Erbahan batar-batar ingan nutungi persembahen (Kel 27:1-8)
1Guna persembahen tutungen, ibahanna sada batar-batar i bas kayu jati nari. Bentukna empat suki, gedangna 2,2 meter ras belangna 2,2 meter janah ganjangna 1,3 meter.
2Ibahan Besalel tandukna i babo sukina si empat, seh maka ersada ras batar-batar e. Kerina e ilapisina alu tembaga.
3Ibahanna pe kerina alat-alat guna batar-batar e, eme: belanga, sendok galang, mangkuk, garpu, ras talam ingan api. Kerina alat-alat enda ibahan i bas tembaga nari.
4Ibahanna sada jerijak besi tembaga jenari itamakenna i teruh bingke batar-batar e, ganjangna setengah asa ganjang batar-batar.
5Ibahanna empat gelang ingan lanja-lanjana, janah itamakenna e i bas empatna suki batar-batar e.
6Ibahanna lanja-lanjana i bas kayu jati nari, ilapisina alu tembaga,
7jenari itamakenna lanja-lanjana e arah lubang e, sada sembelah. Batar-batar e ibahan i bas papan nari, janah kosong i tengah.
Erbahan baskom tembaga (Kel 30:18)
8Ibahan Besalel baskom tembaga ras tapakna i bas curmin diberu-diberu si erdahin i bas dalin bengket ku bas Kemah Perjumpan e.
Bide guna Kemah Perjumpan (Kel 27:9-19)
9Guna Kemah Perjumpan e, ibahan Besalel sada bide i bas kire-kire lenen halus nari. Arah bagin Selatan gedang kire-kire e 44 meter,
10isangketken ku dua puluh tiang tembaga; ras alasna pe tembaga. Sangketenna ras si jadi tulanna ibahan i bas pirak nari.
11Bide e seri ras si arah bagin Utara.
12Arah bagin Barat, kire-kire e gedangna dua pulu dua meter, isangketken ku sepuluh tiang ras sepuluh alasna rikutken sangketenna ras tulan kire-kire si ibahan i bas pirak nari kerina.
13Arah Timur, dalin bengket, belang bide e dua pulu dua meter ka nge.
14Arah kawes ras kemuhen dalan bengket e lit kire-kire 6,6 meter gedangna, tiangna telu, janah alasna pe telu.
15(Kel 38:14)
16Kerina kire-kire guna bide e ibahan i bas lenen halus nari.
17Alas tiang-tiang e kerina ibahan i bas tembaga nari, janah sangketenna, tulan kire-kire, ras lapis ujung tiang-tiang e ibahan i bas pirak nari. Kerina tiang-tiang i sekelewet bide e ihubungken alu galah pirak.
18Kire-kire guna dalan bengket ku bas bide e, ibahan i bas lenen halus nari, itenun ras wool biru, ungu ras megara, janah ihiasi alu sulamen. Gedang kire-kire e siwah meter ras ganjangna 2 meter, seri ras kire-kire si ipake guna bide e.
19Kire-kire e isangketken i bas empat tiang i babo empat alas tembaga. Sangketenna, lapis ujungna, ras tulan kire-kire e ibahan i bas pirak nari.
20Kerina pantuk-pantuk Kemah e ras pantuk-pantuk bide i sekelewet ibahan i bas tembaga nari.
Besi-besi si ipake i bas Kemah Perjumpan e
21Enda me sada daftar kerna jumlah barang besi si ipake i bas Kemah Perjumpan e, i ja isimpan dua papan batu Sepuluh Pedah Dibata. Daftar enda isuruh Musa gelah ibahan, janah si erbahanca eme kalak Lewi si erdahin i teruh pinpinen Itamar anak Imam Harun.
22Besalel, anak Uri, kempu Hur, i bas suku Juda nari, erbahan asa kai si nggo iperentahken TUHAN.
23Si nampati ia, Oholiap anak Ahisamah i bas suku Dan nari, eme sekalak tukang ukir, tukang si beluh erbahan potongen barang-barang, bage pe sekalak si beluh ertenun lenen halus ras wool biru, ungu, ras megara.
24Kerina emas si nggo ipersembahken man TUHAN guna Kemah si Badia e beratna 1.000 kilo, itimbang rikutken timbangen si sah.
25Pirak si ipepulung tupung sensus perpulungen e beratna lit 3.430 kilo, itimbang rikutken timbangen si sah.
26Jumlah enda bali ras jumlah si igalari kerina kalak si isuratken tupung sensus e, sekalak-sekalak nggalar asa si nggo itetapken, itimbang rikutken timbangen si sah. Lit 603.550 dilaki si umurna 20 tahun ku das si idaftarken i bas sensus e.
27I bas pirak e nari, 3.400 kilo ipake guna erbahan alas tiang Kemah si Badia ras kire-kire, si buena lit seratus tiang, eme telu pulu empat kilo tep-tep alas.
28Pirak si tading telu puluh kilo e ibahan Besalel jadi tulan kire-kire, jadi sangketen i bas tiang-tiangna, janah man lapis ujungna.
29Tembaga si ipersembahken man TUHAN buena 2.425 kilo.
30Alu e ibahanna alas dalan bengket ku bas Kemah Perjumpan e, jadi batar-batar ras jerijak besi tembagana, jadi kerina alat-alat batar-batar e,
31jadi alas bide Kemah e ras man dalan bengket ku bas bide e, ras jadi pantuk-pantuk Kemah e ras pantuk-pantuk bidena.