Kekelengen Dibata man BangsaNa
1Nina TUHAN, Tupung Israel danak-danak denga ngena kal ateKu ia. Emaka Kudilo ia i Mesir nari, bali ras anakKu si dilaki.
2Tapi reh katepna ia Kulebuhi, reh dauhna ia nilah i bas Aku nari. BangsangKu nembah man Baal selaku dibatana itutungna kumenen man berhala-berhala
3Situhuna si ngajari Israel erdalan, eme Aku, dingen Aku ka nge si ngangkip-ngangkip bangsangKu. Tapi la kepeken iakuina maka Aku nge si ngarak-ngarak ia.
4Salu lias ate dingen kekelengen ia Kutegu-tegu, Kuangkip, jenari Kupedeher ia ku pipingKu Tungkuk Aku, jenari Kusulangi ia.
5La ia nggit mulih ku Aku, emaka la banci lang mulih me ia ku Mesir, dingen Assur ngkuasai ia.
6Perang pecah i bas kerina kota-kotana, ngerontasken pintu-pintu gerbang kota. Perang e engkeriken bangsangKu, perban ilakokenna kai akapna si mehuli.
7Megekgek kal ia nilah i bas Aku nari. Emaka nderkuh me ia erkiteken pasangen si man babanna, tapi la lit ise pe si ngangkatca i bas ia nari.
8Kuga banci Aku nirangken kam, o Israel? Kuga banci Aku nadingken kam? Banci kin kam Kukernepken bagi si Kubahan man Adma, tah pe bagi si Kulakoken man Seboim? PusuhKu erkusur maka ula ngelakoken si e sabap kekelengenKu man bandu seh kal belinna.
9Pernembeh ateKu la Kusehken, Israel lanai pernah Kukernepken. Sabap Aku Dibata, labo manusia. Aku itengah-tengahndu, Aku si Badia. Labo i bas pernembeh ateKu Aku reh man bandu.
10"Iikutken bangsangKu me pagi Aku kenca Aku erdengum bagi singa kempak musuh-musuhna. Pedas-pedas me ia reh i Barat nari.
11Reh ia i Mesir nari bali pedasna ras perkabang perik, bage pe i Assur nari desken merpati. Kubaba ia mulih ku rumahna. Aku, TUHAN, nggo melasken katangKu."
Israel ras Juda iukum
12Nina TUHAN, "Kalak Israel nggo engkeleweti Aku alu guak ras tipu, dingen kalak Juda tetap denga ngelawan Aku, Dibata si setia dingen Badia.