Alkitab Mobile SABDA
[VER] : [KARO]     [PL]  [PB] 
 <<  Galatia 1 >> 

1Surat enda i bas aku nari, Paulus, si nggo idilo jadi rasul, labo erkiteken manusia ntah pe erkelang-kelangken manusia, tapi erkiteken Jesus Kristus ras Dibata Bapa si nggo mpekeke Jesus i bas si mate nari.

2Kerina senina-senina si i jenda ras aku ngataken mejuah-juah man perpulungen-perpulungen i Galati.

3Dibata Bapanta ras Tuhan Jesus Kristus mereken lias ate ras kemalemen ate man bandu.

4Guna mulahi kita i bas jaman si jahat enda nari, Kristus nggo ngendesken DiriNa erdandanken dosa-dosanta, i bas KepatuhenNa nandangi sura-sura Dibata Bapanta.

5Terpujilah Dibata seh rasa lalap! Amin.

Sada ngenca Berita Si Mehuli

6Mamang ateku ngenehen kam! Sabap pedas kal kam nadingken Ia si nggo milih kam erpalasken lias ate Kristus, jenari ikutkenndu "berita si mehuli si deban".

7Si tuhuna labo lit "berita si mehuli si deban," tapi si enda kukataken man bandu perbahan lit piga-piga kalak si ngguluti, atena nalihken Berita Si Mehuli kerna Kristus e.

8Tapi amin kami pe, ntah malekat i Surga nari, meritaken man bandu berita si mehuli si lain ras Berita Si Mehuli si nggo iberitaken kami man bandu e, kena sumpahlah ia!

9Si tuhuna si enda nggo pernah kukataken, tapi genduari kukataken sekali nari! Adi lit kalak meritaken berita si mehuli man bandu si lain ras Berita Si Mehuli si nggo ialokenndu, kena sumpahlah ia!

10Alu bage, kuarapken kin gelah aku iakui manusia? Lang! Pengakun i bas Dibata nari nge si kuarapken! Gelah ngena ate manusia kin si man daramenku? Adi e kin tujunku, labo aku suruh-suruhen Kristus.

Kerna Paulus jadi rasul

11O Senina-seninangku, kukataken man bandu maka Berita Si Mehuli si kuberitaken e labo manusia erbahanca.

12Labo kualoken i bas manusia nari; la bo ka ise pe ngajarkenca man bangku. Tapi Jesus Kristus jine nge si naksikenca man bangku.

13Nggo ibegindu kuga nai kegeluhenku selaku kalak Jahudi si tutus eragama, kuga nai aku niksa perpulungen-perpulungen Dibata alu kejam dingen kuusahaken ngkernepken ia.

14Asangken kerina teman-temanku kalak Jahudi si sebekbek ras aku, lebihen aku i bas ndalanken agama Jahudi. Tutusen ateku nandangi adat-adat si isusurken nininta asangken ia kerina.

15Tapi Dibata, i bas lias AteNa nggo milih aku ope denga aku tubuh pe, janah IdiloNa aku.

16Asum itetapken Dibata guna mpetangkas AnakNa arah aku gelah kuberitaken Berita Si Mehuli kerna AnakNa e man bangsa si la kalak Jahudi, labo aku arih-arih ras ise pe.

17Labo aku lawes ku Jerusalem guna njumpai si nggo jadi rasul leben asangken aku. Tapi minter aku lawes ku daerah Arab, jenari mulihken aku ku Damaskus.

18Kenca telu tahun maka aku ku Jerusalem gelah kutandai Petrus. Dua minggu dekahna aku ras ia.

19Ras rasul-rasul si deban la aku jumpa, seakatan Jakup senina Tuhan.

20Kai si kusuratken enda tuhu. Kukataken i lebe-lebe Dibata maka labo aku erbual!

21Kenca si e lawes aku ku daerah-daerah Siria ras Kiliki.

22Paksa si e kalak Kristen si lit i daerah Judea la nandai aku.

23Kai si ikataken kalak ngenca ietehna eme, "Si mbaru enda rusur niksa kami, genduari sangana meritaken Berita Si Mehuli kerna Kristus si nai ikernepken atena!"

24Bage me ipujina Dibata erdandanken aku.


  Share Facebook  |  Share Twitter

 <<  Galatia 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran