Alkitab Mobile SABDA
[VER] : [KARO]     [PL]  [PB] 
 <<  Matius 9 >> 

Ipepalem Jesus sekalak si pang-pangen (Mrk 2:1-12; Luk 5:17-26)

1Kenca Jesus ku das perahu, ngepar Ia, jenari seh Ia ku KutaNa.

2I je itaruhken kalak man BaNa sekalak si pang-pangen tare ingan medem. Perbahan idah Jesus maka tek kal kalak e man BaNa, emaka Nina man si pang-pangen e, "Tetapkenlah ukurndu, o anakKu! Dosandu nggo ialemi."

3Perbahan si e piga-piga kalak guru agama jungut-jungut i bas ukurna nina, "IlawanNa kap Dibata arah CakapNa e."

4Ieteh Jesus kai si lit i bas ukur kalak enda, emaka nina, "Ngkai maka jahat i bas ukurndu?

5Apai kin sukahen ngatakenca, 'Dosandu nggo ialemi,' asangken ngatakenca, 'Kekekenlah, jenari erdalanken!'

6Tapi Kucidahken man bandu maka Aku, Anak Manusia si isuruh Dibata erkuasa ngalemi dosa i doni enda." Jenari nina Jesus man si pang-pangen e, "Kekekenlah angkat ingan medemndu, jenari mulihlah!"

7Keke ia jenari mulih ia ku rumah.

8Mbiar kalak si nterem ngidah kejadin e. Ipujina Dibata si nggo mereken kuasa si bage belinna man manusia.

Idilo Jesus si Matius (Mrk 2:13-17; Luk 5:27-32)

9Lawes Jesus i bas ingan ndai nari janah asum Ia erdalan IdahNa sekalak pengalo cuke kundul i bas kantorna. Gelarna Matius. Nina Jesus man bana, "Ikutken Aku." Tedis Matius jenari ikutkenna Jesus.

10Asum Jesus ras ajar-AjarNa man i rumah Matius, nterem pengalo cuke ras kalak perdosa ikut man ras Jesus ras ajar-AjarNa.

11Piga-piga kalak Parisi ngidah si enda. Emaka nina man ajar-ajar Jesus, "Ngkai maka Gurundu e man ras pengalo cuke bage pe ras kalak perdosa?"

12Ibegi Jesus penungkunen kalak Parisi enda, emaka erjabap Ia, "Kalak si sehat labo ia perlu dokter, tapi kalak si sakit nge.

13Laweslah, jenari pelajari kata si tersurat i bas Pustaka Si Badia enda, 'Keleng atendu nge si kuperluken, labo asuh-asuhen si ipersembahkenndu.' Aku reh labo guna ndilo kalak si bujur akapna bana, tapi guna ndilo kalak perdosa."

Kerna erpuasa (Mrk 2:18-22; Luk 5:33-39)

14Kenca bage reh ajar-ajar Johanes ndahi Jesus. Nungkun ia man Jesus nina, "Ngkai maka ajar-AjarNdu la erpuasa? Kami ras kalak Parisi megati nge erpuasa."

15Ngaloi Jesus, "Atendu kin maka temue i bas kerja erdemu bayu erceda ate adi si empo e ras ia denga? Tentu lang! Lit nge paksana ia sirang ras si empo e. Kenca si e me ia erpuasa.

16Labo uis mbaru ibahan kalak guna ngerangkapi uis si nggo buruk. Sabap adi bage, reh belangna me rigatna ibahan pengerangkapina e.

17Bage pe labo itamaken kalak lau anggur mbaru ku bas guci kuling-kuling si nggo male. Sabap adi bage, pecah me guci e, janah anggur pe mambur dingen guci e pe lanai terpake. Tapi lau anggur mbaru itamaken kalak ku bas guci kuling-kuling si mbaru. Alu bage anggur ras guci tetap mehuli duana."

Anak pengulu bage pe sekalak diberu si ndadap uis Jesus (Mrk 5:21-43; Luk 8:40-56)

18Asum Jesus ngerana denga ras ajar-ajar Johanes Peridiken, reh sekalak pengulu rumah persembahen kalak Jahudi. Erjimpuh ia i lebe-lebe Jesus, jenari nina, "Anakku e denga kal mate. Reh min Kam namaken TanNdu ku babona gelah ia nggeluh mulihi."

19Emaka keke Jesus, IkutkenNa pengulu e janah ajar-AjarNa pe ikut ras Ia.

20Asum Jesus erdalan, reh sekalak ndeheri Ia i pudi nari. Diberu e nggo sepulu dua tahun dekahna bluding rusur. Idadapna uis Jesus,

21sabap nina i bas ukurna, "Kudadap saja lah gia uis Jesus e, tentu malem penakitku."

22Itulihken Jesus diberu e, jenari nina, "Malem atendu, o anakKu! Malem penakitndu erkiteken tek kam man bangKu." I bas paksa si e malem penakit diberu ndai.

23Jenari iterusken Jesus erdalan ku rumah pengulu ndai. Kenca seh i rumah, IdahNa piga-piga kalak narune ras kerina kalak nderkuhen.

24Emaka nina Jesus "Ndarat kam kerina! Anak enda labo mate, tunduh saja nge ia!" Nguncim kalak si nterem man Jesus.

25Kenca ndarat kalak e kerina, minter bengket Jesus ku kamar anak ndai. Ijemak Jesus tan anak e jenari minter nggeluh mulihi.

26Berita kerna si enda mbar ku belang-belang daerah e.

Dua kalak pentang erpengidah ibahan Jesus

27Lawes Jesus i bas rumah pengulu e nari. Asum ia erdalan lit dua kalak pentang ngikut-ngikut Ia. Alu sora megang nina man Jesus, "Mekuah min atendu kami, o Anak Daud!"

28Kenca bengket Jesus ku bas sada rumah, reh duana kalak pentang e. Isungkun Jesus nina, "Tek kin kam ngasup Aku erbahan kam erpengidah?" Erjabap si pentang e, "Tek kami Tuan!"

29Emaka idadap Jesus mata kalak pentang e jenari nina, "Jadilah bagi kinitekenndu e."

30Minter terang pengidahna duana. Jenari alu telkas ngerana Jesus man bana, "ola kataken man ise pe kerna si enda!"

31Tapi lawes kalak e duana, jenari iturikenna kerna Jesus ku belang-belang daerah e.

Ipepalem Jesus kalak si lanai beluh ngerana

32Asum ndarat si dua kalak e i rumah nari, reh ka piga-piga kalak ndahi Jesus. Ibabana sekalak si lanai beluh ngerana erkiteken iseluki setan.

33Kenca ipelawes Jesus setan e, minter ia beluh ngerana. Mamang ate kalak si nterem nina, "Langa pernah jadi bagenda i Israel!"

34Tapi nina kalak Parisi, "Pengulu setan kap mereken kuasa man BaNa maka ngasup Ia mpelawes setan."

Mekuah ate Jesus kalak si nterem

35Jenari isiari Jesus kuta-kuta si meriah ras kuta-kuta si kitik. Ngajar Ia i rumah-rumah persembahen kalak Jahudi. IberitakenNa Berita Si Mehuli kerna Kinirajan Surga. IpepalemNa erbage-bage penakit kalak si nterem.

36Mekuah ate Jesus ngenehen kalak si nterem e, sabap nggo kote dingen lanai lit si ngepkepsa, bagi biri-biri si la ipermakani.

37Emaka nina Jesus man ajar-AjarNa, "Mbelang man peranin, tapi kurang si ranisa.

38Emaka pindolah man si Mada juma e, gelah IsuruhNa si erdahin guna peranin e."


  Share Facebook  |  Share Twitter

 <<  Matius 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel