Alkitab Mobile SABDA
[VER] : [KARO]     [PL]  [PB] 
 <<  Matius 17 >> 

Jesus ipermuliaken Dibata (Mrk 9:2-13; Luk 9:28-36)

1Enem wari kenca si e Jesus berkat raduken Petrus, Jakup, ras sembuyakna Johanes ndiri ku das deleng si meganjang.

2I lebe-lebe kalak enda teluna, salih rupa Jesus: AyoNa ersinalsal bagi terang matawari janah UisNa mbentar erndilap-ndilap.

3Jenari idah ajar-ajar si telu kalak e Musa ras Elia ercakap-cakap ras Jesus.

4Emaka nina Petrus man Jesus, "O Tuhan, senang kal iakap kami i jenda; adi mehuli IakapNdu banci kubahan i jenda telu sapo-sapo, sada man BaNdu, sada man Musa, janah sada nari man Elia."

5Asum Petrus ngerana denga, rempet nusur embun ersinalsal ngelinggemi Jesus, Musa ras Elia. Jenari terbegi sora i bas embun e nari, "Enda me AnakKu si Kukelengi, Ia me si nehken peratenKu begikenlah Ia!"

6Kenca ibegi ajar-ajar sora e mbiar kal ia, seh maka njerunuk ia ku taneh.

7Tapi ideheri Jesus ajar-ajar e, IkuitNa, jenari nina, "Tediskenlah! Ola kam mbiar!"

8Emaka jurgak ajar-ajar e ise pe lanai idahna i je selain Jesus.

9Tupung erdalan nusur ku berneh, ngerana Jesus man ajar-AjarNa nina, "Ola iturikenndu man ise pe kerna kai si nggo idahndu ndai ope denga Anak Manusia si isuruh Dibata ipekeke i bas si mate nari."

10Jenari nungkun ajar-ajar man Jesus, "Adi bage, ngkai maka ikataken guru agama Jahudi maka Elia arus leben reh?"

11Ngaloi Jesus, "Tuhu Elia leben reh guna mpesikap kerina.

12Tapi Kukataken man bandu: Elia si tuhuna nggo reh, tapi la ia itandai kalak. Emaka iperlakokenna kalak bagi ate-atena. Bageme perbahanen kalak man Anak Manusia si isuruh Dibata e."

13Kedungenna iangka ajar-ajar maka si imaksudken Jesus e me kap kerna Johanes Peridiken.

Ipepalem Jesus sekalak anak dilaki si tabun (Mrk 9:14-29; Luk 9:37-43a)

14Kenca seh Jesus ras ajar-AjarNa ku jelma si nterem, reh sekalak dilaki ndahi Jesus. Erjimpuh ia i lebe-lebe Jesus

15jenari nina, "O Tuan, mekuah min AteNdu man anakku! Anakku e tabun mekelek kal. Megati ia njerunuk ku bas api bage pe ku bas lau.

16Nggo kupindoken man ajar-AjarNdu gelah ipepalemna, tapi la ia ngasup pepalemsa."

17Emaka nina Jesus man ajar-AjarNa e, "O kam kalak si la erkiniteken, kam nggo salah! Asakai nari dekahna Aku ras kam? Asa kai nari dekahna Aku tahan ras kam? Baba anak e ku jenda!"

18Isuruh Jesus gelah ndarat setan si neluki anak e. Emaka ndarat setan e, jenari minter malem penakit anak e i bas paksa e ka.

19Kenca bage reh ajar-ajar ndeheri Jesus. Asum la nai sada pe i je kalak si nterem, nungkun ajar-ajar e man Jesus nina, "Ngkai maka la kami ngasup mpelawes setan e?"

20Ngaloi Jesus, "Perbahan kam kurang tek! Inget! Adi lit kinitekenndu asa buah sawi lah gia, banci kap ikatakenndu man uruk enda, 'Miser i bas inganndu enda nari ku jah!', janah miser me uruk e. Labo lit kai pe si metahat man bandu.

21(Tapi setan si bagi enda ndai labo terpelawes adi la kin alu gegeh ertoto dingen erpuasa.")

Pedua kaliken ituriken Jesus kerna KematenNa (Mrk 9:30-32; Luk 9:43b; Luk 9:44-45)

22Asum Jesus ras ajar-AjarNa i Galilea, ngerana Jesus man ajar-AjarNa e nina, "Anak Manusia si isuruh Dibata lanai ndekah iendesken ku bas kuasa manusia.

23Ibunuhna me Ia, tapi i bas wari peteluken ipegeluh Dibata Ia mulihi i bas si mate nari." Megi kata Jesus e ceda ate ajar-AjarNa.

Jesus nggalari yuren Rumah Pertoton

24Kenca seh Jesus ras ajar-AjarNa i Kapernaum reh si ngutip yuren Rumah Pertoton njumpai Petrus. Nina man Petrus, "Gurundu nggalari yuren Rumah Pertoton ntah lang?"

25Erjabap Petrus, "Nggalar." Kenca Petrus mulih, Jesus leben mperkuanken ia nina, "O Simon, kuga nge iakapndu? I bas ise nari nge raja-raja doni enda ngutip yuren ntah pajak? I bas rayatna nari ntah i bas kalak si deban nari?"

26Ngaloi Petrus, "I bas kalak si deban nari." Emaka nina Jesus, "Adi bage, rayatna la nggalar.

27Tapi gelah ola tondel ukur kalak e erdandanken kita, to lawes ku dano ngkawil. Apai nurung si pemena itangkapndu, uak babahna. I bas babahna idatndu kari duit pirak cukup guna nggalari yurenKu ras yurenndu. Buat duit pirak e jenari galari yurenta."


  Share Facebook  |  Share Twitter

 <<  Matius 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel