Dual PanelRencana nangkap Jesus (Mat 26:1-5; Luk 22:1-2; Yoh 11:45-53)
1Dua wari nari Wari Raya Paskah ras Roti si la erragi, idarami imam-imam si mbelin ras guru-guru agama me dalan guna nangkap Jesus alu erbuni-buni janah ibunuhna atena.
2Nina kalak e sapih-sapih ia, "Ula asum Wari Raya e sidalanken, gelah ola guntar kalak si nterem."
Jesus iminaki i Betani (Mat 26:6-13; Yoh 12:1-8)
3Asum Jesus i rumah Simon si nai sakit gadamen, i Betani, paksa man reh me sekalak diberu, ibabana sada botol dem minak si merim si meherga kal. Minak e ibahan i bas urat sinian-sinuan si merim nari. Ipecahkenna botol minak e jenari icurcurkenna ku takal Jesus.
4Piga-piga kalak si lit i je jungut-jungut nina sapih-sapih ia, "Ngkai maka iambur-ambur minak si merim e?
5Ma kin banci idayaken lebih telu ratus duit pirak, janah duitna e ibereken man kalak musil?" Jenari irawaina pe diberu e.
6Tapi nina Jesus, "Pelepaslah! Ngkai maka iganggundu ia? Ia nggo erbahan si mehuli man bangKu.
7Adi kalak musil usur nge pagi ras kam janah adi bage atendu banci isampatindu katawari pe. Tapi Aku labo lalap ras kam.
8Diberu enda ibahanna asa ngasupna. Iminakina dagingKu ope denga Aku ikuburken.
9Ingetlah! I japa pe pagi iberitaken Berita Si Mehuli i belang-belang doni enda, ituriken pe kerna kai si nggo ibahan diberu enda ndai guna nginget ia."
Judas erpadan ndudurken Jesus (Mat 26:14-16; Luk 22:3-6)
10Judas Iskariot e me sekalak i bas ajar-ajar si sepulu dua; lawes ia ndahi imam-imam si mbelin guna ngataken maka ia nggit ngendesken Jesus man bana.
11Meriah kal ukur imam-imam si mbelin megi kai si ikataken Judas Iskariot e. Jenari mulai me idaramina kesempaten si mehuli guna ngendesken Jesus.
Jesus man-man Paskah ras ajar-AjarNa (Mat 26:17-25; Luk 22:7-14; Yoh 13:21-30)
12I bas wari si pemena wari raya roti si la itama ragi, e me sanga kalak nggeleh biri-biri Paskah, nungkun ajar-ajar man Jesus nina, "Ku ja sura-SuraNdu kami lawes nikapken pangan Paskah man Bandu?"
13Emaka isuruh Jesus dua kalak ajar-AjarNa nina, "To lawes ku kota ah; i je jumpa kam kari ras sekalak dilaki si maba lau tare guci. Ikutken ia ku rumah, janah sungkun kari si mada rumah e;
14'Nina Guru: Kamar si apai banci Kupake ras ajar-ajarKu guna man-man Paskah?'
15Emaka ituduhkenna kari man bandu sada kamar si mbas i datas loteng, si nggo sikap. I je me sikapkenndu kerina kai si perlu guna man-man Paskahta."
16Berkat me si dua kalak e janah seh kenca ia i kota, idapetina kerina bagi si nggo ikataken Jesus man bana. Jenari isikapkenna pangan guna Paskah e.
17Kenca gelap reh me Jesus ras ajar-AjarNa.
18Paksa ia man kerina, ngerana Jesus nina, "Begikenlah: sekalak kam si sangana man ras Aku paksa enda, ngendesken Aku kap pagi."
19Ceda ate ajar-ajar e, janah molai nungkun pegancih-gancih man Jesus nina, "Ma labo aku KataNdu?"
20Erjabap Jesus, "Jelmana e me kap sekalak i bas kam si sepulu dua enda, e me si sada perpangan ras Aku.
21Anak Manusia si isuruh Dibata la banci lang mate nge pagi bagi isuratken kerna Ia i bas Pustaka Si Badia. Tapi andiko, cilaka kap kalak si ngendesken Anak Manusia si isuruh Dibata e. Ulin kin min nai la ia tubuh."
Lakon Persadan si Badia (Mat 26:26-30; Luk 22:14-20; 1Kor 11:23-25)
22Sanga Jesus ras ajar-AjarNa man, ibuat Jesus roti, ertoto Ia ngataken bujur man Dibata, jenari icepik-CepikNa roti e janah IberekenNa man ajar-AjarNa. Nina Jesus, "Buatlah, enda me badanKu."
23Kenca bage IbuatNa ka calung, ertoto Ia ngataken bujur man Dibata jenari IberekenNa man ajar-AjarNa, janah kerina ia minem tare calung e.
24Nina Jesus, "Enda me darehKu si iamburken guna nterem jelma, si ngesahken padan Dibata.
25Kukataken pe man bandu, maka lanai bo pagi Kuinem lau anggur. Tapi denggo Kuinem anggur si mbaru i bas Kinirajan Dibata."
26Kenca bage kerina ia ngendeken ende-enden pujin, jenari lawes Ia ku Uruk Seton.
Ikataken Jesus maka ipersoken Petrus pagi Ia (Mat 26:31-35; Luk 22:31-34; Yoh 13:36-38)
27Nina Jesus man ajar-AjarNa, "Kerina kam pagi kiam nadingken Aku, sabap nggo tersurat i bas Pustaka Si Badia, 'Permakan e pagi ibunuh Dibata janah biri-biri e kerina merap.'
28Tapi kenca Aku ipekeke, leben pagi Aku ku Galilea asa kam."
29Ngaloi Petrus nina, "Aku labo pagi nggit nadingken Kam, aminna gia kerina kalak enda kiam."
30Nina Jesus man Petrus, "Ingetlah! I bas berngi enda pe, ope tekuak manuk dua kali, nggo ipersokenndu Aku telu kali."
31Reh lantangna Petrus ngaloi nina, "Asa ndigan pe la Kam kupersoken, amin terpaksa pe aku mate ras Kam!" Janah ajar-ajar si deban pe kerina ngataken bagi si ikataken Petrus enda.
Jesus ertoto i Peken Getsemane (Mat 26:36-46; Luk 22:39-46)
32Seh me Jesus ras ajar-AjarNa i bas sada ingan gelarna Getsemane. Nina Jesus man ajar-AjarNa, "Kundul kam i jenda, Aku ertoto lebe."
33Ibabana Petrus, Jakup ras Johanes ngikut ras Ia. Paksa e ceda ate Jesus dingen getem kal PusuhNa,
34janah nina man ajar-AjarNa si telu kalak, "Ceda kal ateKu, bagi si mate atena Aku. Timai i jenda, ola kam tunduh."
35Lawes Ia terdauhen sitik nari, jenari erjimpuh Ia i taneh, janah ertoto Ia gelah adi banci, ola min IbentasiNa paksa kiniseran e.
36Nina i bas PertotonNa, "O BapangKu, o BapangKu! La kap lit si metahat i bas Kam. Agui min calung kiniseran enda i bas Aku nari. Tapi labo peratenKu, PeratenNdu lah jadi."
37Kenca bage mulihken Ia, IdapetiNa ajar-ajar si telu kalak ndai tunduh. Emaka nina man Petrus, "O Simon, tunduh kam e? La kam ngasup la tunduh sada jam pe?" Nina ka Jesus man bana teluna,
38"Erjaga janah ertotolah gelah ola kam ndabuh ku bas percuban. Ukurndu mehuli kap tapi dagingndu kote."
39Jenari lawes ka Ia ertoto bagi si ndai.
40Asum Ia mulihken ka, idapetina ajar-ajar si telu ndai tunduh; la termedakkenca matana, bage pe lanai teraloisa Jesus.
41Asum mulihken Jesus petelu kaliken, IsungkunNa ajar-AjarNa si telu e nina, "Medem dingen tunduh denga kin kam? Nggo me bias! Nggo seh paksana, maka Anak Manusia si isuruh Dibata iendesken ku bas kuasa kalak perdosa.
42Kekeken, ota lawes kita. Nehenlah, si ngendesken Aku nggo reh."
Jesus itangkap (Mat 26:47-56; Luk 22:47-53; Yoh 18:3-12)
43Sanga Jesus ngerana denga, reh Judas, e me sekalak i bas ajar-ajar si sepulu dua kalak e. Ibabana sada rombongen si maba pedang ras perpalu, e me rombongen si isuruh imam-imam si mbelin ras guru-guru agama bage pe peminpin-peminpin kalak Jahudi.
44Si ndudurken Jesus nggo mereken tanda man kalak ndai, nina, "Si kuema e me kari kalakna, tangkap janah baba, olanai pulah."
45Kenca seh Judas ndai minter ideherina Jesus nina, "O Guru!" Jenari iemana Jesus.
46Emaka itangkap kalak ndai Jesus jenari iketna.
47Tapi sekalak i bas ia si tedis i je isintakna pedangna, jenari itampulna juak-juak Imam si Mbelin seh retap cupingna.
48Emaka ngerana Jesus man kalak si reh ndai nina, "Iatekndu kin Aku enda sekalak pengerampok maka reh kam maba pedang ras perpalu guna nangkap Aku?
49Idahndu nge Aku tep-tep wari ngajar i bas Rumah Pertoton, janah labo itangkapndu Aku. Tapi arus nge isehken kai si tersurat i bas Pustaka Si Badia."
50Kenca bage kiam kerina ajar-ajar nadingken Jesus.
51Lit me sekalak anak perana si ngikutken Jesus, uisna selambar kain putih ngenca. Icubaken kalak ndai pe nangkap ia,
52tapi itadingkenna uisna e jenari kiam ia manjang-anjang.
Jesus i lebe-lebe Pengadilen Agama (Mat 26:57-68; Luk 22:54-55, 63-71; Yoh 18:13-14, 19-24)
53Emaka ibaba kalak ndai Jesus kurumah Imam si Mbelin. I je nggo pulung kerina imam-imam si mbelin, peminpin-peminpin ras guru-guru agama.
54Petrus ngikut-ngikut i dauh-dauh nari seh ku kesain rumah Imam si Mbelin e. I je ia kundul ras pengawal-pengawal janahna cudu deher api.
55Imam-imam si mbelin bage pe Pengadilen Agama e ndarami bukti-bukti si nalahken Jesus, gelah banci Ia ibunuh; tapi la lit idatna.
56Nterem saksi si ngataken si la tuhu kerna Jesus, tapi sada pe la seri katana.
57Dungna tedis piga-piga kalak saksi ngelawan Jesus alu tuduhen palsu,
58nina, "Nggo pernah ibegi kami maka nina Jesus enda, 'Kuruntuhken pagi Rumah Pertoton si ibahan manusia enda, janah kenca telu wari Kupajekken ka sada si labo bekas manusia erbahan.'"
59Kesaksin enda pe la seri ras kesaksin kalak si deban.
60Emaka tedis me Imam si Mbelin i lebe-lebe kalak si ersidang e jenari isungkunna Jesus nina, "La kin lit jabapndu nandangi tuduhen saksi-saksi enda man bandu?"
61Sinik saja Jesus, kai pe nina lang. Emaka isungkun Imam si Mbelin ndai ka Ia sekali nari nina, "Kam kin Raja Penampat si ipadanken e, e me Anak Dibata si Badia e?"
62Erjabap Jesus nina, "Aku me, janah pagin idahndu Anak Manusia si ipadanken Dibata kundul arah kemuhen si Mada Kuasa janah reh me ras embun i langit nari!"
63Minter icaingken Imam si Mbelin ndai baju dinasna, janah nina, "Man kai nari kin saksi?
64Nggo ibegindu uga PencekurakiNa Dibata. Kuga pengakapndu kerina?" Kerina ia ngatakenca maka Jesus e ersalah janah ersada arihna gelah Jesus ibunuh.
65Piga-piga kalak mulai enciduri Jesus, itutupina ayo Jesus jenari itinjuina janah nina, "Kataken ise si ninju Kam!" Pengawal-pengawal pe ikut mbalmbal Ia.
Petrus mersoken Yesus (Mat 26:69-75; Luk 22:56-62; Yoh 18:15-18, 25-27)
66Asum Petrus i teruh denga, i kesain rumah Imam si Mbelin, reh me sekalak diberu, suruh-suruhen Imam si Mbelin e.
67Sanga idahna Petrus cudu, ipernehenna kal janah nina, "Kam kap salah-sada teman Jesus kalak Nasaret e."
68Tapi merso Petrus nina ngaloi, "La kueteh ... la kuangka pe kai si ikatakenndu e." Jenari lawes ia ku kesain si arah lebe. Paksa e pe tekuak manuk sekali.
69Idah diberu ndai denga ka Petrus i je, emaka ikatakenna man kalak si lit i je nina, "Ia kap sekalak ajar-ajar Jesus e!"
70Tapi e pe ipersoken Petrus ka nge. Lanai ndekahsa kenca si e lit kalak nuduh ia nina, "Lanai bo terpersoken; nggo pasti kam salah sada i bas kalak e, sabap kam pe i Galilea nari!"
71Emaka ersumpah Petrus nina, "Mate gia aku, adi kutandai kin tuhu si ikatakenndu e!"
72Paksa e pe minter tekuak manuk si pedua kaliken. Inget Petrus pe kai si nggo ikataken Jesus man bana, e me, "Ope denga tekuak manuk dua kali, nggo ipersokenndu Aku telu kali!" Emaka erkadiola kal Petrus emaka tangis kal ia kesi-kesi.