Alkitab Mobile SABDA
[VER] : [KARO]     [PL]  [PB] 
 <<  Imamat 21 >> 

Kebadian Imam-imam

1Iperentahken TUHAN man Musa gelah ikatakenna man imam-imam kesusuren Harun, "Sekalak imam la banci ibahanna bana jadi la bersih alu ngikutken upacara penguburen keluargana,

2pala si mate e nandena, bapana, anakna si dilaki ntah si diberu, seninana,

3ntah turangna si langa erjabu si ringan ras ia.

4Ula ibahanna bana la bersih erkiteken kematen kalak si jadi keluargana arah perjabun.

5Imam la banci ncukur buk takalna ntah nggunting ujung janggutna, ntah ngelukai badanna tanda ate ceda.

6Arus maka ia badia, la banci ijurukenna gelarKu. Ia mpersembahken persembahen pangan man bangKu, emaka arus ia badia.

7Sekalak imam la banci ngempoi diberu si gelgel nari pendahinna erlua-lua ntah diberu si lanai singuda-nguda, ntah diberu si nggo mulih i bas perpulungenna nari. Imam badia kap.

8Sekalak imam arus maka badia iakap jelma si nterem, erkiteken ia mpersembahken persembahen pangan man bangKu. Aku kap TUHAN. Aku badia, aku pe erbanca maka bangsangKu badia.

9Adi anak imam pendahinna erlua-lua, anak ndai njuruken bapana; emaka arus ia itutung ngayak mate.

10Imam si Mbelin si nggo itangkuhken alu ncurcurken minak ku takalna dingen makeken paken imam man bana, emaka la banci la sikap isurina bukna, dingen la banci icaingkenna uisna guna ncidahken maka i sangana rate ceda.

11Ia nggo iendesken man bangKu, emaka la banci la bersih ibahanna man bana. Bage pe la banci itadingkenna KemahKu, jenari bengket ku rumah i ja lit kalak mate, amin pe si mate e bapana ntah nandena, sabap perbahanen si bage ncemarken kebadian KemahKu.

12(Im 21:11)

13Iempoina lah sekalak singuda-nguda si langa keliamen.

14La banci iempoina diberu si nggo mbalu, ntah diberu si nggo mulih i bas perbulangenna nari ntah pe diberu si gelgel nari pendahinna erlua-lua. Singuda-nguda si sada suku ras ia ngenca banci iempoina.

15Adi lang, anak-anakna, si arusna kin badia, jadi kalak si la bersih. Aku kap TUHAN, janah nggo Kuserapken ia jadi Imam si Mbelin."

16Iperentahken TUHAN man Musa

17gelah ikatakenna man Harun, bagenda, "Anakndu si cacat la banci mpersembahken persembahen pangan man bangKu. Peraturen enda arus ipake seh rasa lalap.

18Kalak cacat la banci ngelakoken dahin persembahen, eme: kalak pentang, kalak cempang, cacat ayona ntah badanna,

19kalak si mate tanna ntah nahena,

20kalak mbengkung, kalak kertang kertut, kalak si lit penakit matana ntah penakit kulitna, ntah pe kalak si nggo ikebiri.

21Kasa kai kesusuren Imam Harun si lit cacat badanna, la banci mpersembahken persembahen pangan man bangKu.

22Tapi kalak si bage banci ipanna pangan si nggo ipersembahken man bangKu, subuk persembahen pangan si badia ntah pe persembahen pangan si seh kal badiana.

23Tapi erkiteken cacatna, la banci ideherina kire-kire si badia e; la banci pe ideherina batar-batar persembahen. La banci icemarkenna kebadian barang-barang si badia e, sabap Aku kap TUHAN, janah nggo Kupebadiaken ingan e."

24Enda me si ikataken Musa man Harun ras man anakna ras man kerina bangsa Israel.


  Share Facebook  |  Share Twitter

 <<  Imamat 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel