Dual PanelTubuh si Simson
1Bangsa Israel erdosa ka man TUHAN, emaka IpelepasNa bangsa Pilisti ngkuasai bangsa Israel empat puluh tahun dekahna.
2I bas paksa e lit sekalak dilaki i kota Sora, Manoah gelarna. Ia i bas suku Dan nari. Ndeharana la banci mupus.
3Sekali jadi malekat TUHAN ncidcahken bana man diberu e, janah nina, "La kam pernah mupus, tapi lanai ndekah nari mehuli kulandu, ipupusndu sekalak anak dilaki.
4Tengeti maka ula kam minem anggur ntah bir, ula pan pangan pantangen.
5Janah kenca tubuh anak e, la banci iguntingndu bukna, sabap tangtang tubuhna nari anak e nggo iendesken man Dibata jadi kalak Nasir. Ia pagi mulahi Israel i bas bangsa Pilisti nari."
6Emaka lawes diberu e ikatakenna man perbulangenna, nina, "Sekalak jelma i bas Dibata nari nggo njumpai aku, janah potongenna bali ras malekat Dibata si man kebiarenken. La kusungkun i ja nari ia reh, janah la ikatakenna gelarna man bangku.
7Tapi ikatakenna man bangku maka mehuli me kulangku gelah kupupus sekalak anak dilaki. Ikatakenna man bangku maka ula aku minem anggur ntah bir, ntah man pangan pantangen, erkiteken anak e iendesken ku Dibata jadi Nasir gedang geluhna."
8Emaka ertoto Manoah ku TUHAN nina, "O, TUHAN. Suruh mulihken jelma i bas Dibata nari e ku kami nuriken kai arus ibahan kami kenca tubuh anak e."
9Ibegiken TUHAN pemindon Manoah, emaka mulihken malekat ndai ku diberu e sanga ia kundul i juma. Perbulangenna Manoah la ras ia i je,
10emaka minter ia kiam janah ikatakenna man perbulangenna nina, "Nen me! Dilaki si reh man bangku i bas wari si nggo lepas icidahkenna bana tole man bangku."
11Keke Manoah emaka ikutkenna ndeharana. Idahina dilaki e jenari isungkunna nina, "Kam kin dilaki si mbarenda ngerana man ndeharangku?" "Ue," nina njabapsa.
12Emaka isungkun Manoah ka nina, "Adi nggo pagi seh si ikatakenndu e, kai arus ilakoken anak e? Kuga pagi kegeluhenna?"
13Nina Malekat e njabapsa, "Arus maka inget ndeharandu tuhu-tuhu ngikutken kerina si nggo kukataken man bana.
14La banci ipanna kai pe si rehna i bas batang anggur nari; la banci iinemna anggur ntah bir; la banci ipanna pangan si ipantangken. Arus ilakokenna kerina si nggo kukataken man bana."
15La ieteh Manoah maka malekat TUHAN kap e. Emaka nina man bana "Ula kam lawes lebe. Gelah kutasakken kambing nguda man bandu." Tapi nina malekat e, "Aminna pe aku langa lawes, labo banci kupan pangandu. Tapi adi atendu nikapkenca, tutunglah e jadi persembahen man TUHAN."
16(Hak 13:15)
17Nina Manoah, "Kataken man kami ise gelarndu, gelah ieteh kami pehaga kam kenca seh katandu e."
18Nungkun malekat e nina, "Ngkai maka merincuh kam meteh gelarku? Gelarku gelar si mejin kap."
19Kenca bage ibuat Manoah sada kambing nguda ipersembahkenna i babo batar-batar batu man TUHAN si ngelakoken perbahanen si mejin.
20Sanga nangkih gebuk api e i bas batar-batar nari, Manoah ras ndeharana ngidah malekat TUHAN nangkih ku surga arah gebuk api e. Kenca bage ieteh Manoah maka jelma e malekat TUHAN kap. Emaka ia ras ndeharana nembah, ayona seh ku taneh. Kenca si e lanai pernah idahna malekat TUHAN e.
21(Hak 13:20)
22Nina Manoah man ndeharana, "Ugapa pe kita mate, erkiteken nggo siidah Dibata!"
23Tapi nina ndeharana njabapsa, "Adi ibunuh TUHAN kin AteNa kita, labo IcidahkenNa enda kerina ras labo IturikenNa perkara-perkara enda kerina man banta i bas paksa enda."
24Ipupus diberu e sekalak anak dilaki emaka Simson ibahanna gelarna. Anak e reh belinna janah ipasu-pasu TUHAN ia.
25Emaka kuasa TUHAN mulai pegehi ia sanga ia i kelang-kelang Sorah ras Estaol i bas perkemahen Dan.