Dual PanelI bas kematen nari ku kegeluhen
1I bas paksa si lewat, erdandanken salahndu ras dosa-dosandu, mate pertendinndu.
2Paksa si e nai iikutkenndu kebiasan doni si jahat. Iikutkenndu peminpin penguasa-penguasa si lit i bas awang-awang, eme kesah si genduari erdahin i bas kalak si la nggit patuh man Dibata.
3Si tuhuna kita pe nai bali nge ras kalak enda. Kita nai nggeluh rikutken sura-suranta saja janah sidalanken si sentudu ras sura-sura kulanta ras ukurta. Sue ras biakta, kita pe bali ras kalak si deban, patut ngenanami pernembeh ate Dibata.
4Tapi perkuah ate Dibata la ersibar, janah mbelin kal keleng AteNa man banta.
5Seh maka asum kita mate i bas pertendin erdandanken salahta, IpegeluhNa kita mulihi radu ras Kristus. Erdandanken lias ate Dibata nge maka kam nggo terkelin.
6I bas persadanta ras Kristus Jesus, ipekeke Dibata kita ras Kristus, janah IpekundulNa kita ras Ia i bas ingan si meganjang.
7Si enda ibahan Dibata gelah seh rasa lalap IcidahkenNa KiniulinNa si lanai kal lang-lang belinna, eme lias AteNa man banta i bas Kristus Jesus.
8Sabap erdandanken lias ate Dibata nge maka kam nggo terkelin, erkiteken tek kam man Kristus. Labo bekas perbahanenndu, tapi pemere Dibata kap e.
9Labo ulih pendahinndu e, emaka labo lit dalanna ise pe muji bana.
10Tinepa Dibata kap kita; i bas persadanta ras Kristus Jesus, IjadikenNa kita guna ndahiken dahin-dahin si mehuli si nggo leben IrencanakenNa, gelah sidahiken e.
Ersada i bas Kristus
11Kam si labo kalak Jahudi, ingetlah kuga nai kam. Kalak Jahudi nggelari kam kalak si "la ersunat" tapi dirina igelarina kalak si "ersunat" eme kerna adat si ilakoken manusia nandangi kulana.
12Paksa e nai kam sirang ras Kristus. Nai kam kalak tandang-tandang si la atan i bas warga Israel si terpilih. La lit baginndu i bas iketen padan si erpalasken padan Dibata man anak-AnakNa. Kam nggeluh i doni enda la erpengarapen, dingen la er-Dibata.
13Tapi genduari i bas persadanndu ras Kristus Jesus, kam si nai ndauh, genduari nggo ibaba rembak ras kami erdandanken kematen Kristus.
14Sabap Kristus e kap si ndameken kita, alu njadiken si dua pihak e jadi sada. Kristus jine alu dareh DagingNa nggo ngeruntuhken tembok si nirangken bangsa-bangsa e dingen si erbahanca ia tetap ermusuhen.
15ImasapkenNa Undang-undang agama Jahudi alu pedah-PedahNa ras aturen-AturenNa, gelah bangsa si dua e IjadikenNa jadi manusia si mbaru si ersada ras Kristus. Alu bage IbahanNa perdamen man banta.
16Alu KematenNa i kayu persilang IkernepkenNa permusuhen e. Alu kayu persilang IpersadakenNa si dua bangsa e jadi sada kula janah IperdamekenNa ras Dibata.
17Bage me Kristus reh, janah IberitakenNa Berita Si Mehuli kerna perdamen man kerinana, subuk man bandu si nai ndauh sirang ras Dibata bage pe man kami si rembak ras Ia.
18Erkiteken Kristus me maka kita dua mbelahna ndat hak ngadap man Bapa arah Kesah si Sada e.
19Emaka kam si labo kalak Jahudi lanai kam kalak asing ntah pe pertandang. Kam pe genduari nggo jadi sada warga ras anak-anak Dibata dingen nggo jadi anggota KeluargaNa.
20Kam pe ipajekken i babo palas si itamaken rasul-rasul ras nabi-nabi, janah Kristus jine me palas persukina.
21Si nentuken susunen kerina bagin-bagin bahan-bahanen e. Bahan-bahanen e tambah belinna janah jadi Rumah Pertoton si Badia i bas Tuhan.
22I bas persadanndu ras Kristus, kam pe ras kerina kalak si deban iranggut jadi sada rumah, i ja Dibata ringan alu KesahNa.