Dual PanelSisampat-sampatenlah i bas maba baban nggeluh
1O senina-seninangku, adi lit sekalak si terdat ersalah, kam si nggeluh rikutken Kesah Si Badia arus min negu ia alu manjar-anjar gelah mulihken ia ku dalan si mehuli. Janah jagalah dirindu sekalak-sekalak sabap kam pe banci ka nge kena percuban.
2Sisampat-sampatenlah kam i bas maba baban geluh enda. Alu bage isehkenndu kap Undang-undang Kristus.
3Adi lit kalak erpengakap maka ia mehaga, tapi kai pe si lang, itipuna me bana.
4Sekalak-sekalak arus nguji lagu langkahna jine. Alu bage banci megah kerna dirina jine alu la mbanding-mbandingken dirina ras kalak si deban.
5Sabap sekalak-sekalak simaba babanna nge.
6Kalak si ngaloken pengajaren Kristus arus iraskenna kerina si mehuli si lit i bas ia ras guruna.
7Ula tipu bandu; ise pe labo ngasup nokohi Dibata. Si isuan manusia e ka nge iperanina.
8Adi merdang kalak i bas juma perukuren secara manusia, iperanina, me ulihna si la banci la macik i bas juma perukurenna e nari. Adi nuan ia i bas juma Kesah Si Badia, iperanina me kegeluhen si rasa lalap i bas Kesah Si Badia e nari.
9Emaka ula min kita erleja-leja erbahan si mehuli; sabap adi tetap tutus ateta ndalanken si e, seh me paksana siperani ulihna.
10Emaka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken.
Kata pertenget dingen salam
11Nehenlah kuga belinna tulisenku enda si kusuratken alu tanku jine!
12Kalak si peganjang-ganjangken bana janah si megah akapna kerna barang-barang si arah darat, ia me si ersura-sura maksa kam gelah isunatken. Si enda idalankenna gelah ula ia iayak-ayak erdandanken kayu persilang Kristus.
13Sabap kalak si nunatken pe la ndalanken Undang-undang. Ersura-sura ia nunatken kam gelah megah iakapna erdandanken patuh kam man adat e.
14Adi aku, kerna kayu persilang Tuhanta Jesus Kristus e ngenca kuakap megah. Sabap erdandanken kayu persilang e, doni enda nggo kuakap mate, janah aku pe nggo mate iakap doni enda.
15Emaka lanai jadi soal sekalak isunatken ntah lang. Si pentingna eme gelah kalak jadi tinepa si mbaru.
16Janah man kalak si patuh nandangi cara si enda, kupindoken man Dibata gelah ibereken Dibata man bana kemalemen ate ras perkuah ate bage pe man kerina Israel Dibata.
17Si perpudina, ulanai min ise pe nuhsahi aku, sabap i bas kulangku lit cining-cining si nuduhken maka aku juak-juak Jesus.
18Lias ate Tuhanta Jesus Kristus ras kam kerina min o senina-senina. Amin.