Alkitab Mobile SABDA
[VER] : [KARO]     [PL]  [PB] 
 <<  Kolose 2 >> 

1Ateku gelah ietehndu kuga latihna kuakap erdahin man gunandu, man guna kalak si ringan i Laodikea ras kerina kalak si langa pernah jumpa ras aku.

2Si enda kubahan gelah tetap kal ukurna bage pe gelah banci ersada ia i bas keleng ate, gelah i bas ia dem kinibayaken pengertin si serta. Alu bage ietehna rahasia Dibata, eme Kristus.

3Kristus me kunci si nalangi kerina erta-erta kepentaren ras pemeteh Dibata si terligen.

4Enda kukataken bandu gelah ola kam itokoh-tokohi ise pe si nuriken cakap mehuli man bandu.

5Sabap aminna gia ndauh aku sirang ras kam, tapi ukurku ras kam kap. Meriah ukurku ngidah uga raturna dingen tetapna kam erkiniteken man Kristus.

Kegeluhen kalak Kristen si serta

6Bagi nggo ialokenndu Kristus Jesus jadi Tuhanndu, nggeluhlah kam ersada ras Ia.

7Ruratlah kam i bas Ia, geluhkenlah geluhndu i bas Ia, janah reh gegehna lah min kinitekenndu bagi si niajarken man bandu. Rusurlah ngataken bujur man Dibata.

8Emaka jagalah, gelah ola ise pe nebu-nebu kam, alu kepentaren si la erguna si dem taki pacik, si reh i bas pengajaren manusia nari erpalasken pengertinna kerna biak doni enda, janah labo i bas Kristus nari.

9Sabap biak Dibata si serta lit i bas Kristus, i bas KemanusianNa.

10Janah man bandu nggo ibereken kegeluhen si serta erdandanken persadanndu ras Ia. Sabap Kristus ganjangen asaken kerina kuasa-kuasa ras kerina pemerentah-pemerentah si la teridah.

11I bas persadanndu ras Ia kam nggo isunatken, labo alu sunat si ibahan manusia, tapi alu sunat Kristus, eme KematenNa, si gunana mulahi kam i bas kuasa biak manusia si erdosa nari.

12Sabap asum kam iperidiken, ikuburkenndu ras Kristus, janah alu peridinndu ipekekendu i bas si mate nari erdandanken tek kam man kuasa Dibata si nggo pekeke Kristus i bas si mate nari.

13Nai mate pertendinndu erdandanken dosa-dosandu, dingen erdandanken kam langa isunatken, eme la ngikutken perentah-perentah Dibata. Tapi genduari nggo ipegeluh Dibata kam ras Kristus, kerina dosa-dosandu nggo ialemi Dibata.

14ImasapkenNa surat utang si isina eme kap perentah si nuntut kita. Alu makuken surat utang e ku kayu persilang, isasapken Dibata kerina TuntutenNa man banta.

15I kayu persilang Kristus ngerampas senjata kuasa-kuasa ras pemerentah si la teridah e. IbahanNa si e jadi dedahen kalak si nterem alu maba kuasa-kuasa e selaku tabanen i bas arak-araken KemenangenNa.

16Emaka ula pelepas ise pe erbahan aturen-aturen kerna pangan ras inemenndu, ntah kerna wari-wari mehuli, ntah kerna bulan nguda, ntah kerna wari Sabat.

17Si enda kerina kerna awih-awih si nandangi reh nge ngenca. Tapi si tuhu-tuhuna eme Kristus.

18Ula pelepas isalahken kalak kam si ngataken maka belinen ia asangken kam erkiteken sada-sada pengenehenen. Kalak si bage pekulah-kulah ermeteruk ukur dingen meseksek nembah man malekat-malekat. Kalak si bagenda megombang alu la lit alasenna sitik pe, sabap perukurenna eme perukuren manusia.

19Janah lanai icikepna Kristus si jadi takal kula e, eme perpulungen. I bas kepkepen Kristus, kerinana kula e ikawali dingen ipersadaken alu buku-buku ras urat-urat, janah reh belinna bagi si ngena ate Dibata.

Mate ntah nggeluh ras Kristus

20Kam nggo mate ras Kristus, janah nggo ibebasken i bas kuasa-kuasa si la teridah nari. Ngkai maka kam nggeluh tempa-tempa kam sikerajangen doni enda? Ngkai maka ikutkenndu aturen-aturen:

21"Ula jemak si enda," "Ula cecap ah," "Ula kuit si deban ah!"

22Kerina peraturen si enda ma kerna barang-barang si lanai bo lit gunana kenca ipake? Si enda aturen-aturen dingen ajaren-ajaren si ibahan manusia saja ngenca.

23Aturen-aturen enda, aminna pe tempa-tempa dem kepentaren i bas ersembah man malekat alu paksan, mpeteruk ukur alu pekulah-kulah, bage pe nakiti kula, tapi la lit gunana i bas naluken peraten kula.


  Share Facebook  |  Share Twitter

 <<  Kolose 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran