Dual PanelKerna ngulihken ndehara (Mrk 10:1-12)
1Kenca dung Jesus ngajar, ItadingkenNa Galilea, lawes Ia ku daerah Judea, ku lepar Lau Jordan.
2Nterem kal jelma ngikutken Jesus. I je nterem kalak si penakiten IpepalemNa.
3Jenari reh piga-piga kalak Parisi njumpai Jesus sabap atena ncubai Ia. Nungkun ia man Jesus nina, "Rikutken Undang-undang agamanta banci kin iulihken kalak ndeharana bagi ate-atena saja?"
4Erjabap Jesus, "Langa kin iogendu kata si tersurat i bas Pustaka Si Badia, i ja ikataken maka mula-mulana ijadiken si Nepasa sekalak dilaki ras sekalak diberu?
5Jenari nina si Nepasa e, 'Erdandanken si enda itadingken si dilaki me nande-bapana jenari ersada ia ras ndeharana janah si dua e nggo jadi sada.'
6Emaka lanai bo ia dua, tapi sada. Dage si nggo ipersadaken Dibata la banci isirangken manusia."
7Nina ka kalak Parisi, "Adi bage, ngkai maka ipelepas Musa kalak ngulihken ndeharana alu erbahan surat mulih?"
8Erjabap Jesus, "Perbahan la kam terajarken maka ipelepas Musa kam ngulihken ndeharandu. Tapi tang-tangna nari labo bage.
9Ise ngulihken ndeharana, adi labo erkiteken ndeharana e erlagu la mehuli, ia nggo erlua-lua adi iempoina diberu si deban."
10Jenari nina ajar-AjarNa man BaNa, "Adi bage kin, ulin me la erjabu."
11Ngaloi Jesus, "Labo kerina kalak ngaloken kata enda ndai, seakatan kalal si nggo itentuken Dibata.
12Sabap erbage-bage kap dalanna maka kalak la banci erjabu: lit erdandanken pertubuhna kin erbahanca ia la banci erjabu, lit erdandanken kalak si deban erbahanca ia la banci erjabu, janah lit ka erdandanken igejapna maka ia idilo guna dahin i bas Kinirajan Surga. Ise ngasup ngaloken kata enda, alokennalah."
Jesus masu-masu danak-danak (Mrk 10:13-16; Luk 18:15-17)
13Jenari reh piga-piga kalak maba danak-danak man Jesus. Atena gelah ipasu-pasu dingen itotoken Jesus danak-danak e. Tapi iambati ajar-ajar Jesus kalak e.
14Emaka nina Jesus man ajar-AjarNa, "Pelepaslah danak-danak e reh ndahi Aku, ola ambati ia, sabap man kalak si bagi enda kap Kinirajan Surga."
15Ipasu-pasu Jesus danak-danak e kerina, jenari lawes Ia i bas ingan e nari.
Anak perana si bayak (Mrk 10:17-31; Luk 18:18-30)
16I bas sada wari, reh sekalak dilaki njumpai Jesus. Nungkun ia man Jesus nina, "O Guru, perbahanen si mehuli si kuga nge arus kubahan gelah kudat kegeluhen si tuhu-tuhu si la erkeri-kerin?"
17Erjabap Jesus, "Ngkai maka isungkunndu Aku kerna si mehuli? Si sada e kap ngenca si mehuli. Ikutken kerina pedah Dibata adi bengket atendu ku kegeluhen si tuhu-tuhu."
18Nungkun ka ia, "Pedah si apai kin?" Erjabap Jesus, "Ola munuh; ola erlua-lua; ola nangko; ola jadi saksi si la tuhu;
19mehamatlah man bapa ras nandendu; kelengi temanndu manusia bagi ikelengindu bandu."
20Nina anak perana e, "Kerina e nggo kudalanken. Kai nari kin si kurang?"
21Erjabap Jesus, "Adi atendu gelah kam serta, laweslah, dayaken kerina erta-ertandu, jenari bereken duitna man kalak musil, alu bage ialokenndu me erta surga; Jenari reh kam ngikutken Aku."
22Kenca ibegi anak perana e kata Jesus, lawes ia, gulut ukurna sabap bayak kal ia.
23Jenari nina Jesus man ajar-AjarNa, "Kukataken man bandu: Tuhu-tuhu mesera kal kalak bayak bengket ku bas Kinirajan Surga.
24Kukataken pe tole man bandu: sukahen unta mentas arah lubang jarum asangken kalak bayak bengket ku bas Kinirajan Surga."
25Mamang kal ate ajar-ajar megi kata e, emaka nina, "Adi bage, ise nge banci terkelin?"
26Ipernehen Jesus ajar-AjarNa, jenari nina, "Si enda la banci i bas manusia, tapi i bas Dibata kai pe banci jadi."
27Jenari nina Petrus man Jesus, "Nehenlah, nggo itadingken kami kerinana gelah ngikutken Kam. Dage kai nge pagi ialoken kami?"
28Nina Jesus man ajar-AjarNa, "Kukataken man bandu i bas doni si mbaru pagi, asum Aku, Anak Manusia si isuruh Dibata kundul erkuasa i bas kursi Kinirajan, kam pe ajar-ajarKu si sepulu dua kalak kundul i bas kursi guna ngadili bangsa Israel si sepulu dua suku.
29Man kalak si nggo nadingken rumahna, seninana ntah turangna, bapana ntah nandena, anak-anakna ntah jumana erdandanken Aku, ibereken Dibata man bana seratus kali lipat janah ialokenna me kegeluhen si tuhu-tuhu si la erkeri-kerin.
30Tapi nterem kalak si arah lebe genduari jadi arah pudi pagi, janah nterem kalak si arah pudi genduari jadi arah lebe pagi."