Dual PanelPengkerin-kerin banjir si mbelin
1Dibata la lupa man Nuah ras kerina rubia-rubia si ikut rassa i bas kapal e; erkiteken si e ibahan Dibata angin rembus, emaka lau mulai erkurangna.
2Kerina pintun lau si lit i teruh taneh ras pintun lau i langit i tutupi, emaka ngadi me udan.
3Bage me lau e mulai erkurangna kenca 150 wari.
4I bas wari sepulu pitu bulan si pepituken ngadi kapal ndai i datas Deleng Ararat.
5Lau terus erkurangna, janah wari si pemena bulan si pesepuluhken, nggo mulai teridah tampuk deleng-deleng.
6Empat puluh wari kenca si e italangi Nuah sada jendela kapal e,
7janah ipulahina sada perik kak. Kak ndai lanai mulihken, tapi kabang-kabang saja ia seh lau nggo keri tuhu-tuhu.
8Emaka ipekabangna ka sada nderapati guna meteh ntah nggo surut lau ndai,
9tapi erkiteken kerina taneh itutupi lau denga, la lit ingan nderapati e cinep. Emaka mulihken ka ia ku kapal e, janah idudurken Nuah tanna ndarat nangkapsa.
10Itimaina ka pitu wari nari, kenca bage ipulahina ka nderapati ndai.
11Karaben mulihken nderapati ndai, janah alu tubina ibabana bulung seton si meratah denga. Emaka ieteh Nuah maka lau nggo surut.
12Kenca bage itimai Nuah ka pitu wari nari, emaka ipulahina ka nderapati ndai sekali nari; sekali enda lanai mulihken nderapati ndai.
13Asum umur Nuah 601 tahun, i bas wari si pemena bulan si pemena, lau lanai lit. Iagui Nuah tutup kapal e, itatapna kelewet, janah idahna taneh nggo mulai kerah.
14I bas wari si pedua pulu pituken, bulan si peduaken, taneh nggo kerah tuhu-tuhu.
15Nina Dibata man Nuah,
16"Ndaratlah kam i bas kapal nari ras ndeharandu, anak-anakndu ras permenndu teluna.
17Baba kerina ndarat perik-perik ras rubia-rubia, gelah banci ia reh buena ka kerina, gelah serser ibahanna doni enda."
18Emaka ndarat Nuah i bas kapal e nari ras ndeharana, bage pe anak-anakna ras ndeharana.
19Kerina rubia-rubia ras perik-perik pe ndarat i bas kapal e nari erterpuk-terpuk rikutken biakna.
Nuah mpersembahken persembahen
20Ibahan Nuah sada batar-batar ingan persembahen man TUHAN. Ibuatna sada ibas tep-tep erbage rubia-rubia ras perik-perik si la pantangen rikutken aturen agama. Kenca bage itutungna bulat-bulat i datas batar-batar ndai, jadi persembahen.
21Meriah iakap TUHAN erkiteken bau persembahen si merim e, emaka nina i bas Ukurna "Ndigan pe lanai Kusumpahi doni enda erkiteken perbahanen manusia. Nggo Kueteh maka mulai kin kitik-kitikna nari ukurna nggo jahat. Ndigan pe lanai Kukernepken kasa kai si nggeluh bagi si mbaru denga Kulakoken.
22Kidekah doni enda lit denga, lalap lit paksa nuan ras paksa rani, paksa mbergeh ras paksa mokup, paksa perudan ras paksa perlego, lit suari, lit berngi."