Alkitab Mobile SABDA
[VER] : [KARO]     [PL]  [PB] 
 <<  Kejadian 30 >> 

1Tapi Rahel lalap la lit pupusna; emaka cian atena man kakana. Erkiteken si e nina man Jakup, "Berekenlah man bangku anak. Adi lang mate aku."

2Merawa ate Jakup man Rahel, janah nina, "Labo kap aku Dibata. Ia nge si erbahanca kam la mupus."

3Nina Rahel, "Enda kap suruh-suruhenku Bilha; ras kam medem, gelah banci ipupusna anak man bangku. Alu bage banci aku jadi pernanden arah ia."

4Emaka ibereken Rahel me si Bilha man perbulangenna, jenari ersada kula Jakup ras Bilha.

5Mehuli kula Bilha, emaka ipupusna sekalak anak dilaki man Jakup.

6Nina Rahel, "Nggo ibenarken Dibata aku. Nggo IbegikenNa pertotonku, janah IberekenNa man bangku sada anak dilaki." Emaka ibanna gelar anak e Dan.

7Mehuli ka kula Bilha, tubuh ka anakna dilaki peduaken.

8Nina Rahel, "Nggo kupekeri gegehku erjuang ngelawan kakangku, janah aku nggo menang." Emaka ibanna gelarna Naptali.

9Kenca nggo iteh Lea maka ia nggo ngadi mupus emaka iberekenna suruh-suruhenna Silpa jadi ndehara Jakup.

10Kenca bage ipupus Silpa sekalak anak dilaki.

11Nina Lea, "Mehuli nasipku." Emaka ibanna gelar anak e Gat.

12Ipupus Silpa ka anak dilaki si deban.

13Emaka nina Lea, "Oh riahna kuakap. Genduari kerina diberu ngataken meriah kuakap." Emaka ibanna gelar anak e Aser.

14Sanga paksa rani, erdalan-dalan me Ruben i bas juma, idatsa buah dudaim. Kenca e iberekenna man nandena Lea. Nina Rahel man Lea, "Enta sitik buah dudaim si idat anakndu ndai."

15Nina Lea njabapsa, "La kin bias nggo ibuatndu perbulangenku? Genduari ibuatndu ka atendu buah dudaim anakku?" Nina Rahel, "Adi iberendu aku buah dudaim anakndu, banci kam medem ras Jakup berngi enda."

16Kenca mulih Jakup i juma nari karaben, ialo-alo Lea ia nina, "Ras kita medem berngi enda perban nggo kugalari kerna si e alu buah dudaim anakku." Emaka medem Jakup ras Lea berngi e, ersada kula ia.

17Ijabap Dibata pertoton Lea, emaka mehuli kulana, i jenari ipupusna anakna si pelimaken.

18Nina Lea, "Nggo ibereken Dibata upahku, erkiteken nggo kubereken suruh-suruhenku Silpa man perbulangenku." Emaka ibanna gelar anak e Isakar.

19Mehuli ka kula Lea, emaka tubuh anakna si peenemken.

20Nina, "Nggo ibereken Dibata man bangku pemere si seh kal jilena. Genduari uga pe ialoken dilakingku me aku, perban nggo tubuh arah aku enem anakna dilaki." Emaka ibanna gelarna Sebulon.

21Kenca bage tubuh sada anakna diberu, Dina ibanna gelarna.

22Dungna iinget Dibata me Rahel, IbegikenNa pertotonna, emaka banci ia mupus IbahanNa.

23Emaka mehuli me kula Rahel, jenari tubuh sada anakna dilaki nina, "Lanai kemalun aku ibahan Dibata.

24Mbera-mbera ibereken TUHAN denga bangku sada nari anak dilaki." Emaka ibanna gelar anak e Jusup.

Jakup ras Laban sitawaren

25Kenca tubuh Jusup nina Jakup man Laban, "Pelepas min aku mulih ku kutangku.

26Bereken min ndeharangku ras anak-anakku, si nggo dat aku erkiteken aku erdahin ras kam, gelah aku lawes. Tehndu nge uga ulina pendahinku man bandu."

27Nina Laban, "Begiken lebe. Nggo tergejap man bangku, maka TUHAN masu-masu aku erkite-kiteken kam.

28Emaka katakenlah asa kai upahndu gelah kugalari."

29Nina Jakup njabapsa, "Tehndu uga nggo pendahinku man bandu, janah kidekah aku njagasa, asuh-asuhenndu nggo merih.

30Ope denga aku i jenda sitik ngenca ertandu; genduari nggo ndauh kal erbuena, em perban nggo ipasu-pasu TUHAN kam erkite-kiteken aku. Emaka nggo seh paksana aku erdahin guna diringku jine."

31Nungkun Laban nina, "Asa kai dage kubereken bandu?" Nina Jakup njabapsa, "La padah aku rupah. Nggit denga aku ermakan asuh-asuhenndu, adi cocok akapndu katangku enda.

32Berelah maka kusiar-siar sendah asuh-asuhenndu kerina, janah kuserapken kasa kai biri-biri si mbiring ras mekambing tah pe simeruntik si nguda denga; e saja ngenca ateku man upahku.

33Alu bage tentu murah iakapndu denggo metehsa bujur aku tah lang. Adi ipepayo kam pagi upahku, janah lit i je kambing si la meruntik tah la mekambing, ntah biri-biri si la mbiring, tentu tereteh barang tinangko e."

34Nina Laban njabapsa, "Bage-bage! Kuban pagi bagi si ikatakenndu e."

35Tapi i bas wari e ipindahken Laban kerina kambing bajarna si meruntik ras si mekambing bage pe beruna si mekambing ntah meruntik tah pe kambing si lit mbentarna; biri-biri si mbiring pe ipindahkenna kerina. Kenca bage isuruhna anakna si dilaki ngurussa si e,

36janah kenca e itadingkenna Jakup, lawes ia ras asuh-asuhenna asa dauhna si banci idalani telu wari. Asuh-asuhen Laban si tading Jakup ngasuhisa.

37Ibuat Jakup dahan kayu dalu-dalu ketapang sirimpaga, ikulitina dahan-dahan emaka mekambing.

38Iamparkenna dahan-dahan e i lebe-lebe asuh-asuhen i bas inganna minem. Itamakenna i je sabap asuh-asuhen kawin sanga ia reh ku je minem.

39Emaka sanga kambing e kawin i lebe-lebe dahan-dahan e, anakna mekambing, mbiring ntah meruntik.

40Isirangken Jakup biri-biri e i bas kambing nari, jenari ipealakenna ku kambing si meruntik, mbiring ras mekambing. Alu bage nggo iserapkenna baginna jadi sada rarasen sikerajangenna jine, jenari isirangkenna ras sikerajangen Laban.

41Tole pe adi kawin asuh-asuhen si megegeh, iamparken Jakup dahan ndai i lebe-lebe asuh-asuhen e i bas inganna minem, gelah ermurik ia i tengah-tengah dahan-dahan e.

42Tapi la iamparken Jakup dahan-dahan e i lebe-lebe asuh-asuhen si lemah. Emaka lanai ndekahsa kerina asuh-asuhen si lemah nggo jadi sikerajangen Laban, tapi asuh-asuhen si megegeh jadi sikerajangen Jakup.

43Em dalanna maka Jakup jadi kalak si seh bayakna. Melala asuh-asuhenna, suruh-suruhenna, untana ras kaldena.


  Share Facebook  |  Share Twitter

 <<  Kejadian 30 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran