Alkitab Mobile SABDA
[VER] : [KARO]     [PL]  [PB] 
 <<  Ezra 3 >> 

Kebaktin ibenai ka mulihken

1Kira-kira i bas bulan si pepituken, kerina bangsa Israel nggo ringan i bas kuta-kuta pengulihenna. Sekali jadi pulung ia kerina i Jerusalem,

2janah Josua anak Josadak, ras temanna imam si deban, bage pe Serubabel anak Sealtiel rikut ras kade-kadena, majekken batar-batar Dibata Israel, gelah banci itutungna persembahen i babona sue ras pedah si isuratken i bas Undang-undang Musa, suruh-suruhen Dibata.

3Batar-batar e ipajekken kalak ndai i bas tapakna si dekah, aminna pe mbiar ia man kalak si ngiani negeri. Dage ibenai kalak ndai ka mulihi nutung persembahen si biasa i je subuk erpagi-pagi bage pe karaben.

4Irayakenna Wari Raya Barung-barung sue ras aturenna; tiap wari ipersembahkenna persembahen gelehen asa si iperluken guna wari e.

5Tambah si e ipersembahkenna ka pe persembahen gelehen si itutung kerinana ras persembahen-persembahen Wari Raya Bulan si Mbaru, persembahen tupung ia pulung nembah TUHAN, bage pe persembahen si ibereken man TUHAN sue ukur meriah.

6Aminna pe bangsa e langa menai majekken Rumah Pertoton e mulihi, nggo ibenaina nutung persembahen man TUHAN i bas wari si pemena, bulan si pepituken e.

Rumah Pertoton ipajekken ka mulihi

7Bangsa e mereken duit guna nggalari upah tukang batu ras tukang kayu, dingen mereken pangan, inemen, ras minak saitun guna ikirem ku kota-kota Tirus ras Sidon gelah itukarken ras kayu aras i Libanon nari, si ibaba arah lawit ku Joppa. Kerina si enda ilakoken arah persetujun Kores, raja Persia.

8Pendahin e ibenaken i bas bulan si peduaken tahun si peduaken kenca kalak ndai mulihken ku pertapaken Rumah Pertoton i Jerusalem. Serubabel, Josua, ras kerina teman sada bangsana, imam-imam, ras kalak Lewi. Gendekna, kerina kalak buangen si nggo mulih ku Jerusalem, ikut i bas dahin e. Kerina kalak Lewi, mulai umur dua puluh tahun ku das itugasken ngarak-ngarak pendahin majekken Rumah Pertoton e.

9Sekalak kalak Lewi, eme Josua ras anak-anakna si dilaki, ras kade-kadena, bage pe Kadmiel ras anak-anakna si dilaki (terpuk Hodawia) ikut muat bagin i bas njagai pembangunen Rumah Pertoton e mulihi. (Si nampati kalak enda eme kalak Lewi i bas terpuk Henadad nari.)

10Asum tukang-tukang e mulai majekken palas Rumah Pertoton e, pulung kerina imam-imam ras kalak Lewi i bas terpuk Asap nari. Imam-imam make jubahna dingen ijemakna terompet, janah kalak Lewi maba gendang. Ipuji kalak enda TUHAN sue ras si itetapken Raja Daud nai.

11Sialo-alon ia ngendeken puji-pujin man TUHAN nina, "Mehuli kal TUHAN, Keleng AteNa man Israel tetap rasa lalap." Kerina jelma si nterem ersurak asa gegehna muji TUHAN, erkiteken palas Rumah Pertoton nggo pajek.

12Sanga si e nterem imam-imam, ras kalak Lewi, bage pe kepala-kepala terpuk si nggo metua, si gelgel e nggo ngidah Rumah Pertoton si pemena, tangis dingen ngandung ngenehen palas Rumah Pertoton e nggo mulai icibalken. Tapi kalak si debanna ersurak meriah asa gangna.

13Emaka lanai tereteh apai sora kalak ersurak, apai sora kalak ngandung, erkiteken bage gejekna sora kalak ndai, seh maka terbegi i bas ingan si ndauh nari pe.


  Share Facebook  |  Share Twitter

 <<  Ezra 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran