Dual PanelErsikap Jakup njumpai Esau
1Sanga iterusken Jakup perdalanenna piga-piga malekat njumpai ia.
2Kenca iidah Jakup malekat e nina, "Enda kap kemah Dibata." Emaka ibahanna gelar ingan e Mahanaim.
3Isuruh Jakup suruh-suruhenna leben njumpai Esau si ringan i negeri Edom.
4Itenahkenna arah kalak enda gelah ikatakenna man Esau, bagenda, "Aku Jakup suruh-suruhenndu si patuh, ngataken man bandu, tuanku Esau, maka kidekah enda ras Laban aku tading, la aku mulih seh genduari.
5Lit lembungku, kaldengku, biri-biringku, kambingku, ras suruh-suruhenku. Kutenahken kata enda man bandu, Tuan, alu pengarapen, gelah mekuah atendu bangku."
6Kenca suruh-suruhen e mulih man Jakup nina, "Nggo ijumpai kami seninandu Esau, janah genduari sangana ia i bas perdalanen njumpai kam. Lit 400 kalak dilaki ngikut ras ia."
7Megi si e mbiar dingen gentar si Jakup. Emaka ibagina anak buahna jadi dua bagin, bage pe biri-biri, kambing, lembu ras untana.
8Nina i bas ukurna, "Adi reh Esau nerang terpuk si pemena, terpuk si peduaken banci kiam."
9Kenca e ertoto Jakup, "O Dibata si isembah niningku Abraham, Dibata si isembah bapangku Isak, begiken min aku! Isuruhndu aku, o TUHAN, gelah aku mulih ku tanehku, ku keluargangku, janah IkatakenNdu maka Kam erbahanca kerina erdalan alu mehuli man bangku.
10La metunggung aku ngaloken ulina PerbahanenNdu ras pertetap AteNdu si nggo IcidahkenNdu man bangku, suruh-SuruhenNdu. Sanga aku ngepari Lau Jordan sada ciken ngenca lit i bas aku, genduari nggo mulih aku alu si dua nterpuken enda.
11Ertoto aku, pulahi min aku i bas seninangku Esau nari. Mbiar aku reh ia nerang aku ras ngelesapken kami kerina, subuk diberu bage pe danak-danak.
12Inget PadanNdu man bangku maka kerina IbahanNdu erdalan alu mehuli, ras mereken man bangku kesusuren teremen asang si ngasup kalak meligaisa, bali teremna ras kersik i tepi lawit."
13Kenca erberngi i jah, ipilih Jakup asuh-asuhenna jadi persembahen man seninana Esau: 200 kambing beruna, 20 kambing bajarna, 200 biri-biri beruna ras 20 biri-biri bajarna, 30 unta beru-beru ras anakna, 40 lembu ras 10 jenggina, 20 kalde beruna, ras 10 kalde sangkarna.
14(Kej 32:13)
15(Kej 32:13)
16Iterpukenna asuh-asuhen e jadi piga-piga terpuk, isuruhna sekalak suruh-suruhen njaga tep-tep terpuk. Nina man kalak enda, "Leben kena asa aku; ban kelang-kelangna tep-tep terpuk."
17Nina man suruh-suruhenna si pemena, "Adi jumpa kam ras seninangku Esau, janah isungkunna kam, 'Ise tuanndu? Ku ja perlawesndu? Ise empuna asuh-asuhen si igerandu e?',
18arus maka ijabapndu, 'Kerina asuh-asuhen e suruh-suruhenndu Jakup empuna. Iberekenna atena jadi pemere man tuanna Esau. Ia arah pudi denga.'"
19Perentah si seri iberekenna man suruh-suruhenna sipeduaken, sipeteluken, ras man kerina si njaga terpuk asuh-asuhen e. Nina, "Kenca jumpa ras Esau
20arus bage nindu, 'Payo, suruh-suruhenndu Jakup i pudi kami denga.'" Nina Jakup i bas ukurna, "Kubuatlah ukurna alu mereken pemere enda, janah kenca jumpa kari aku, gelah imahapkenna aku."
21Emaka ipelebena kalak naruhken hadiah e, sedang ia erberngi i bas kemahna i bas berngi e.
Jakup erbebe i Peniel
22I bas berngi e ka, medak Jakup. Ibabana duana ndeharana, ras duana gundikna, ras anakna si sepulu sada, ngepar Lau Jabok.
23Kenca isuruhna kerina kalak enda ngepar, emaka barang-barangna ikeparkenna
24tapi ia tading si sada arah pudi. Kenca bage reh sekalak dilaki erbebe ras ia seh nandangi pultak matawari.
25Kenca ieteh dilaki ndai maka la ia banci menang i bas perbeben e, emaka ipekpekna bena-bena paha Jakup seh tersiher.
26Nina dilaki ndai, "Pulahi aku, nggo nandangi terang wari." Tapi nina Jakup njabapsa, "La kam kupulahi adi la ipasu-pasundu aku lebe."
27"Kai gelarndu?" nina dilaki e nungkun. "Jakup," nina njabapsa.
28Nina dilaki ndai, "Genduari lanai Jakup gelarndu. Nggo erbebe kam ras Dibata ras manusia, janah nggo kam menang. Emaka Israel iban gelarndu."
29Nina Jakup, "Genduari kataken ka gelarndu." Tapi nina njabapsa, "Man kadendu meteh gelarku?" Kenca bage ipasu-pasuna Jakup.
30Nina Jakup, "Nggo siala-alan aku ras Dibata, tapi tetap denga aku nggeluh." Emaka Peniel ibanna gelar ingan e.
31Matawari nggo pultak sanga Jakup nadingken Peniel. Mengkah-engkah ia erkiteken nggo tersiher bena-bena pahana.
32Seh ngayak genduari kesusuren Israel la man jukut bena paha rubia-rubia sabap Jakup kena pek-pek i bas bagin e.