Alkitab Mobile SABDA
[VER] : [KARO]     [PL]  [PB] 
 <<  Ester 8 >> 

Kalak Jahudi isuruh ngelawan musuhna

1I bas wari e ibereken Raja Ahasweros man Kemberahen Ester kerina erta Haman, musuh kalak Jahudi e. Janah Mordekai pe nggo banci ngadap man raja kenca ituriken Ester kuga perkade-kadenna ras Mordekai.

2Itangtangi raja cincin stempelna (si nggo ipindona mulihi i bas Haman nari) jenari iberekenna man Mordekai. Emaka ibereken Ester tugas man Mordekai lako ngaturken erta Haman.

3Kenca bage ngerana ka Ester man raja alu erjimpuh mungkuk i bas tapak-tapak nahe raja janahna tangis. Ipindona perkuah ate raja maka iolangina min rencana jahat nandangi kalak Jahudi si nggo ibahan Haman, kesusuren Agag.

4Idudurken raja tongkat emas man Ester, emaka tedis ia, janah nina,

5"Adi meriah ukurndu o raja, adi keleng atendu aku, janah adi mehuli akapndu, ibahanndu min sada momo gelah perentah Haman ula sahun idalanken, sabap perentah si ibahan anak Hamedata, kesusuren Agag e, lakonna ngkernepken kerina kalak Jahudi i bas kerajan enda.

6I ja nge aku ngasup ngenenca adi cilaka e reh ngkenai bangsangku, janah kerina kade-kadengku ibunuh?"

7Kenca bage nina Raja Ahasweros kempak kemberahen Ester ras Mordekai kalak Jahudi e, "Tuhu nggo kugantung, Haman erkiteken sura-surana si jahat nandangi kalak Jahudi, janah ertana nggo kubereken man Ester.

8Tapi surat perentah si ibahan i bas gelar raja janah istempel alu stempel raja lanai banci itarik. Amin bage gia, banci ibahanndu surat man kalak Jahudi bagi akapndu mehuli. Surat e banci ibahanndu i bas gelarku janah istempel alu stempel raja."

9I bas wari e pe, eme wari dua pulu telu bulan Siwan, minter idilo Mordekai kerina sekretaris raja. Iperentahkenna man erbahan surat man kalak Jahudi, bage pe man kerina gubernur, bupati ras pembesar-pembesar i bas kerina propinsi seratus dua pulu pitu e, mulai i India nari seh ku Etiopia. Surat e isehken ku tep-tep propinsi rikutken cakap ras tulisenna.

10Iperentahken Mordekai gelah surat e ibahan i bas gelar raja, jenari istempel alu stempel raja. Kenca dung isuruhna kalak naruhkenca alu ngersak kuda si megegeh kiam, si nibuat i bas karang kuda raja nari.

11I bas surat e ituriken maka kalak Jahudi ibere raja pulung guna njagai dirina. Adi kalak si ersenjata nerang ia, subuk bangsa kai gia si nerangsa janah i bas propinsi si apai gia, kalak Jahudi banci ngelawan, banci pe ngkernepken musuhna e ras ndeharana bage pe anak-anakna kerina. Banci ibunuh seh keri janah erta-ertana irampas.

12Perentah enda arus idalanken i belang-belang Kerajan Persia, i bas wari si nggo itetapken guna munuhi kalak Jahudi, eme i bas wari sepulu telu bulan Adar, bulan si pesepuluhken.

13Perentah e ipedarat selaku undang-undang janah ipebetehken man kerina penduduk i bas tep-tep propinsi, gelah kerina kalak Jahudi ersikap ngelawan musuhna adi nggo seh wari si nitetapken e.

14Emaka bekas perentah raja berkat me pertenahen-pertenahen alu ngersak kuda raja, iratuhna kudana kiam bagi angin. I kota Susan pe, ibukota kerajan, perentah enda imomoken.

15Kenca bage ndarat Mordekai i bas istana nari make uis kerajan, biru ras mbentar rupana, janah jubahna uis lenen halus, ungu rupana. I bas takalna ipakena mahkota emas si mejile. Ngidah si e, kerina penduduk kota Susan ersurak-surak dem keriahen.

16Kerina kalak Jahudi meriah akapna, senang ras longge ukurna, dingen puas pe akapna.

17I bas tiap kota i tiap propinsi, i japa pe surat perentah raja e iogeken, meriah kal akap kalak Jahudi, janah irayakenna wari e alu kerja man-man si meriah. Janah nterem bangsa si deban bengket jadi kalak Jahudi sabap mbiar ia nandangi kalak Jahudi e.


  Share Facebook  |  Share Twitter

 <<  Ester 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel