Dual Panel1Lebuhkenlah o Jop. Lit kin si ngaloi kam? Lit kin malekat man inganndu mindo penampat?
2Kalak si longor ngenca, elem-elemna ngayak matena.
3Pernah kuidah kalak motu, si tempa la lit kebiarenna, tapi rempet kusumpahi rumahna.
4Anak-anakna ndigan pe lanai selamat; la lit ise pe si nampati ia i pengadilen.
5Kalak si kelihen mangani ulih juma kalak motu, subuk si turah i tengah duri pe, janah kalak si muas, iri ngenehen kebayakenna.
6Kejahaten labo i bas abu turahna, janah kesusahen pe labo ertunas i bas taneh.
7Lang! Manusia nge si ngelegi sinanggel man bana, bali ras bunga api si kabang i bas api nari.
8O Jop, bicara aku min kam, tentu man Dibata aku mindo penampat, dingen kuturiken kesusahenku man BaNa.
9Labo kita ngasup ngangkasa, perkara-perkara mbelin si IlakokenNa, dingen tanda kuasa si IbahanNa, la lit TampukNa.
10IpesusurNa udan ku taneh, juma-juma IbereNa lau.
11Tuhu, Dibata kap ngangkatken si meteruk, dingen mereken keriahen man kalak si erceda ate.
12Rencana kalak si geduk ukur IsontarkenNa, dingen kesidingen IbahanNa kalak pentar alu kepantasenna jine, seh maka kai si ilakokenna, la lit mereken asil;
13(Ayb 5:12)
14ciger wari e pe, dadap-dadap ia bagi i bas gelap.
15Tapi iselamatken Dibata kalak musil i bas kematen nari; IpulahiNa kalak si kekurangen i bas penindasen nari.
16IberekenNa pengarapen man kalak musil, dingen ipesinikna kalak jahat.
17Malem kal ate kalak si iligas Dibata, emaka ula tulak adi IsuriangiNa kam.
18Sabap ibaluti Dibata nge luka si IbahanNa; IligasNa, jenari Ia jine si nambarisa.
19I bas wari ku wari IpulahiNa kam i bas kesusahen nari,
20adi reh musim kelihen, la kam IbahanNa mate lumben; janah i bas perang, ikawalina kam.
21Dibata mulahi kam i bas cakap kalak si la uli nari, IselamatkenNa kam adi reh kiamat.
22Itawaindu ketombangen ras kelihen, janah la kam mbiar rubia-rubia si meliar.
23Juma si itenggalaindu la lit batuna; rubia-rubia si meliar melemuk man bandu.
24Emaka kam nggeluh alu dame i bas kemahndu; adi ipernehenndu rarasen biri-birindu, la lit sada pe bene.
25Anakndu bali teremna ras bulung rih i mbalmbal.
26Cawir metua kam nggeluh, bali ras page si megersing i bas paksa peranin.
27O Jop, si enda kerina ieteh kami sabap nggo ndekah kal ipelajari kami janah tuhu kal bage, emaka genduari iakuindulah e."