Dual PanelNipi Raja Nebukadnesar
1I bas tahun si peduaken kenca Nebukadnesar jadi raja, ernipi ia. Aru kal atena erkiteken nipina e seh maka lanai tertunduhkenca.
2Emaka ipepulungna guru-guru si beluh ngoge nasip, guru permangmang, guru pertendung, ras guru si baso, lako nuriken man bana kai erti nipina e. Kenca ngadap kerina i lebe-lebe raja,
3nina raja man bana, "Suhsah ukurku kerna nipingku, emaka mesikel aku meteh antusenna!"
4Ngaloi kalak ndai i bas cakap Aram nina, "Rasa lalaplah raja nggeluh! Turiken nipindu e, maka ituriken kami antusenna."
5Nina raja man bana, "Nggo kutetapken i bas ukurku maka arus iturikenndu bangku nipingku e, jenari turiken pe antusenna. Adi la kam ngasup nurikenca, la banci lang kam itampul dingen ilapahi janah rumahndu irontasken.
6Tapi adi ngasup kam nurikenca nipi e ras antusenna kubereken bandu upah si mbelin rikut ras kehamaten. Dage, turikenlah genduari kai nipingku e ras kai antusenna."
7Ngaloi ka kalak ndai man raja nina, "O Raja, adi iturikenndulah nipindu e man kami, tentu banci ituriken kami antusenna."
8Megi si e, ngerana raja, "Nggo kueteh maka atendu pedekah-dekahsa saja. Sabap itehndu maka nggo kutetapken ukurku,
9lako mereken ukumen si seri man bandu kerina adi la iturikenndu nipingku e. Nggo ersada arihndu kerina terus-terusen nuriken kata guak man bangku, sabap ngarap kam kenca ndekah kari banci sambar ukurku. Genduari turiken kai nipingku e, gelah kueteh kengasupenndu nuriken antusenna."
10Erjabap guru-guru e kerina nina, "O Raja, labo lit ise i babo doni enda si ngasup nurikenca si merincuh kam metehsa e. Lenga pernah lit sekalak raja pe, subuk raja si mbelinna, tah pe raja si erkuasana, si erbahan pemindon si bagenda man guru-guru si beluh ngoge nasip, guru permangmang, tah guru pertendung.
11Meserasa pemindonndu e, raja; emaka labo lit ise pe ngasup ngelakokenca seakatan dibata-dibata, janah si bage la lit ringan i tengah-tengah manusia."
12Erkiteken si e merawa kal raja, janah iperentahkenna munuh kerina penasehat kerajan i Babil.
13Dage luar me perentah gelah kerina kalak ndai ibunuh, janah i bas si e ikut pe Daniel ras teman-temanna.
I petangkas Dibata man Daniel antusen nipi e
14Kenca bage ijumpai Daniel si Ariok, komendan pengawal raja, si iperentahken ndalanken pemunuhen e.
15Alu manjar-anjar Daniel ngorati Ariok ngkai maka luar perentah raja si bage kejamna. Emaka ituriken Ariok man Daniel kai si nggo jadi.
16Minter lawes Daniel ku istana mindo kesempaten sitik nari gelah banci iturikenna kai erti nipi e.
17Kenca bage mulih Daniel ku rumahna. Emaka iturikenna man teman-temanna Hananya, Misael, ras Asaria kai si nggo jadi.
18Isuruhna kalak e ertoto man Dibata nu langit mindo perkuah AteNa gelah IturikenNa kai antusen nipi raja maka ula ia ibunuh radu ras guru-guru Babilon si deban.
19Kenca bage i bas berngi e ka, ipetangkas Dibata man Daniel kerina rahasia e arah sada pengenehenen. Emaka ipujina Dibata nu langit nina,
20"Dibata tuhu-tuhu pentar ras erkuasa; rasa lalap pujilah Ia.
21Wari-wari Ia ngaturkenca, paksa-paksa Ia ngobahsa. Ia nge si ngangkat raja-raja, Ia ka nge si pengadisa. Ia si mereken kepentaren, Ia ka nge si mereken pengertin.
22IpetangkasNa perkara si mbages dingen rahasia. Ia ikeleweti terang, tapi si terbuni i bas gelap IetehNa.
23Kupuji dingen kupehaga Kam, o Dibata nu nini-niningku, sabap nggo IberekenNdu kepentaren ras gegeh bangku. Pertotonku nggo ibegikenndu, si man turinken kami man raja nggo IcidahkenNdu."
Daniel nuriken nipi raja ras antusenna
24Emaka lawes Daniel njumpai Ariok, si nggo iperentahken raja munuhi penasehat-penasehat kerajan. Nina Daniel bana, "Ula bunuhndu kalak e. Baba aku ngadap man raja maka kuturiken man bana kai antusen nipina e."
25Minter ibaba Ariok si Daniel ku adep-adepen Raja Nebukadnesar, janah nina man raja, "O Raja, nggo jumpa aku ras sekalak tabanen kalak Jahudi si ngasup nuriken antusen nipindu e."
26Nina raja kempak Daniel (si igelari ka pe Belsasar), "Ngasup kam nurikenca kai nipingku e ras kai antusenna?"
27Ngaloi Daniel, "O Raja, labo lit guru si baso, guru permangmang, guru pertendung tah pe ahli bintang si ngasup nurikenca man bandu.
28Tapi lit kap Dibata i Surga si mpetangkas rahasia-rahasia. Man bandu, o Raja, nggo IturikenNa kai si nandangi jadi i bas paksa si reh. Emaka genduari kuturiken me man bandu nipindu e, pengenehenen si iidahndu tupung kam tunduh.
29Tupung kam tunduh, o Raja, ernipi kam kerna paksa si reh; janah Dibata, si mpetangkas rahasia-rahasia, encidahkenca bandu kai si nandangi jadi.
30Rahasia e nggo IpetangkasNa man bangku, labo erkiteken aku pentaren asangken kalak si deban, tapi gelah ietehndu antusen nipindu e, janah iertindu perukuren si lit i bas kam.
31O Raja, i bas pengenehenndu e iidahndu tedis i lebe-lebendu sada gana-gana si mbelin kal, erndihawa dingen ersinalsal, janah hebat kal tempasna.
32Takal gana-gana e emas murni, tentenna ras tanna pirak, awakna ras buta-butana tembaga;
33nahena besi, janah tapak-tapakna deba besi, deba taneh dah.
34Tupung ipernehenndu gana-gana e, lit sada batu naktak i bas lingling nari aminna pe la lit si ngkuitca. Itendengna tapak-tapak gana-gana si ibahan i bas besi ras taneh dah nari e, minter pecah.
35Rempet, besi, taneh dah, tembaga, pirak, ras emas ndai meripuk, emaka nggo bali ras abu i bas ingan pengeriken paksa perlego. Iembusken angin abu ndai, bekasna pe lanai lit. Tapi batu si ngkenai gana-gana ndai jadi sada deleng si ndemi doni enda kerina.
36Enda me kap nipi ndai. Genduari kuturiken bandu antusenna.
37O Raja, kam kap raja si mbelinna i bas kerina raja-raja. Dibata nu langit nggo ngangkat kam jadi raja, janah IberekenNa bandu kuasa, gegeh, ras kemulian.
38IendeskenNa ku bas kuasandu kerina doni si ingani manusia, bage pe perik-perik ras rubia-rubia si deban. Kam kap takal emas e.
39Kenca kam, lit me piga kerajan si deban, la bagi kerajanndu e belinna; kenca si e kerajan si peteluken, kerajan tembaga, si ngkuasai kerina doni enda.
40Kenca bage lit kerajan si peempatken, bali mersikna ras besi, si ngeripukken ras merperken kerinana, iripukkenna me kerina kerajan-kerajan si nggo lit leben.
41Iidahndu pe maka tapak-tapak ras jari-jari gana-gana e deba taneh dah, deba ka besi. Enda ertina kerajan e erbelah-belah. Deba bagi besi mersikna, sabap bagi si iidahndu e lit campurna besi ras taneh dah.
42Jari-jari nahena deba besi, deba taneh dah; enda ertina deba kerajan e enteguh deba merampek.
43Iidahndu ka pe maka besi campur ras taneh dah. Enda ertina peminpin-peminpin kerajan e icubakenna mpersadaken keluarga-keluargana arah perjabun sapih-sapih ia, tapi labo banci jadi, bali ras besi la banci ersada ras taneh dah.
44Tupung paksa penguasa-penguasa ndai, ipanteki Dibata nu langit me sada kerajan si la ermasap-masap. Ndigan pe la tertaluken, tapi ikernepkenna me seh keri kerajan-kerajan si deban, janah kenca bage pajek ia rasa lalap.
45Iidahndu maka lit sada batu naktak i bas lingling nari amin gia la lit si ngkuitca, jenari ipecahkenna gana-gana si ibahan i bas besi, tembaga, taneh dah, pirak, ras emas e. Arah e Dibata si mbelin ngataken man bandu, o Raja, kai si nandangi jadi i bas paksa si reh. Dage nggo kuturiken man bandu sue kal ras nipindu e, bage pe antusenna rikutken si tuhu-tuhuna."
Raja mereken upah man Daniel
46Kenca bage nembah mungkuk Raja Nebukadnesar i lebe-lebe Daniel, ayona seh ku taneh. Jenari minter iperentahkenna erbahan persembahen dingen nutung kumenen man Daniel.
47Nina raja, "Dibatandu me Dibata si mbelinna i babo kerina dibata-dibata, Tuhan i babo raja-raja, janah Ia kap si mpetangkas rahasia-rahasia. Si enda kueteh sabap ngasup kam nuriken rahasia enda."
48Kenca bage iberekenna pangkat meganjang man Daniel, janah ipersembahkenna bana erbage-bage pemere si mejile. Iangkatna ia jadi penguasa propinsi Babilon, janah ibahanna jadi kepala kerina penasehat kerajan Babilon.
49Arah pemindon Daniel, iangkat raja pe Saderah, Mesah, ras Abednego njujurken propinsi Babilon, tapi Daniel tetap ringan i bas istana kerajan.