Dual Panel1Dage genduari Jop, begikenlah rananku, dengkehkenlah kerina katang-katangku.
2Aku nggo sikap ngerana bandu, melasken kai si lit i bas ukurku.
3Alu pusuh melikas aku ngerana, janah si kubelasken tuhu kerina.
4Kesah Dibata kap si nepa aku. Ia nge si mereken kepentaren bangku.
5Adi ngasup kam, aloi dage aku; pekena dage jabapndu.
6I adep-adepen Dibata duana kita bali; aku ras kam itepa i bas taneh dah nari.
7Dage labo kam mbiar ngenehen aku, kata-katangku labo kari mberatca iakapndu.
8Ndai nggo kubegi rananndu tuhu, janah kudengkehken si ibelaskenndu.
9Nindu ndai, 'Aku melikas, la lit salah perbahanenku. Aku bujur, la lit sitik pe dosangku.
10Tapi idaram-darami Dibata alasen ngelawan aku, janah bagi MusuhNa IbahanNa aku.
11IrantekenNa nahengku, IperdiatekenNa perdalanenku.'
12O Jop, salah kal kam i bas si e, sabap Dibata belinen asa ise pe.
13Ngkai maka isalahkenndu Dibata, adi la gia IjabapNa pengadun sekalak jelma?
14Si tuhuna labo erngadi-ngadi Dibata ngerana, aminna gia la iperdiateken manusia.
15Tupung manusia tunduh berngi, Dibata ngerana arah pengenehenen ras nipi.
16IpedengkehkenNa katana man manusia, janah IsingetiNa manusia e alu pertenget si IberekenNa.
17Sura-SuraNa gelah manusia jera, janah ulanai meganjang ukurna.
18La IpelepasNa manusia bene; IselamatkenNa, gelah ula ia mate.
19Iajarken Dibata manusia arah penakitna, alu namaken si mesui ku bas dagingna.
20Manusia la pet man erkiteken penakitna, janah pangan si ntabehna pe ciga atena.
21Dagingna kesip seh kertangna, janah nggo terbeligai kerina tulanna.
22Nandangi berkat me ia ku pendawanen, doni kematen, man bana nggo ndeher.
23Banci jadi sekalak i bas malekat Dibata si meribu-ribu buena, si dahinna ngingetken manusia kerna dahinna, reh nampati manusia.
24Perban mekuah ate malekat man manusia, ikatakenna man Dibata nina, 'Pulahilah ia i bas pendawanen nari; enda tebusna, maka ia pulah ka mulihi.'
25Kenca bage, jadi pesing ka mulihi dagingna, janah megegeh bagi sekalak anak perana.
26Adi ertoto ia, ialoi Dibata pertotonna; alu dem keriahen isembahna Dibata; janah ipekena Dibata ka mulihi sikerajangenna.
27I lebe-lebe jelma si nterem ikatakenna, 'Aku nggo erdosa. Si bujur la kulakoken, tapi aku la iukum Dibata.'
28La sahun aku berkat ku doni kematen perban aku IpulahiNa, emaka genduari aku mejuah-juah denga.
29Perbahanen si bage nandangi manusia, piga-piga kali ilakoken Dibata,
30gelah arah e manusia banci IselamatkenNa, maka kegeluhen si dem keriahen ialoken manusia.
31O Jop, begiken katangku enda, sinik kam, maka kuterusken ngerana.
32Tapi adi lit si man belasenkenndu katakenlah; janah adi benar kam, tentu kuakui alu ukur meriah.
33Tapi adi la lit, sinik kam janah begiken, maka kuajarken bandu kepentaren.