Alkitab Mobile SABDA
[VER] : [KARO]     [PL]  [PB] 
 <<  Daniel 6 >> 

Daniel i bas lubang singa

1Mehuli iakap Darius ngangkat seratus dua puluh gubernur si nitugasken i belang-belang kerajanna.

2Tambah si e iangkatna Daniel ras dua kalak si deban jadi wakilna mperdiateken pendahin gubernur-gubernur e.

3Minter teridah pendahin Daniel ndauh ulin asangken wakil-wakil raja si debanna bage pe asangken kerina gubernur-gubernur e. Erkiteken si e, ersura-sura raja ngangkat ia jadi wakilna ngaturken kerina kerajan.

4Kenca bage wakil-wakil raja si debanna bage pe gubernur-gubernur e erpala-pala ndarami kesalahen Daniel i bas ia ngaturken kerajan e, tapi la datca. Sabap Daniel terteki i bas pendahinna janah la lit sitik pe ibahanna si salah ras si la bujur.

5Emaka nina kalak ndai sapih-sapih ia, "Labo banci sidat dalanna ngaduken Daniel seakatan arah aturen agamana."

6Emaka lawes kalak ndai ngadap raja, janah nina, "O Raja Darius, rasa lalaplah kam nggeluh.

7Kerina kami si ikut ngaturken kerajanndu enda, wakil-wakil raja, gubernur-gubernur, ras wakil-wakil gubernur, bage pe pegawai-pegawai si deban, nggo ersada ukur maka ipedaratndu min sada perentah si arus ipatuhi, eme kidekah telupuluh wari la banci ise pe mindo kai-kai pe man dibata-dibata tah pe man manusia seakatan man bandu saja. Ise ngelanggar perentah enda, iambekken ku bas lubang ingan singa.

8Dage ipedaratndulah perentah e, jenari tamaken capndu i je maka perentah e nggo esah jadi undang-undang Medi ras Persia si lanai banci iobah-obah."

9Emaka itamaken Raja Darius capna i bas perentah ndai.

10Kenca ieteh Daniel maka perentah e nggo iesahken, mulih ia ku rumahna. I das loteng rumahna e lit sada kamar jendelana ngala kempak Jerusalem. Bagi semalna, erjimpuh ia i je ertoto man Dibata telu kali sada wari, janah jendelana talang.

11Kenca imbang-imbang Daniel ngidah ia ertoto man Dibata,

12kerina ia lawes ngadap raja lako ngaduken Daniel. Nina, "Nggo ibahanndu perentah maka telu puluh wari, kasa kalak si mindo man dibata-dibata tah manusia seakatan man bandu, la banci lang iambekken ku bas lubang ingan singa." Erjabap raja, "Payo, janah e sada perentah si arus ipatuhi, sada undang-undang Medi ras Persia si la banci iobah-obah."

13Kenca bage nina man raja, "Daniel, sekalak buangen i Juda nari, la mehamat man bandu raja, janah la ipatuhina perentahndu e, ia ertoto telu kali sada wari."

14Kenca ibegi raja si enda, ceda kal atena. Emaka idaramina kal dalan lako mulahi Daniel. Seh ben wari lalap icubakenna ngukurkenca.

15Kenca bage reh kalak ndai mulihi ngadap man raja nina, "O raja, etehndu maka sue ras undang-undang Medi ras Persia perentah raja la banci sada pe iobah-obah."

16Emaka iperentahken raja gelah Daniel itangkap, jenari ibenterken ku bas lubang ingan singa. Nina raja man Daniel, "Dibatandu, si isembahndu alu patuh, Ialah si mulahi kam."

17Kenca bage itamaken me sada batu jadi tutup lubang e, janah itamaken raja capna ras cap kalak si erpangkat mbelin i bas batu e, gelah ula ise pe banci mulahi Daniel.

18Jenari mulih raja ku istanana. Gedang-gedang berngi e la ia tunduh, la man, janah la ia nggit ngenehen keriahen kai-kai pe.

19Erpagi-pagi si lampas keke raja, jenari pedas-pedas ia ku lubang e.

20Kenca seh i je, alu sora nggirgir ilebuhna Daniel nina, "O Daniel, suruh-suruhen Dibata si nggeluh! Ngasup kang Dibata si isembahndu alu tutus e ngkelini kam i bas singa-singa e nari?"

21Ngaloi Daniel, "O Raja, rasa lalaplah kam nggeluh!

22Dibata nuruh malekatna nutupi babah singa-singa e gelah ula aku isakitina. Si enda ibahan Dibata sabap IetehNa aku bujur, janah la lit kubahan si salah man bandu, o Raja."

23Lanai kal tanggung riahna ukur raja emaka iperentahkenna ngerintak Daniel i bas lubang e nari. Dage irintak me Daniel ku das, janah teridah maka la kena kai pe ia, perban ernalem man Dibata.

24Kenca bage iperentahken raja nangkap kerina kalak si ngaduken Daniel e, jenari ibenterken ku bas lubang ingan singa e, radu ras ndehara-ndeharana ras anak-anakna pe. Ope denga seh i teruh pe, nggo irigep singa e ia, janah iripukkenna tulan-tulanna.

25Kenca bage ibahan Raja Darius surat man kerina bangsa, suku, ras cakap i doni, bagenda katana, "Mejuah-juah kam kerina!

26Arah enda kuperentahken maka kerina kalak i bas kerajanku arus mbiar ras mehamat man Dibata si isembah Daniel. Ia kap Dibata si nggeluh rasa lalap ia merentah. KinirajanNa rasa lalap la termasapken, KuasaNa rasa lalap la erkerikerin.

27Ia kap si ngkelini ras si mulahi manusia; IbahanNa tanda si mejin ras tanda kuasa, subuk i Surga bage pe i doni enda. I bas singa si merawa nari, Daniel IpulahiNa."

28Senang iakap Daniel nggeluh kidekah pemerentahen Darius ras pemerentahen Kores, kalak Persia e.


  Share Facebook  |  Share Twitter

 <<  Daniel 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran