Alkitab Mobile SABDA
[VER] : [KARO]     [PL]  [PB] 
 <<  Habakuk 1 >> 

1Enda me berita si ipetangkas TUHAN man Nabi Habakuk arah pengenehenen.

Habakuk jungut-jungut ngidah kelabujuren

2Nggo ndekah aku erlebuh mindo penampat man BaNdu TUHAN, tapi uga maka lalap la IbegikenNdu? Nderkuh aku man BaNdu, tapi uga maka la IpulahiNdu kami i bas kejahaten kalak e nari? Asa kai kin dekahna aku arus erlebuh man BaNdu?

3Ngkai maka IpediatNdu kuidah kejahaten? Uga maka ngasup Kam natap-natap kelepaken si bage kelekna? Encedai, sigegeh-gegeh kerina i sekelewetku; perubaten ras perjengilen i japa pe.

4Undang-undang la ergegeh, la erguna, janah keadilen la pernah idalanken. Ketamburen kalak bujur ibahan kalak jahat, emaka keadilen nggo iputar-balikken.

Jabap i bas TUHAN nari

5Kenca bage ikataken TUHAN man BangsaNa, "Pernehenlah bangsa-bangsa sekelewetndu, janah perdiatekenlah, tentu sengget kam pagi erkiteken kai si iidahndu. AteKu ngelakoken sada perbahanen si rejin seh maka la kam tek adi ibegindu e.

6Kupekeke me bangsa Babilon jadi si erkuasa, bangsa si merawa dingen la banci kem. Isiarna me ku belang-belang doni enda naluken negeri-negeri si deban.

7Ku ja pe ia lawes gentar janah mbiar kalak kerina. Alu meganjang ukur ia nentuken undang-undang bagi ate-atena.

8Kudana pedasen kiam asa arimo, rawan asa serigala. Si ngersaksa rehen i negeri-negeri si ndauh nari, ngerattuh i babo taneh. Pedas-pedas ia reh, desken rajawali nangkis panganna.

9Tenterana reh engkuasai alu gegehna, janah kerina kalak mbiar tupung ideherina. Tabanen si ibuatna bali buena ras kersik.

10Raja-raja igombang-gombangina, dingen kalak si erpangkat meganjang iuru-uruna. La lit benteng si banci ngambatisa -- ipegun-gunna taneh jenari irebutna benteng e.

11Kenca bage mentas ia desken angin kaba-kaba jenari terus lawes. Bage me bangsa e, si erdibataken gegehna jine."

Jungut-jungut ka Habakuk man TUHAN

12TUHAN, bena-benana nari pe Kam kap Dibata. Kam kap Dibatangku si Badia si tetap asa lalap. O TUHAN, Dibatangku ras si kawalku, nggo IpilihNdu bangsa Babilon janah IbahanNdu ia jadi megegeh gelah banci iukumna kami.

13Tapi uga maka tahan Kam ngidah kalak penipu dingen jahat enda? Si tuhuna MataNdu si badia labo ngasup ngidah kejahaten, janah labo TernehenNdu kalak si ngelakoken kesalahen. Dage ngkai maka Kam sinik saja tupung ikernepkenna bangsa si bujuren asangken ia?

14Kuga maka bagi nurung tempa PerbanNdu manusia e tah pe bagi perkis si la erpengulu?

15Kalak Babilon e nangkap jelma alu kawil, tempa-tempa nurung manusia e. Isaren-sarenna kalak tare jalana, janah ersurak kal ia alu meriah ngidah kalak si kena jalana.

16Terlebih-lebih ka pe isembahna kap jalana e janah ipersembahkenna persembahen man bana, erkite-kiteken jalana e mereken kebayaken ras rejeki ertambah-tambah man bana.

17Rasa lalap kin ia make pedangna e dingen la erngadi-ngadi ngkernepken bangsa-bangsa alu la meteh mekuah?


  Share Facebook  |  Share Twitter

 <<  Habakuk 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran