Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 6 >> 

Ipilih pitu kalak si nampati rasul-rasul

1Paksa e, asum reh teremna kalak si tek man Jesus, turah perubaten i tengah-tengah kalak Jahudi si make cakap Junani ras kalak Jahudi si make cakap Jahudi. Jungut-jungut kalak e sabap kalak si mbalu i tengah-tengah kalak Jahudi si make cakap Junani la ngaloken bagin i bas pemere si arus ialoken tep-tep wari.

2Emaka ipepulung rasul-rasul si sepulu dua e kerina kalak si nggo tek e, jenari nina, "La metunggung itadingken kami dahin meritaken kata Dibata erdandanken ngelaken pangan si tep-tep wari e.

3Perbahan si e o senina-senina, pilihlah pitu kalak i bas kam nari si ietehndu kalak mehuli si dem alu Kesah Si Badia dingen pentar, gelah ia ngaturken dahin e.

4Alu bage banci ipergunaken kami kerina waktu kami guna ertoto ras meritaken Berita Si Mehuli."

5Kerina perpulungen ngaloken kata enda. Emaka ipilihna Istepanus si dem kiniteken dingen Kesah Si Badia. Bage pe ipilihna Pilipus, Prokorus, Nikanor, Timon, Parmenas ras Nikolaus; ia kalak Antiokia si nggo eragama Jahudi.

6Kalak enda me pituna ibabana ku lebe-lebe rasul. Jenari ertoto rasul-rasul e janah kenca bage ipasu-pasuna ia kerina alu namaken tanna ku babona sekalak-sekalak.

7Kata Dibata reh mbarna janah ertambahna kalak si tek i Jerusalem. Bage pe nterem imam ngaloken Berita Si Mehuli e.

Si Istepanus itangkap

8Istepanus si dem lias ate ras kuasa i bas Dibata nari erbahan tanda-tanda sengget si mbelin i tengah-tengah jelma si nterem.

9Tapi lit piga-piga kalak si njabapi ia, eme anggota rumah persembahen Kalak Bebas. (Bage me rumah persembahen e igelari.) Perpulungen enda eme kalak Jahudi si i Kireni ras si i Aleksanderia nari. Bage pe kalak Jahudi si i Propinsi Kiliki ras si i Propinsi Asia nari ikut njabapi Istepanus.

10Tapi perbahan Kesah mereken kepentaren man Istepanus asum ia ngerana emaka la ngasup kalak ngelawansa.

11Emaka isogokna piga-piga kalak guna ngataken, "Nggo ibegi kami ia ngerana encekuraki Musa ras encekuraki Dibata."

12Alu cara bage me ia erbahan sada geraken i tengah-tengah jelma si nterem, pertua-pertua ras guru-guru Undang-undang. Emaka kenca bage itangkapna Istepanus, jenari ibabana ku Pengadilen Agama.

13Jenari isuruhna ngerana saksi-saksi palsu si ngataken, "Kalak enda la erngadi-ngadi ngataken si la mehuli kerna Rumah Pertoton si Badia enda bage pe icekurakina Undang-undang si ibereken Musa man banta.

14Pernah pe ibegi kami ikatakenna maka Jesus kalak Nasaret e ngeruntuhken Rumah Pertotonnta enda denggo janah IsambariNa adat-istiadat si nggo ibereken Musa man banta."

15Kerina mata kalak si runggu kempak Istepanus, janah idahna ayo Istepanus bali ras ayo malekat paksa si e.


  Share Facebook  |  Share Twitter

 <<  Kisah Para Rasul 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel