Alkitab Mobile SABDA
[VER] : [KARO]     [PL]  [PB] 
 <<  Markus 13 >> 

Ituriken Jesus kerna keruntuhen Rumah Pertoton (Mat 24:1-2; Luk 21:5-6)

1Sanga Jesus ndarat i bas Rumah Pertoton nari, ngerana sekalak ajar-AjarNa man BaNa nina, "O Guru, nehenlah seh kal galangna batu enda janah seh kal jilena gedung enda."

2Ngaloi Jesus nina, "Idahndu gedung si galang enda? Lanai lit sada batu pe pagi tading i bas inganna; kerina pagi iruntuhken."

Kiniseran ras peniksan (Mat 24:3-14; Luk 21:7-19)

3Asum kundul Jesus i datas Uruk Seton petingtang Rumah Pertoton, reh me Petrus, Jakup, Johanes ras Andreas ndahi Ia. Sanga si e ise pe la lit i je, ia ngenca kerina. Emaka nungkun ajar-ajar si empat kalak enda man Jesus nina,

4"Katakenlah man kami ndigan kin jadi e? Kai tanda-tandana si encidahkenca maka nggo ndeher kejadin e?"

5Emaka nina Jesus man bana, "Jagailah bandu, ola kam pagi papak ibahan kalak.

6Nterem pagi kalak reh i bas gelarKu nina, 'Aku kap Ia!' Janah nterem jelma itipuna.

7Bage pe ola gulut ukurndu adi ibegindu sora perang, ntah berita-berita kerna perang. Kerina si e arus jadi, tapi labo ertina maka nggo seh kedungenna.

8Negara pagi ngelawan negara, kerajan pagi ngelawan kerajan. I jah i je jadi taneh linuren, ras paksa kelihen. Kerina e bagi persui sekalak diberu si nandangi mupus ngenca.

9Emaka jagalah bandu! Kam pagi itangkap janah iadili i pengadilen agama. Kam pagi ipekpeki i bas rumah persembahen; kam pagi tedis i lebe-lebe kalak si erkuasa ras raja-raja erkiteken Aku gelah iturikenndu Berita Si Mehuli man bana.

10Berita Si Mehuli e arus ipeseh lebe man kerina bangsa.

11Janah adi itangkapnandu dingen iadilina ola gulut ukurndu kerna kai si arus ikatakenndu. Katakenlah kai si ibereken Dibata man bandu paksa e. Sabap kai si ikatakenndu e labo i bas kam nari, tapi reh i bas Kesah Si Badia nari.

12Kalak si ersenina ndudurken seninana gelah ibunuh, bage pe sekalak bapa nandangi anakna. Anak-anak pe ngelawan orang tuana, janah ibunuhna pe orang tuana e.

13Kerina kalak rate segat man bandu erkite-kiteken Aku. Tapi kalak si megeng-geng seh ku kedungenna terkelin kap."

Perbahanen si ngelawan Dibata (Mat 24:15-28; Luk 21:20-24)

14"Idahndu pagi 'kejahaten Siencedai' tedis i bas ingan si la kin arusna. (Iantusi si ngogesa min kai erti kata enda.) Paksa si e pagi kalak si ringan i Judea arus kiam ku uruk-uruk.

15Kalak si kundul-kundul i darat pekesahken olanai bengket ku rumah ngelegi barang-barangna.

16Kalak si sangana i juma olanai ku rumah ngelegi uisna.

17Andiko, kuahna ate pernanden si sangana mehuli kulana bage pe pernanden si sangana pepinemken paksa si e.

18Ertotolah man Dibata gelah si enda ola jadi i bas paksa perudan.

19Sabap i bas paksa si e pagi reh me kiniseran si seh kal ngerina, langa pernah jadi bage mulai kin ijadiken Dibata doni enda, seh asa genduari enda, janah lanai bo denggo jadi bagi si e.

20Tapi beligan warina nggo ipegendeki Tuhan. Adi la kin IpegendekiNa, ise pe lanai bo lit terus nggeluh. IpegendekiNa wari kiniseran e nginget kalak pilihen si nggo IpilihNa.

21Jenari adi lit pagi kalak si ngatakenca man bandu, 'Nehenlah, i jenda nge Raja Penampat si ipadanken Dibata!', ntah 'Ah i jah kap Ia,' ola kam tek katana e.

22Sabap reh me pagi Raja Penampat palsu ras nabi-nabi palsu. Ibahanna tanda-tanda sengget, adi banci, gelah papak kalak si nggo ipilih Dibata.

23Emaka metengetlah kam! Nggo Kuturiken enda kerina man bandu ope denga jadi."

Kerehen Anak Manusia si isuruh Dibata (Mat 24:29-31; Luk 21:25-28)

24"Kenca lepas wari-wari kiniseran e, matawari jadi gelap, bulan pe lanai ersinalsal.

25Bintang-bintang nartar i langit nari janah kuasa-kuasa i langit mugur-ugur.

26Jenari teridah me Anak Manusia si isuruh Dibata reh i bas embun, alu kuasa si mbelin ras erdolat.

27Asum e pagi IsuruhNa malekat-malekat lawes ku Utara, Timur, Selatan bage pe ku Barat janah IpepulungNa kerina kalak si nggo ipilih Dibata i tampuk doni nari seh ku tampuk langit."

Pelajaren i bas batang ara nari (Mat 24:32-35; Luk 21:29-33)

28"Erlajarlah kam i bas batang ara nari. Adi nggo meratah melembut rangas-ranggas janah mulai ertunas, ietehndu maka musim perlego nggo ndeher.

29Bage pe adi idahndu pagi si Kukataken ndai kerina jadi, maka nggo ietehndu, paksana nggo ndeher, janah molai me.

30Ingetlah! Kerina si e jadi pagi ope denga mate kerina manusia si nggeluh genduari enda.

31Langit ras doni masap kap pagi, tapi KatangKu tetap rasa lalap."

Ise pe la meteh warina ntah jamna (Mat 24:36-44)

32"Kerna warina ntah pe jamna, ise pe la lit si metehsa. Malekat-malekat i surga pe lang, janah Anak Dibata pe la meteh tapi Bapa ngenca metehsa.

33Metenget janah erjaga-jagalah kam, sabap la ietehndu ndigan paksana.

34Si enda bali me ras sekalak si lawes ku negeri si ndauh nadingken rumahna. Iberekenna kuasa man kerina si erdahinna gelah ertanggung jawab ia i bas dahinna sekalak-sekalak. Man si njaga pintun ikataken tuan ndai gelah ia erjaga-jaga.

35Emaka erjaga-jaga kam, sabap la ietehndu katawari tuan rumah ndai reh, banci jadi karaben, banci jadi tengah berngi, banci ka pe tekuak manuk ntah pe erpagi-pagi.

36Gelah adi rempet ia reh, la kam tunduh idapetina.

37Kai si Kukataken man bandu enda, Kukataken pe man kerina jelma: Erjaga-jaga ras metengetlah."


  Share Facebook  |  Share Twitter

 <<  Markus 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel