Dual Panel1Kenca bage ngaloi Jop man TUHAN nina,
2"Genduari kuteh TUHAN, maka kai pe ngasup kam ngelakokenca kai IsuraNdu seh kerina.
3O, TUHAN marenda IsungkunNdu aku, ngkai maka aku la tek nandangi KepentarenNdu adi pemetehku pe labo lit. Tuhu kal, nggo kucakapken si la kuerti, perkara-perkara si mejin si la kuantusi.
4IsuruhNdu aku megi-megi asum Kam ngerana, janah kenca si e gelah PenungkunenNdu kucubaken njabapsa.
5Kepeken pemetehku kerna Kam, terjeng si ituriken kalak ngenca; tapi genduari, alu matangku jine, Kam nggo kuidah.
6Perban si e mela kal kuakap kerna kai si nggo kubelasken, erkadiola aku, emaka kundul aku i bas abu dapur ras abu taneh."
Pendungi
7Kenca nggo dung TUHAN ngerana man Jop nina man Elipas, "Nembeh ateKu kam ras temanndu si dua e, erkiteken la payo kai si ikatakenndu kerna Aku; suruh-suruhenKu Jop la bagi kam e.
8Emaka genduari buatlah pitu jenggi lembu ras pitu bajar biri-biri jenari dahilah Jop. Persembahken kerina asuh-asuhen e jadi persembahen tutungen guna dirindu. Jop kari notoken kam. Kubegiken pertotonna maka la kam Kujuruken aminna patut gia kam iukum sue ras kesalahenndu. Kai si ikatakenndu kerna Aku la tuhu; tapi Jop tuhu si ikatakenna."
9Minter ilakoken Elipas, Bildat, ras Sopar kai si ikataken TUHAN, janah ibegiken TUHAN pertoton Jop.
10Jenari, kenca Jop ertoto guna temanna si telu e, senang ka mulihi geluhna ibahan TUHAN, janah IberekenNa man Jop kebayaken dua kali lipat buena asa si mbarenda.
11Kerina senina-senina Jop ras turangna, bage pe teman-temanna si mbarenda, reh ndahi ia, janah ras ia man-man i bas rumah Jop. Iapulina Jop, janah ikatakenna maka ia pe kerina ikut rate ceda i bas kiniseran si nggo irehken TUHAN man bana. Sekalak-sekalak ia mereken duit ras sada cincin emas man Jop.
12Pasu-pasu si ibereken TUHAN man Jop kenca lepas kiniseranna e, lebih pe asangken si nai; biri-birina lit 14.000, untana 6.000, lembuna 2.000, ras 1.000 kalde.
13Anakna pe lit ka pitu dilaki ras telu diberu.
14Anak diberu si pemena ibahanna gelarna Jemima, si peduaken Kesia, janah si nguda Keren Hapuh.
15I belang-belang negeri e la lit diberu si bagi anak Jop e jilena. Man bana pe teluna ibereken bapana erta tading-tadingen bagi man turangna si dilaki.
16Jop nggeluh seratus empat puluh tahun nari kenca kiniseranna e, idahna denga kempu-kempuna bage pe anak-anak kempuna.
17Jenari mate Jop i bas umur si nggedang, cawir ia metua.