Alkitab Mobile SABDA
[VER] : [KARO]     [PL]  [PB] 
 <<  Ester 2 >> 

Ester jadi kemberahen

1Piga-piga paksa kenca kejadin ndai, nggo me malem nembeh ate raja man Wasti. Tapi rusur iinget raja perbahanen Wasti bage pe ukumen si nggo ibahan man bana.

2Erkiteken si e nina piga-piga penasehat si ndeher ras raja, "O raja, si mehulina daramilah man bandu piga-piga kalak singuda-nguda si mejile rupana.

3Aturken min piga-piga pegawai i bas tep-tep propinsi i bas kerajan enda lako maba singuda-nguda si mejile e ku rumah ingan gundik-gundikndu i Susan, ibukota kerajan enda. Jenari Hagai, suruh-suruhenndu si ngurus kerina gundik-gundikndu, tugasken pekena-kena singuda-nguda emaka tambah jilena.

4Kenca bage buat apai atendu si ngenana, jadiken ia kemberahenndu nggantiken Wasti." Nasehat si enda mehuli iakap raja, jenari ibahanna bage.

5I kota Susan lit sekalak kalak Jahudi, Mordekai gelarna. Gelar bapana Jair, i bas suku Benyamin nari, janah nini-ninina eme Kis ras Simei.

6Asum Nebukadnesar raja Babil, maba Joyakin raja Juda ku pembuangen i Jerusalem nari, rikut ras tabanen-tabanen si deban, Mordekai pe ikut i je.

7Turang Mordekai sembuyak bapa lit sekalak, Ester gelarna; gelar Heberna eme Hadasa. Ia sekalak singuda-nguda si mejile rupana, janah potongenna pe sikap. Tupung mate orang tuana, ibuat Mordekai ia jadi anak angkatna, jenari ipebelin-belinna bagi anakna kal.

8Kenca perentah raja imomoken, nterem singuda-nguda ibaba ku Susan, janah Ester pe ikut i je. Ia pe ibaba ku istana raja, jenari iendesken man Hagai si ertugas ngawasi rumah gundik raja.

9Ngena ate Hagai ngenen Ester, janah mehuli kal ia man bana. Erdandanken si e, pedas-pedas ipekena Hagai minak si mejile guna pekena-kena daging Ester ras ngaturken pangan si mehulina man bana. Iberekenna ingan si mehulina i bas istana janah isuruhna pitu kalak singuda-nguda pilihen i bas istana jadi suruh-suruhen Ester guna pekena-kenasa.

10Kidekah si e, sue ras nasehat Mordekai, la lit man ise pe ituriken Ester maka ia kalak Jahudi.

11Tep-tep wari Mordekai gawah-gawah i bas kesain rumah gundik e guna meteh uga kecibal Ester, janah kai si nandangi jadi man bana.

12Rikutken aturen, singuda-nguda e ipekena-kena lebe dagingna sada tahun dekahna gelah mejile. Enem bulan alu make minak wangi campur kumenen, janah enem bulan nari alu make minak si merim-merim si debanna. Kenca dung si e, ibaba man Raja Ahasweros rikutken gilirenna.

13Adi sekalak singuda-nguda berkat i bas rumah gundik e nari ku istana, banci ipakena uis si mehulina kal bagi atena ngena.

14Kari gelap bengket ia ku istana, janah pepagina ibaba ia ku rumah gundik si deban i teruh pengawasen Sahasgas, suruh-suruhen si njagai kerina gundik raja. Diberu si nggo ngadap man raja, lanai perlu ndahi raja, pala mesikel raja man bana janah ipindona alu ngataken gelar diberu e.

15Dage seh me paksana Ester ngadap raja. Ester anak Abihail, turang Mordekai sembuyak bapa, si nggo ipebelin-belinna bagi anakna jine. Kerina si nggo ngidah Ester, erngena ate man bana. Kenca nggo seh gilirenna, ipakena me pakenna sue ras si nikataken Hagai, pengawas rumah gundik raja.

16Dage i bas tahun si pepituken kenca Ahasweros jadi raja, i bas bulan pesepuluhken, eme bulan Tebet, ibaba me Ester ngadap Raja Ahasweros ku istana kerajan.

17Lebih asangken singuda-nguda si deban, senang dingen malem kal ate raja ibahan Ester. Erkiteken si e ia ngenca ate raja si kelengna dingen si ngenana. Itamaken raja mahkota ku takal Ester janah iangkatna ia jadi kemberahen nggantiken Wasti.

18Kenca bage ibahan raja pesta man-man si meriah guna pehagaken Ester, janah iundangna kerina kalak si mehaga ras pegawaina. Imomoken wari libur i belang-belang kerajan, janah ibagi-bagikenna hadiah-hadiah alu melumbar.

Raja la mate erkiteken penampat Mordekai

19Mordekai nggo iangkat jadi pegawai kerajan.

20Tupung e langa ikataken Ester man ise pe maka ia kalak Jahudi, sabap bage ipadanken Mordekai man bana. Pedah Mordekai enda ipatuhi Ester kal, bali ras patuhna ia nai asum ia danak-danak denga ras Mordekai.

21Tupung Mordekai ertugas i bas istana, lit dua kalak suruh-suruhen si ersura-sura munuh Raja Ahasweros perban nembeh kal atena man raja. Suruh-suruhen si dua e, eme Bigtan ras Teres; tugasna njaga pintun i bas istana.

22Sura-sura kalak enda ndai tereteh man Mordekai, emaka minter iturikenna man kemberahen Ester, jenari ituriken Ester ka minter man raja kai si ikataken Mordekai ndai.

23Emaka kenca iselidiki, tuhu payo si ikataken Mordekai ndai. Si dua kalak ndai iukum gantung i bas tiang gantungen. Kejadin enda isuratken i bas kitap sejarah kerajan sue ras perentah raja.


  Share Facebook  |  Share Twitter

 <<  Ester 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran