Alkitab Mobile SABDA
[VER] : [KARO]     [PL]  [PB] 
 <<  Keluaran 26 >> 

Kemah si Badia (Kel 36:8-38)

1"Bagin si arah bas Kemah si Badia e, arus ibahan i bas sepuluh lambar uis lenen halus nari, itenun ras benang wool biru, ungu ras megara. Jenari isulamken i je gambar-gambar mahluk si erkabeng.

2Tep-tep lambar seri ukurenna, gedangna sepulu dua meter, belangna dua meter.

3Lima lambar ijaitken jadi sada bagin, bage pe si lima lambar nari.

4Bahan lubang kancingna arah darat i bas kain biru nari, inganna arah tepi tep-tep bagin si nggo ijaitken ndai.

5I bas bagin si pemena tamaken lima puluh lubang kancing janah i bas bagin si peduaken pe lima puluh lubang kancing ka.

6Bahan lima puluh kancing emas guna mpersada si dua bagin ndai.

7Bahan tarum Kemah e i bas uis si itenun i bas mbulu kambing nari, buena sepulu sada lambar.

8Ukurenna seri kerina, gedangna sepulu telu meter janah belangna dua meter.

9Lima lambar ipersada jadi sada bagin janah si enem nari jadi sada bagin ka. Lipat duaken lambar si peenemken i babo ayo Kemah e.

10Bahan lima puluh lubang kancing i tepi bagin si pemena, janah lima puluh lubang kancing ka i bas bagin si sada nari.

11Bahan lima puluh kancing tembaga, jenari tamaken i bas lubang kancing e guna mpersada si dua bagin ndai gelah tarumna e nggo ersada.

12Ibaken setengah lambar uis arah pudi Kemah e, janah pelepas ia gantung.

13Ibaken lima puluh sentimeter sembelah rikutken gedangna, janah pelepas ia gantung nutupi Kemah e.

14Bahan dua nari man tarumna, sada i bas kulit bajar biri-biri nari si icelup megara, ras sada nari i bas kulit halus nari; enda jadi lapis tarumna arah darat.

15Papan rangka Kemah e ibahan i bas kayu jati nari.

16Tep-tep lambar papan gedangna empat meter, belangna 66 sentimeter.

17Bahan dua penna gelah banci ipersada kerina papan rangkana e. Kerina papan e la banci la ibahan penna.

18Bahan dua puluh lambar papan guna bagin Selatan Kemah,

19janah empat puluh alas pirak arah teruh, dua alas guna tep-tep papan man pengapit penna si dua ndai.

20Bahan dua puluh lambar papan guna bagin Utara Kemah,

21janah empat puluh alas pirak, dua man tep-tep lambar papan.

22Arah pudi Kemah bagin Barat, bahan enem lambar papan,

23janah dua lambar papan i bas sukina.

24Papan persukina enda ipersada arah teruh janah arus rapat i teruh nari terus ku das. Papan persukina e arus bage ibahan duana.

25Emaka arus lit waluh papan ras sepulu enem alas pirak, dua guna tep-tep papan.

26Bage pe arus ibahan sepulu lima beloti i bas kayu jati nari, lima guna tep-tep sada dampar dingding Kemah e,

27lima guna dingding si sada nari lima guna dingding si arah Barat, eme kap si arah pudi.

28Beloti si tengah, inganna pas i tengah-tengah dingding, berteng i bas sada ujung Kemah nari ku ujung si deban.

29Lapisi papan dingding e alu emas janah bahan pe gelang emas i bas dingding e ingan namaken beloti si berteng e ibaluti ka alu emas.

30Pajekken lah Kemah e sue ras rencana si Kucidahken man bandu i das deleng e.

31Bahan sada kire-kire i bas lenen halus nari itenun ras benang wool biru, ungu, ras megara. Sulamken i je gambar-gambar mahluk si erkabeng.

32Gantungken lah kire-kire e i bas empat tiang kayu jati si ilapisi alu emas, janah bahan pe gantungenna. Tiang si empat e ibahan alasna i bas pirak nari.

33Tamaken kire-kire i teruh barisen kancing si lit i bas tarum Kemah e, janah cibalken Peti Perpadanen si isin papan batu i pudi kire-kire e. Kire-kire e nirangken Ruang si Badia ras Ruang si Badiana kal.

34Tamaken tutupna i babo Peti Perpadanen e.

35I daraten Ruang si Badiana e kal, tamaken meja ndai arah bagin Utara janah nahe lampu e arah bagin Selatan i bas Kemah e.

36Dalan bengket ku bas Kemah e bahan sada kire-kire i bas lenen halus nari, itenun ras benang wool biru, ungu, ras megara janah ihiasi alu sulamen.

37Guna kire-kire enda, bahan lima tiang kayu jati ilapisi alu emas janah bahan pe sangkutenna emas; bahan pe lima alas tembaga guna tiang-tiang."


  Share Facebook  |  Share Twitter

 <<  Keluaran 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel