Alkitab Mobile SABDA
[VER] : [KARO]     [PL]  [PB] 
 <<  Kejadian 25 >> 

Kesusuren Abraham si deban (1Taw 1:32-33)

1Iempoi Abraham ka diberu si deban, Ketura gelarna.

2Arah perjabunna e tubuh si: Simran, Joksan, Medan, Midian, Isbak, ras Suah.

3Joksan eme Bapa Syeba ras Dedan, janah kesusuren Dedan eme bangsa Ashur, Letus, Leum.

4Anak Midian eme: Epa, Eper, Henoh, Abida, ras Eldaa. Enda me kerina kesusuren si Ketura.

5Kerina erta-erta Abraham itadingkenna man Isak,

6tapi sanga ia nggeluh denga iberekenna erta-erta man anak-anakna si dilaki si tubuh arah ndeharana si deban. Kenca bage isuruhna kerina anak-anakna e kempak negeri Timur ndauh i bas anakna Isak nari.

Kematen ras penguburen Abraham

7Abraham mate kenca ia nggo metua kal, i bas umur 175 tahun.

8(Kej 25:7)

9Ia ikuburken anakna Isak ras Ismael i gua Mahpela, i juma si Epron anak Sohar kalak Heti e, arah Timur Mamre.

10Juma e, eme si nggo itukur Abraham i bas kalak Heti e nari. I je me Abraham ras ndeharana Sara ikuburken.

11Kenca nggo mate Abraham, ipasu-pasu Dibata me anakna Isak, si ringan deherken "Sumur Dibata si nggeluh si mperdiateken aku".

Kesusuren Ismael (1Taw 1:28-31)

12Enda me gelar-gelar kesusuren Ismael anak Abraham, si ipupus Hagar, kalak Mesir, budak Sara e.

13Gelar-gelar anakna e isuratken mulai i bas sintua nari: Nebayot, Kedar, Adbeel, Mipsam,

14Misma, Duma, Masa,

15Hadat, Tema, Jetur, Napis, ras Kedma.

16Kalak enda me nini sepulu dua suku, janah gelar-gelar kalak enda nggo ipake jadi gelar kuta ras gelar ingan-ingan erkemah.

17Sanga Ismael mate umurna 137 tahun.

18Kesusuren Ismael ringan kelang-kelang Hawila ras Sur, arah Timur Mesir, i bas dalan ku Assur. Kalak enda ndauh sirang ras kesusuren Abraham si deban.

Ketubuhen Esau ras Jakup

19Enda me turi-turin kerna Isak anak Abraham.

20Umur Isak nggo empat puluh tahun tupung ia erjabu ras Ribka. Ribka eme anak Betuil turang Laban. Betuil eme kalak Aram i Mesopotami nari.

21Erkiteken langa lit anak Ribka, ertoto Isak man TUHAN kerna ia. Ibegiken TUHAN pertotonna, emaka mehuli me kula Ribka.

22Kepeken anak si nandangi ipupusna e rindu, janah ope denga anak e tubuh si lawanen ia duana i bas bertin nandena. Nina Ribka, "Ngkai maka jadi bagenda i bas aku?" Erkiteken si e lawes ia nungkun man TUHAN.

23Nina TUHAN man bana, "Lit dua bangsa i bas bertinndu nandangi ipupusndu me dua bangsa si ermusuhen gegehen agina asa kakana sintua jadi suruh-suruhen singuda."

24Seh me paksana Ribka mupus, ipupusna anak dilaki rindu.

25Sintua megara-gara rupana, kulitna bagi jubah si ermbulu. Emaka ibahan gelarna Esau.

26Sanga tubuh singuda icikepna nteguh kal tukul-tukul Esau. Emaka ibahan gelarna Jakup. Umur Isak nggo 60 tahun sanga kalak enda tubuh.

Idayaken Esau hakna selaku anak sintua

27Duana anak e reh belinna. Esau jadi perburu si beluh, janah riahen akapna tading i bas kerangen. Tapi Jakup, biak persinik, dekahen tading i rumah.

28Adi si Isak ngenan atena Esau erkiteken ntabeh akapna man bekas Esau erburu, tapi Ribka ngenan ka atena Jakup.

29I bas sada wari sanga itasakken Jakup sitik kacang megara, Esau mulih i bas erburu nari. Melihe kal ia,

30emaka nina man Jakup, "Melihe kal aku; enta sitik pangan si megara-gara ena." (Em sabapna maka igelari ia Edom.)

31Nina Jakup njabapsa, "Banci kubereken, adi iberekenndu bangku hakndu selaku anak sintua."

32Nina Esau, "Bage-bage! Mate me atena aku, kai gunana aku anak sintua?"

33Nina Jakup, "Ersumpah dage kam lebe maka iberekenndu hak kinituanndu man bangku." Emaka ersumpah Esau, iberekenna hak kinituanna man Jakup.

34Kenca bage maka ibereken Jakup man bana roti ras kuah kacang megara e. Minter ia man ras minem, jenari lawes ia. Bage me si Esau, la kal akapna meherga kinituanna.


  Share Facebook  |  Share Twitter

 <<  Kejadian 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel