung ras lawit si mbages ngatakenca maka kepentaren la lit i bas ia.
15Kepentaren la tertaktaki ergana, la tertukur subuk salu emas tah pirak gia.
16Emas murni ras permata intan, la ngasup ngimbangi ergana kepentaren.
17Ergan ia asangken emas tulen, lebih asangken kaca halus tah pe emas perhiasen.
18Ndauh kal ergan ia asangken bunga karang, kristal, tah pe mutiara.
19Batu topas si mejilena pe ras emas tulen, la terpeseri ras ergana kepentaren.
20I ja dage sumbul kepentaren? I ja ingan ndatken pengertin?
21Si nasa nggeluh la pernah ngidahsa, perik-perik kabang pe lenga.
22Ingan begu ras doni kematen pe ngatakenca, maka sora kusik-kusik ngenca ibegina.
23Dalan ku kepentaren, Dibata ngenca metehsa; ItehNa i ja ingan ndatkenca.
24Sabap seh ku tampuk doni IdahNa kerina, asa si lit i teruh langit la terligen man BaNa.
25Tupung ibereken Dibata gegeh man angin, janah asa kai belangna lawit pe itentuken,
26asum ItetapkenNa i ja ingan ndabuhna udan, janah arah apai kilap erdalan,
27tupung si eme idah Dibata kepentaren, janah kenca IujiNa, IpujikenNa kepentaren.
28Nina Dibata man manusia, "Erkemalangenlah man Dibata, maka kam pentar, silahkenlah si jahat, maka dat kam pengertin."