Dual PanelPeraturen man diberu kenca dung mupus
1Ibereken TUHAN man Musa peraturen-peraturen enda
2guna bangsa Israel. Adi sekalak pernanden mupus anak dilaki, diberu ndai la bersih pitu wari rikutken aturen agama, bali ras sanga nguda bulanna.
3Pewaluh wariken, anak ndai arus isunatken.
4Kenca bage telu pulu telu wari nari diberu ndai la bersih rikutken peraturen agama, seh darehna si ndarat nggo ngadi; sanga bage la banci ia ngkuit asa kai barang-barang si badia. Mengketi Kemah si badia pe ia la banci seh paksana ia nggo bersih rikutken aturen agama.
5Adi sekalak diberu mupus anak diberu, ia la bersih sepulu empat wari rikutken aturen agama bali ras sanga nguda bulanna. Kenca bage enem pulu enem wari nari diberu e la bersih rikutken aturen agama, seh darehna si ndarat nggo ngadi.
6Kenca nggo seh paksana maka ia nggo bersih, subuk erkiteken mupus anak dilaki, ntah erkiteken mupus anak diberu, ibabana lah man imam ku pintun Kemah Perjumpan, sada biri-biri umur sada tahun man persembahen tutungen, ras sada ndukur ntah nderapati man persembahen pengalemi dosa.
7Imam mpersembahken persembahen diberu ndai man TUHAN ras ngelakoken pembersihen guna diberu ndai; kenca bage maka diberu ndai nggo bersih rikutken aturen agama. Enda me dage kai si arus ilakoken sekalak diberu kenca ia mupus.
8Adi diberu e la ngasup ngelitken biri-biri, babana lah dua ndukur ntah dua nderapati, sada man persembahen tutungen sada nari man persembahen nasapken dosa. Imam arus ngelakoken lakon pembersihen man diberu ndai. Kenca bage maka nggo bersih diberu ndai rikutken aturen agama.