Alkitab Mobile SABDA
[VER] : [KARO]     [PL]  [PB] 
 <<  Keluaran 14 >> 

Ngepari Lawit Merah

1Jenari nina TUHAN man Musa,

2"Kataken man bangsa Israel gelah ia mulihken, gelah erkemah ia i lebe-lebe Pi-Hahirot, kelang-kelang Migdol ras Lawit Merah, deherken Baal-Sepon.

3Tentu iakap raja Mesir maka kalak Israel nggo papak i bas daerah e janah nggo terkurung iban gurun pasir.

4Emaka mekeng Kubahan ukurna, gelah iayakina kam. I je Kucidahken kemulianKu, sabap Kutaluken raja Mesir ras kerina tenterana, gelah ieteh bangsa Mesir maka Aku kap TUHAN." Minter ilakoken kalak Israel kai si ikataken man bana.

5Kenca ikataken man raja Mesir maka kalak Israel nggo kiam lawes, erkusur ukur raja ras pegawai-pegawaina, janah nina, "Uga nge perbahanenta e? Nggo sipelepas kalak Israel lawes; ma lanai ia banci jadi budakta?"

6Emaka isuruh raja nikapken gereta perangna ras tenterana.

7Berkat ia ras kerina gereta perangna, rikut ras 600 gereta pilihen, ipinpin puanglima-puanglima.

8Ipemersik TUHAN ukur raja, emaka iayakina bangsa Israel si sangana erdalan i bas pengkawali TUHAN.

9Iayaki tentera Mesir bangsa Israel alu ngersak kuda, ras nangkih gereta perang, janah itunduksa i bas inganna erkemah i tepi Lawit Merah deherken Pi-Hahirot ras Baal-Sepon.

10Kenca idah kalak Israel maka raja Mesir ras tenterana reh ngayaki janah nggo ndeher pe, seh kal ia biarna kerina, janah nderkuh ia mindo penampat man TUHAN.

11Nina bangsa Israel man Musa, "La kin mbarenda lit kuburen i Mesir maka ibabandu kami ndarat i jah nari gelah mate i gurun pasir enda? Ibabandu kami ndarat i Mesir nari; genduari nehenlah akibatna perbahanenndu e.

12Ma nggo me mbarenda ikataken kami man bandu ope denga kita berkat, ugapa pe bagenda nge jadina? Ipindo kami mbarenda man bandu gelah itadingkenndu kami gelah kami banci tetap jadi budak kalak Mesir. Ulin iakap kami jadi budak i jah asangken mate i bas gurun pasir enda."

13Erjabap Musa nina, "Ula mbiar, tetapkenlah ukurndu! Sendah idahndu me kai si ibahan TUHAN guna nelamatken kam; ndigan pe lanai bo idahndu bangsa Mesir e.

14TUHAN kari si erperang guna kam, emaka kai pe labo perlu ibahanndu."

15Nina TUHAN man Musa, "Ngkai maka kam tangis man bangKu? Suruh kalak Israel terus erdalan.

16Angkat cikenndu janah tatang i babo lawit e gelah erbelah launa maka banci kalak Israel erdalan arah tengah lawit i babo taneh kerah.

17Aku erbahanca maka seh mersikna ukur kalak Mesir gelah ia bengket ngayaki kalak Israel. Aku ndat kemulian arah kemenangenKu nandangi raja Mesir, tenterana, geretana, ras si maba gereta e.

18Kenca Kutaluken ia kerina, i je ieteh bangsa Mesir me maka Aku kap TUHAN."

19Malekat Dibata si erdalan arah lebe tentera Israel, miser ku pudi. Binangun embun e pe miser ku

20kelang-kelang bangsa Mesir ras bangsa Israel. Embun e erbahanca gelap arah bangsa Mesir, tapi iterangina bangsa Israel. Emaka tentera Mesir ras bangsa Israel la banci sideheren gedang-gedang berngi.

21Ipepinter Musa tanna i babo lawit, kenca bage ipesurut TUHAN lawit e alu angin Timur si megegeh. Lawit ndai nggo erbelah. Angin e rembus gedang-gedang berngi, emaka salih ibahanna lawit e jadi taneh kerah.

22Erdalan me bangsa Israel arah taneh kerah ngepari lawit janah arah kawes-kemuhenna lau nggo bagi lingling.

23Iayaki kalak Mesir, iikutkenna arah pudi ku tengah lawit ras kerina kudana, ras gereta perangna.

24Ope denga siang erpagi-pagi itatap TUHAN tentera bangsa Mesir i datas binangun api ras embun nari, janah ihuntakenna ia kerina.

25Roda gereta perangna IbahanNa lanai banci erpusing emaka seh kal akapna serana erdalan. Nina kalak Mesir, "Ota kiam kita, sabap TUHAN nge si erperang guna bangsa Israel ngelawan kita!"

26Ikataken TUHAN man Musa nina, "Pepinter tanndu i babo lawit, maka maler mulihken lau, nggedapken kerina bangsa Mesir ras gereta perangna ras si maba gereta e."

27Emaka ipepinter Musa tanna i babo lawit, janah nggo kenca matawari pultak, lau lawit nggo ka mulihken bagi biasa. Icubaken kalak Mesir kiam ndarat i bas lau e nari, tapi ibenterken TUHAN ia ku bas lawit.

28Maler mulihken lau ndai, itamburina gereta perang, si maba gereta e, puanglima-puanglima ras kerina tentera Mesir si ngayaki bangsa Israel ku bas lawit ndai; sada pe la lit tading.

29Tapi bangsa Israel erdalan arah tengah lawit i bas taneh kerah, lau si nggo bagi lingling arah kawes-kemuhenna.

30I bas wari e iselamatken TUHAN bangsa Israel i bas kalak Mesir nari, janah idah bangsa Israel mate bangsa Mesir ampar-ampar i tepi lawit e.

31Kenca idah bangsa Israel uga belinna gegeh ras kuasa TUHAN i bas naluken kalak Mesir, emaka mbiar ia kerina man TUHAN; tek ia kerina man TUHAN ras man Musa, suruh-SuruhenNa.


  Share Facebook  |  Share Twitter

 <<  Keluaran 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel