Alkitab Mobile SABDA
[VER] : [KARO]     [PL]  [PB] 
 <<  Hosea 4 >> 

Kesalahen Israel ras ukumen TUHAN

1Lit pengadun TUHAN nandangi bangsa si ringan i negeri enda. Begiken o Israel, kai si IkatakenNa, "La lit kesetian ras kekelengen i bas negeri e, janah bangsa e la ngakui Aku selaku Dibata.

2Erpadan ia, jenari ilanggarna padanna; erguak ia, munuh, nangko ras erlua-lua. Kejahaten ertambah-tambah, munuh la erngadi-ngadi.

3Erdandanken si e kerah me taneh e, janah kerina si ringan i je mate. Kerina perik-perik ras rubia-rubia si debanna, bage pe nurung, mate kerina."

TUHAN nalahken imam-imam

4Nina TUHAN, "Ula ise pe nalahken tah mandangi rayat, sabap si Kusalahken eme kam, o imam-imam.

5Subuk suari, bage pe berngi jongkang kam; janah nabi-nabi pe bage ka. Emaka Kukernepken me Israel, nandendu e.

6Masap me bangsangKu erkiteken la Aku iakuina. Kam imam-imam la nggit ngakui Aku janah itulakndu pengajarenKu. Erkiteken si e Kutulak kam janah anak-anakndu la Kuakui jadi imam-imamKu.

7Reh teremna kam jadi imam, reh buena ka dosandu man bangKu, erkiteken si e Kusalihken me dolatndu jadi si man kemelanken.

8Kam jadi bayak arah dosa-dosa bangsangKu, emaka ulin akapndu ia tetap erbahan dosa.

9Emaka bali nge ukumenndu ras jelma si nterem. Kuukum me kam selaku balasen nandangi kejahatenndu.

10Ipanndu me si jadi baginndu i bas persembahen e, tapi melihe denga kam lalap. Isembahndu dibata-dibata alu erlua-lua, tapi lalap kam la mupus, sabap nggo itadingkenndu Aku gelah erlua-lua ras dibata-dibata si deban."

TUHAN numpahi agama perbegu

11Nina TUHAN, "Anggur si ndekah ras si mbaru, mahanca bene ukur bangsangKu.

12Nungkun ia man sengkeret kayu! Ciken nuri-nuri man bana kerna kai si isungkunna. Nggo itadingkenna Aku. Bali ras sekalak diberu perlua-lua, bage me ia nggo ngendesken dirina man dibata-dibata si deban.

13I das deleng-deleng keramat ipersembahkenna persembahen, janah i das uruk-uruk itutungna kumenen i teruh kayu galang si merabun, sabap senang kal cilinggem i teruhna. Em sabapna maka anakndu si diberu pencarinna erlua-lua, janah permainndu erlagu la mehuli.

14Amin bage pe la ia Kuukum erkiteken si e, sabap kam jine pe lawes ras diberu-diberu perlua-lua si erdahin i bas rumah persembahen kalak perbegu, janah ras-ras kam mpersembahken persembahen. Bagi kata kuan-kuan: 'Bangsa si la erpengertin bene me.'

15Aminna pe kam, o Israel, la setia man bangKu, mbera-mbera Juda ula ngelakoken kesalahen si bage. Ula kam ersembah i Gilgal tah pe i Bet-Awen, tah pe ersumpah i je i bas gelar TUHAN si nggeluh.

16Bangsa Israel bali kengna ras lembu si meliar. Kuga banci Kubere nakan ia bagi biri-biri i bas mbalmbal?

17Kalak Israel nggo teriket man gana-gana; emaka pelepaslah ia rate-ate.

18Kenca mbue minem anggur, meriah iakapna i bas dahinna erlua-lua; ngenan atena kemelan asangken kehagan.

19Emaka mistak me ia desken ikabangken angin, janah mela akapna erkiteken nembah man dibata-dibata si deban.


  Share Facebook  |  Share Twitter

 <<  Hosea 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel