Dual PanelJakup ipasu-pasu Dibata i Betel
1Nina Dibata man Jakup, "Lawes lah kam minter ku Betel. I jah me kam ringan. Pajekken i jah sada batar-batar ingan ersembah man bangKu. Aku kap Dibata si petandaken BaNa man bandu Betel sanga kam lompat nadingken seninandu Esau."
2Erkiteken si e ngerana Jakup man keluargana ras man kerina kalak si ras ia, "Ambekkenlah kerina dibata-dibata si deban si lit i bas kam; lakokenlah acara pembersihen diri, jenari pakelah uisndu si bersih.
3Sitadingken me ingan enda, lawes kita ku Betel, i jah kupajekken ateku sada batar-batar ingan persembahen man Dibata si nggo mulahi aku sanga i bas kiniseran, si nggo ngarak-ngarak aku kujapa pe aku lawes."
4Emaka ibereken kalak enda kerina dibata-dibata si lit i bas ia man Jakup, ras anting-anting si ipakena pe. Itanemken Jakup kerina barang-barang i teruh batang kayu si galang deher Sikem.
5Sanga Jakup ras anak-anakna berkat nadingken ingan e, mbiar kerina penduduk kota-kota si lit i sekelewetna, emaka la iayakina rombongen Jakup.
6Dungna seh me Jakup ras kerina kalak si ras ia i Betel si nai igelari Lus i negeri Kanaan.
7Ipajekken Jakup i je sada batar-batar ingan ersembah man Dibata. Ibanna gelar ingan e "Dibata Betel," erkiteken Dibata nggo ncidahken BaNa man Jakup i je, sanga ia lompat nadingken kakana.
8Suruh-suruhen Ribka, eme kap Debora mate i je, janah ikuburken i teruh batang kayu si mbelin arah Selatan Betel. Em sabapna maka iban gelar kayu e "Kayu tangis".
9Kenca Jakup mulih i Mesopotami nari, Dibata ncidahken BaNa ka man Jakup ras masu-masu ia.
10Nina Dibata man bana, "Gelarndu si Jakup, tapi mulai genduari nari kam igelari Israel." Bagenda me maka Dibata nggelari ia Israel.
11Jenari nina Dibata man bana, "Aku kap Dibata Si Erkuasa. Nteremlah kesusurenndu. Bangsa-bangsa ernini man bandu, kam jadi nini raja-raja.
12Kubereken man bandu ras man kesusurenndu taneh si nai Kubereken man Abraham ras man Isak."
13Kenca e lawes Dibata i bas si Jakup nari.
14I bas ingan Dibata ngerana man bana e, ipajekken Jakup sada batu peringet-ingeten. Batu enda ipersembahkenna man Dibata alu ngamburken lau anggur ras minak saitun i babona.
15Ingan e ibahan Jakup gelarna "Betel".
Rahel mate
16Jakup ras keluargana nadingken Betel. Sanga kalak e lanai ndauhsa i Eprata nari, nggo seh paksana Rahel mupus, tapi lanai lang-lang serana akapna mupus e.
17Tupung paksana mesui kal akapna nina bidan man bana, "Ula mbiar Rahel, dilaki kang anakndu si tubuh e."
18Tapi Rahel nandangi mate me, janah ope denga peltep kesahna ibanna gelar anakna e Benoni, tapi igelari bapana ia Benyamin.
19Kenca Rahel mate, ikuburken ia i tepi dalan ku Eprata; genduari Betlehem gelarna ingan e.
20Ipajekken Jakup sada batu peringet-ingeten i je, janah seh asa genduari pe batu e tetap denga jadi tanda kuburen Rahel.
21Kenca bage iterusken Jakup perdalanenna, emaka ibanna barung-barungna i kepar menara Eder.
Anak Jakup si dilaki (1Taw 2:1-2)
22Sanga Jakup ringan denga i bas taneh e, ersada kula me Ruben ras Ribka, eme gundik bapana. Ieteh Jakup si enda emaka seh kal atena nembehna. Lit sepulu dua kalak anak Jakup dilaki.
23Anak Lea eme Ruben (ia me anak Jakup sintua), Simeon, Lewi, Juda, Isakar, ras Sebulon.
24Anak Rahel eme: Jusup ras Benyamin.
25Anak Bilha budak Rahel eme: Dan ras Naptali.
26Anak Silpa budak Lea eme: Gat ras Aser. Enda kerina tubuh i Mesopotami.
Isak mate
27Jenari idahi Jakup bapana Isak i Mamre, deher Hebron, eme sada ingan i ja Isak pernah tading ras Abraham i je.
28Kenca Isak nggo seh tuana, eme kap seratus waluh puluh tahun, mate ia, jenari ikuburken anakna Esau ras Jakup ia.
29(Kej 35:28)