Alkitab Mobile SABDA
[VER] : [KARO]     [PL]  [PB] 
 <<  Daniel 8 >> 

Pengenehenen Daniel kerna bajar biri-biri ras kambing

1I bas tahun si peteluken kenca Belsasar jadi raja, kuidah pengenehenen si peduaken.

2I bas pengenehenen e rempet aku ringan i bas kota Susan si erbenteng i propinsi Elam. Aku tedis i tepi Lau Ulai,

3janah i tepi lau e kuidah sada bajar biri-biri. Tanduk biri-biri e gedang duana, tapi sada gedangen asa si debanna, janah lebih mbaru pe.

4Kuidah bajar biri-biri e ngegas alu tandukna ku kenjahe, ku Utara ras ku Selatan. La lit sada pe rubia-rubia si ngasup ngambatisa, la lit si banci pulah i bas kuasana nari. Ilakokenna bagi ate-atena, janah dungna meganjang ukurna.

5Tupung mamang-mamang denga ateku kai enda ertina, reh sada kambing kiam i kenjahe nari, janah perban pedasna, nahena lanai ndedeh taneh. I bas kelang-kelang matana lit tandukna si gandil kal.

6Reh ia ndahi bajar biri-biri si kuidah i tepi lau ndai, janah ientamna asa gegehna.

7Kuidah ia ngegas bajar biri-biri e. Perban bage rawana isepahna bajar biri-biri e, janah mesepak ibahanna tandukna duana. Biri-biri e lanai lit gegehna nahankenca. Itendengna, emaka minter ampar i babo taneh. Iperjaki kambing e ia, janah lanai lit ise pe si ngasup nampatisa.

8Reh dekahna reh ganjangna ukur kambing e, tapi tupung paksa kuasana nggo seh kal ganjangna, penggel me tandukna ndai. I bas inganna ndai turah empat tanduk si deban, nuju ku empat dampar.

9I bas sada tanduk, turah ka sada tanduk si kitik, si erkuasa seh ku Selatan ras ku kenjulu bage pe ku Taneh Perpadanen.

10Tanduk e turah jadi megegeh, seh maka ia ngasup ngelawan tentera Surga, bintang-bintang pe, janah piga-piga naktak ibahanna ku taneh jenari iperjakina.

11Puanglima tentera Surga pe ilawanna, janah ipengadina persembahen si tep-tep wari si ipersembahken bana. Rumah Pertoton pe imelketina.

12Labo persembahen si tep-tep wari si ipersembahken kalak i je, tapi dosa nge si ibahan kalak i bas Rumah Pertoton e. Agama si tuhu-tuhu nggo isampetken ku taneh. Kai si isura-suraken tanduk e, seh kerina.

13Kenca bage kubegi sada malekat nungkun man malekat si deban nina, "Kasa kai nari dekahna kejadin si teridah i bas pengenehenen e terus erdalan? Kasa kai nari dekahna dosa si mejin nggantiken persembahen si tep-tep wari? Kasa kai nari dekahna tentera Surga ras Rumah Pertoton i perjaki?"

14Kubegi malekat ndai njabapsa nina, "Si e terus erdalan kidekah 1.150 wari; janah kidekah si e persembahen karaben ras erpagi-pagi la ipersembahken. Kenca si e ilakoken ka kai si bujur i bas Rumah Pertoton e."

Malekat Gabriel nerangken pengenehenen e

15Tupung kucubaken ngertiken kai antusenna pengenehenen e, rempet lit kalak tedis i lebe-lebengku.

16Jenari kubegi sora erlebuh i babo Lau Ulai nina, "O Gabriel, turiken man bana kai antusen si niidahna e."

17Reh Gabriel tedis arah durungku; emaka mbiar kal aku seh maka guling aku ku taneh. Nina Gabriel bangku, "O manusia si ermasap-masap, ertikenlah antusenna. Pengenehenen e, eme kerna pendungi doni enda."

18Sangana ia ngerana denga guling aku ku taneh, pingsan. Tapi itangkapna aku, jenari ipetedisna.

19Nina man bangku, "Ateku ncidahken man bandu kuga pagi dungna, erkiteken pernembeh ate Dibata, sabap pengenehenen eme kerna paksa pendungi.

20Bajar biri-biri si iidahndu e si ertanduk dua, nggambarken kerajan Medi ras Persia.

21Kambing e nggambarken kerajan Junani, janah tanduk si gandil e si lit i bas kelang-kelang matana, eme rajana si pemena.

22Tanduk si empat e, si turah kenca tanduk si pemena ndai penggel, e nggambarken empat kerajan, sabap e bangsa terpecah empat pagi, janah gegehna la lit asa gegeh kerajan si pemena.

23Adi paksa pengkeri-kerin kerajan-kerajan e nggo ndeher, i ja ia nggo jahat kal, seh maka arus iukum, tupung e lit pagi sekalak raja si la meteh mela, ganas, dingen penipu.

24Kuasana ertambah-tambah, tapi labo arah gegehna. Erkiteken ia jadi me kecedan si mejin, janah kai si idahina jadi kerina. Ibabana kecedan man kalak si erkuasa bage pe man bangsa Dibata.

25Perban pantasna, tetap ia rulih i bas penipunna. Megah kal akapna kerna dirina, janah nterem kalak ikernepkenna alu la erbeteh. I babo si e, Raja si Mbelin ilawanna, tapi ikernepken me ia, la arah gegeh manusia.

26Pengenehenen kerna persembahen si karaben ras persembahen si erpagi-pagi si nggo iterangken man bandu, tuhu-tuhu me pagi jadi. Tapi rahasiakenlah e genduari, sabap ndekah denga maka jadi."

27Ceda kal ateku, janah sakit aku piga-piga wari dekahna. Kenca bage keke aku, jenari mulihi ka ndahiken dahin si nggo iendesken raja man bangku, tapi nungkun-nungkun ukurku ibahan pengenehenen e, janah la kuantusi.


  Share Facebook  |  Share Twitter

 <<  Daniel 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel