Dual PanelIsrael ersikap erperang
1Kerina bangsa Israel mulai i bas daerah Dan i Utara nari seh ku Berseba i Selatan, bage pe i Gileat nari arah Barat njabap pendilo e. Ersada ia kerina ngadap TUHAN i Mispa.
2Kerina peminpin suku Israel reh ku perpulungen bangsa Dibata enda janah tentera si erdalan nahe lit 400.000 kalak teremna.
3Paksa e nggo ibegi kalak Benyamin maka kerina bangsa Israel si debanna nggo pulung i Mispa. Nina bangsa Israel nungkun, "Turiken uga kejahaten e jadi."
4Emaka ngerana kalak Lewi si ndeharana nggo mate ibunuh ndai Nina "Ndeharangku ras aku erdalan ku Gibea erberngi i daerah suku Benyamin e.
5Dilaki-dilaki i kota Gibea reh ngelawan aku, ikepungna rumah e berngi-berngi. Ibunuhna atena aku, tapi iperkosana ndeharangku emaka mate ia.
6Kubuat ndeharangku e, kukeret-keret emaka kubereken sada ngkeret man tiap suku Israel si sepulu dua. Kalak Benyamin e nggo erbahan si jahat ras njuruken man banta kerina.
7Kerina kita bangsa Israel si pulung i jenda, kai arus si bahan kerna si e?"
8Kerina bangsa e tedis ras-ras emaka nina, "Sada pe kita ula mulih ku kutana subuk si ringan i kemah ntah rumah.
9Bagendalah si bahan: si bahan tikam tanduk milih piga kalak nerang Gibea.
10Sepersepuluhna i bas bangsa Israel nikapken pangan man tentera e, janah si debanna lawes ngukum Gibea kerna perbahanenna si jahat si nggo ilakokenna i Israel."
11Bage me kerina dilaki-dilaki i Israel ersada guna sada tujun, eme nerang kuta e.
12Isuruh suku-suku bangsa Israel persuruhen ku kerina daerah suku Benyamin ngatakenca, "Kejahaten kai si nggo ibahanndu e?
13Genduari endeskenlah kalak jahat Gibea ndai, gelah ibunuh kami maka masap si jahat e i bas Israel nari." Tapi la diate suku Benyamin pe suku-suku Israel si deban.
14Emaka i bas kota-kota suku Benyamin si deban nari pe rehen kerina ku Gibea ngelawan suku-suku Israel si deban.
15I bas wari e ipepulungna i bas kota-kota suku Benyamin si deban nari lit buena dua pulu enem ribu tentera. Tambah si e, ipepulung kalak Gibea tentera pilihen pitu ratus kalak jaluk. Tiap kalak ngasup ngkalibawangi selambar buk alu batu, janah la nggo la kena.
16(Hak 20:15)
17Suku Israel si deban ipepulung lit buena empat ratus ribu tentera.
Perang ngelawan suku Benyamin
18Bangsa Israel lawes ku ingan ersembah i Betel, janah i jah isungkunna Dibata nina, "Suku si apai lebe ngelawan suku Benyamin?" Nina TUHAN erjabap, "Suku Juda."
19Emaka lampas erpagi-pagi mulai erdalan bangsa Israel kenca bage ibahanna perkemahen i deher kota Gibea.
20Iperangna tentera suku Benyamin, iaturna tenterana erbaris petala-tala ras Gibea.
21Ndarat tentera Benyamin i bas kota e nari janah ope denga ben wari, nggo ibunuhna dua pulu dua ribu tentera Israel.
22Emaka lawes bangsa Israel ku ingan ersembah. Kenca bage ngandung ia i adep-adepen TUHAN seh ben. Nina nungkun TUHAN, "Arus denga kin kami lawes ku peperangen ngelawan senina kami suku Benyamin?" Nina TUHAN erjabap, "Ue, laweslah." Emaka nggo gedang ate tentera Israel. Kenca bage iaturna barisen tenterana i bas ingan si nderbih ka.
23(Hak 20:22)
24Tentera Israel maju ka pedua kaliken ngelawan suku Benyamin.
25Emaka pedua kaliken suku Benyamin ndarat i Gibea nari, janah i bas paksa si e ibunuhna sepulu waluh ribu tentera Israel si terpilih.
26Jenari kerina bangsa Israel lawes ngandung ku Betel. Kundul ia i adep-adepen TUHAN janah la man seh ben. Ipersembahkenna persembahen persadan ras persembahen tutungen i adep-adepen TUHAN.
27Peti Perpadanen Dibata lit i Betel i bas paksa si e, janah Pinehas anak Eleasar kempu Harun si ertugas jadi imam. Bangsa e nungkun man TUHAN nina, "Arus denga kin kami lawes ngelawan senina kami suku Benyamin ntah lang?" Nina TUHAN njabapsa, "Lawan. Pagi Kubereken kemenangen man bandu."
28(Hak 20:27)
29Emaka itama bangsa Israel tenterana cebuni sekelewet Gibea.
30Kenca bage, petelu kaliken bangsa Israel maju ngelawan tentera suku Benyamin, iaturkenna tenterana petala-tala ras Gibea bagi si bahanna ope si e.
31Ndarat suku Benyamin, janah la iarapna nggo ndauh ia sirang ras kota e. Bagi si nggona mulai ibunuhna piga-piga kalak Israel i daerah si salang arah dalan ku Betel ras Gibea. Ibunuhna kira-kira telu puluh kalak Israel.
32Nina suku Benyamin, "Nggo talu sibahan ia bagi si nggona." Tapi irencanaken kalak Israel mundur, gelah mabai kalak Benyamin e reh ku dalan-dalan dingen ndauh sirang ras kota e.
33Asum bagin tentera Israel mundur janah ipepulungna bana mulihi i Baaltamar, kalak Israel si i sekelewet Gibea rempet ndarat i bas inganna cebuni i daerah si erbatu-batu i kelewet kota pertempuren e.
34Kalak ndai pilihen i bas belang-belang Israel, teremna lit sepuluh ribu kalak. Emaka asum si 10.000 kalak e nerang Gibea, jadi me pertempuren si mesangat. Sitik pe la isangka kalak Benyamin maka kentisik nari talu me ia.
35Ibereken TUHAN kemenangen man Israel ngelawan tentera Benyamin. Ibunuh Israel 25.100 kalak tentera suku Benyamin i bas wari e;
36emaka ieteh suku Benyamin ia nggo talu.
Dalanna maka kalak Israel menang
Sada bagin tentera Israel mundur i suku Benyamin nari, erkiteken tek ia man tentera si cebuni i sekelewet Gibea.
37Tentera si cebuni e pedas-pedas kiam ku Gibea, merap ia ku kota e, emaka ibunuhina kerina si lit i je.
38Tentera Israel ras kalak si cebuni ndai nggo lit arihna erbahan tanda. Kenca idahna asap erdipul ku das i bas kota e nari,
39kalak Israel si erperang i darat erkusur mulihken. Tupung si e suku Benyamin e nggo munuh telu puluh kalak Israel. Nina i bas ukurna, "Nggo talu kalak ah sibahan bagi si nggona."
40Kenca bage teridah me tanda ndai, gebuk api mulai nangkih i bas kota e nari. Suku Benyamin nulih ku pudi janah sengget ngidah kota e nggo keri ipan api.
41Kenca bage bangsa Israel mulihken ngelawan, emaka nggo gugup suku Benyamin, sabap ietehna maka nandangi kernep me ia.
42Mundur ia i bas kalak Israel e nari, kiam ku ingan si salang, tapi lanai banci pulah. Nggo terkepung ia kelang-kelang tentera Israel ras kalak si ndarat i bas kota e nari, kenca bage ikernepken ia.
43Nggo isidingi Israel musuhna emaka iayakina musuh e seh i Timur Gibea, ibunuhina gedang-gedang dalan.
44Lit sepulu waluh ribu kalak tentera suku Benyamin si mbisana mate.
45Si debanna mulihken janah kiam ku daerah si salang, ku deleng batu i Rimon. Lit lima ribu kalak ibunuh i bas dalan e. Si lebihna iayak tentera Israel terus ku Gidom, ibunuhna dua ribu kalak.
46Kerina, lit dua pulu lima ribu suku Benyamin ibunuh i bas wari e, janah kerina si mate e tentera si mbisa.
47Tapi lit 600 kalak si pulah ku daerah si mesawang ku deleng batu i Rimon, emaka i jah ia tading empat bulan dekahna.
48Tapi Israel mulihken ngelawan janah munuhi suku Benyamin, dilaki ras diberu, anak-anak ras asuh-asuhen. Icilukna tiap kota i bas daerah e.