Alkitab Mobile SABDA
[VER] : [KARO]     [PL]  [PB] 
 <<  Markus 1 >> 

Dahin Johanes Peridiken (Mat 3:1-12; Luk 3:1-18; Yoh 1:19-28)

1Enda me Berita Si Mehuli kerna Jesus Kristus Anak Dibata.

2Ibenaken sue ras si isuratken Nabi Jesaya, "Nina Dibata, 'Nehenlah, Kusuruh persuruhenKu leben asa Kam, ia me si nikapken dalan man BaNdu.'

3Lit sekalak si erlebuh i taneh si mesawang, 'Pesikaplah dalan man Tuhan; pepinter DalanNa!'"

4Sue ras si tersurat e, reh me Johanes Peridiken ku taneh si mesawang. Iperidikenna kalak janah ipesehna berita i bas Dibata nari nina, "Iperidikenndu min, tandana kam jera i bas dosa-dosandu nari, gelah dosa-dosandu ialemi Dibata."

5Emaka kerina jelma i taneh Judea ras i kota Jerusalem reh megiken Johanes. Iakukenna dosana janah iperidiken Johanes ia i bas Lau Jordan.

6Paken Johanes e me kap: jubahna i bas mbulu unta nari, genditna i bas kuling-kuling nari, nakanna labang ras tengguli kerangen.

7Ikatakenna pe man kalak ndai nina, "Reh me sekalak si lebih erkuasa asangken aku. Mungkuk ngosari tinali sepatuna pe aku la metunggung.

8Aku, mpridiken kam alu lau, tapi Ia pagi, mpridiken kam alu Kesah Si Badia."

Jesus iperidiken ras icubai si Iblis Ia (Mat 3:13-4:11; Luk 3:21-22, 4:1-13)

9La ndekahsa kenca si e, reh Jesus i Nasaret taneh Galilea nari. Ia pe iperidiken Johanes i bas Lau Jordan.

10Ndarat kenca Jesus i bas lau nari, rempet IdahNa langit talang, janah Kesah Si Badia nusur ku BaboNa bagi nderapati.

11Terbegi pe sora i Surga nari, "Kam kap AnakKu si Kukelengi, Kam kap si ngena ateKu."

12Kenca si e minter Ia ibabai Kesah Si Badia ku taneh si mesawang.

13Dekahna Ia i je lit empat puluh wari. I je me Ia icubai si Iblis. I bas ingan e, melala pe rubia-rubia si merawa. Tapi malekat-malekat reh nampati Ia.

Jesus ndilo empat kalak penjala nurung (Mat 4:12-22; Luk 4:14-15, 5:1-11)

14Kenca Johanes Peridiken ipenjaraken, lawes Jesus ku Galilea. IberitakenNa Berita Si Mehuli si rehna i bas Dibata nari nina,

15"Nggo seh paksa Kinirajan Dibata reh deherna. Jeralah i bas dosandu nari janah teklah nandangi Berita Si Mehuli!"

16Sanga Jesus erdalan arah tepi Dano Galilea, IdahNa dua kalak penjala nurung sangana njala. Gelarna Simon ras Andreas; duana ia sembuyak.

17Nina Jesus man si dua kalak e, "Mari ikutken Aku, maka Kuajari kam ndilo kalak si deban jadi ajar-ajarKu."

18Minter itadingkenna jalana janah ikutkenna Jesus.

19La ndauhsa Jesus erdalan IdahNa ka dua kalak si ersembuyak, e me Jakup ras Johanes anak Sebedeus, sanga nikapken jalana i bas perahuna.

20Minter idilo Jesus duana. Emaka itadingkenna bapana Sebedeus ras kalak upahen i bas perahuna jenari ikutkenna Jesus.

Sekalak si setanen (Luk 4:31-37)

21Seh ia kerina i kota Kapernaum. Asum wari Sabat kalak Jahudi minter lawes Jesus ku rumah persembahen jenari IbenakenNa ngajar.

22Ia ngajar la bali ras guru-guru agama. Ia ngajar alu kuasa. Emaka mamang ate kalak si megi PengajarenNa.

23Paksa si e reh sekalak setanen ku bas rumah persembahen janah serko ia nina,

24"Man kadendu kin kami o, Jesus kalak Nasaret? Reh AteNdu munuh kami kin? Kueteh nge ise Kam. Kam me persuruhen Dibata!"

25Isergangi Jesus setan ndai nina, "Sinik! Ndaratlah i bas ia nari!"

26Idampes-dampesken setan e si setanen ndai, emaka ndarat setan e i bas ia nari janahna serko.

27Kerina kalak kemamangen. Si sungkun-sungkunen ia sapih-sapih ia nina, "Kai kin enda ndia? Pengajaren si mbaru? I bas Ia lit kuasa. IpelawesNa setan-setan, janah setan-setan ngikutken KataNa!"

28Emaka berita kerna Jesus pedas mbar ku belang-belang taneh Galilea.

Ipepalem Jesus nterem jelma (Mat 8:14-17; Luk 4:38-41)

29Jesus ras ajar-AjarNa nadingken rumah persembahen, lawes ku rumah Simon ras Andreas, ikut pe Jakup ras Johanes.

30Mami Simon ampar i bas ingan medem perbahan sakit. Kenca seh Jesus i rumah, minter seh BaNa berita enda.

31Idahi Jesus mami Simon ndai, IjemakNa tanna, emaka IpekekeNa, janah minter malem penakitna. Jenari kuskas mami Simon ngelai Jesus ras kalak ndai kerina.

32Kenca sundut matawari nggo, nandangi gelap, ibaba kalak man Jesus kerina si penakiten ras si setanen.

33Kerina anak kuta e pulung i lebe-lebe rumah ndai.

34Erbage-bage penakit jelma si nterem IpepalemNa, janah setan-setan pe IpelawesNa. La ipediat Jesus pe setan-setan e ngerana, sabap ieteh setan-setan ise Ia.

Jesus ngajar i Galilea (Luk 4:42-44)

35Pepagina erpagi-pagi si lampas ope denga terang wari keke Jesus lawes Ia ku ingan si melenget. I je ertoto Ia ertoto.

36Tapi Simon ras teman-temanna lawes ndarami Ia.

37Kenca jumpa nina man Jesus, "Kerina kalak ndarami Kam."

38Erjabap Jesus, "Kita arus berkat ku kuta-kuta si deban, i taneh Galilea enda, gelah i je pe Kuberitaken ka Berita Si Meriah. Sabap guna si e kap maka Aku reh."

39Emaka isiari Jesus kerina kuta-kuta i Galilea. Ngajar Ia i bas rumah persembahen kalak Jahudi janah IpelawesNa setan-setan.

Ipepalem Jesus sekalak si gadamen (Mat 8:1-4; Luk 5:12-16)

40Reh me sekalak gadamen ndahi Jesus, nembah erjimpuh i lebe-lebe Jesus mindo perkuah AteNa nina, "Bicara nggit Kam, ngasup kap Kam pepalem aku."

41Mekuah ate Jesus IdudurkenNa TanNa janah IjemakNa kalak gadamen ndai jenari nina Jesus man bana, "Nggit Aku, malemlah kam."

42Minter malem gadamna janah mejelis pe dagingna.

43Jenari isuruh Jesus ia lawes janah IpedahiNa,

44"Jaga, ola turiken man ise pe kerna si enda. Tapi laweslah, cidahken bandu man imam. Gelah tek kalak maka kam nggo malem, bahan persembahenndu bagi isuruh Musa."

45Emaka lawes kalak si nggo malem ndai. Tapi la tergengkenca sinik. Ku ja ia lawes, i je iturikenna kerna Jesus si pepalem ia. Perbahan si e, lanai terang-terangen Jesus reh ku bas sada-sada kuta. Emaka i bas ingan si melenget Ia. Bage gia rehen nge kalak i ja nari pe ndahi Ia.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel