Alkitab Mobile SABDA
[VER] : [KARO]     [PL]  [PB] 
 <<  Markus 3 >> 

Ipepalem Jesus sekalak si tanna mate serapen (Mat 12:9-14; Luk 6:6-11)

1Emaka bengket ka Jesus ku rumah persembahen kalak Jahudi. I je lit sekalak si sembelah tanna nggo kesip perban mate serapen.

2I bas si pulung e lit piga-piga kalak si ndaram-ndarami kesalahen Jesus gelah banci iaduken. Emaka terus iperdiatekenna Jesus ntah IpepalemNa kin kalak i bas wari Sabat.

3Nina Jesus man si mate serapen tanna ndai, "Mari tedis kam i lebe enda!"

4Emaka isungkun Jesus kalak ndai nina, "Rikutken agama, kai kin banci ibahan i bas wari Sabat? Erbahan si mehuli ntah si jahat? Nampati geluh manusia ntah munuhsa?" Tapi sinik saja kalak ndai.

5Merawa Jesus, IpernehenNa jelma SekelewetNa. Tapi ceda ka AteNa ngidah perukuren kalak Parisi ndai. Emaka nina man si mate serapen tanna ndai, "Pepinter tanndu." Ipepinterna tanna janah minter malem.

6Jenari lawes kalak Parisi, ijumpaina piga-piga kalak Herodiani. Arih-arih ia guna munuh Jesus.

Jelma si nterem i tepi dano

7Jesus ras ajar-AjarNa lawes ku Dano Galilea janah nterem jelma ngikutken Ia.

8Jelma si nterem enda ndai reh i Galilea nari, i Judea nari, i Jerusalem nari, i Idumea nari, i lepar Lau Yordan nari ras kuta-kuta deherken Tirus ras Sidon nari. Kalak si nterem e reh ndahi Jesus sabap ibegina berita kerna perbahanen Jesus.

9Perbahan seh kal teremna jelma si reh e, emaka isuruh Jesus ajar-AjarNa nikapken sada perahu guna Ia. Alu bage jelma si nterem lanai ngasak-ngasak ku Ia.

10Sabap nggo nterem jelma IpepalemNa, emaka kerina kalak si penakiten siasak-asaken ndahi Jesus, atena njemak Jesus gelah malem penakitna.

11Bage pe adi lit kalak si setanen ngidah Jesus, minter ia reh, iguling-gulingna bana i lebe-lebe Jesus janahna serko nina, "Kam kap Anak Dibata!"

12Tapi alu mesangat ilarang Jesus kesah si jahat nuriken ise kin Ia.

Jesus milih Rasul si sepulu dua kalak (Mat 10:1-4; Luk 6:12-16)

13Emaka lawes Jesus ku das uruk-uruk, janah IdiloNa kalak rikutken si payo IakapNa. Kalak enda ndai reh ndahi Jesus.

14Emaka itetapken Jesus sepulu dua kalak jadi Rasul. Nina Jesus man si sepulu dua kalak ndai, "Kam nggo Kupilih gelah ras Aku. Kusuruh kam ngajar,

15janah lit kuasandu mpelawes setan-setan."

16Enda me gelarna si sepulu dua kalak si ipilih Jesus; Simon (igelari Petrus),

17Jakup ras seninana Johanes anak Sebedeus (duana ia igelari Jesus si Boanergis, ertina, "Anak lenggur").

18Andreas, Pilipus, Bartolomeus, Matius, Tomas, Jakup anak Alpeus, Tadius, Simon Pejuang,

19janah Judas Iskariot, si ndayaken Jesus.

Jesus ikataken kalak Baalsebul (Mat 12:22-32; Luk 11:14-23, 12:10)

20Kenca Jesus mulih ku rumah, minter ka pulung jelma si nterem, seh maka lanai sempat Jesus ras ajar-AjarNa man.

21Sanga ibegi keluarga cakap maka Ia lanai sehsa, emaka reh ia ngelegi Jesus.

22Guru-guru agama si reh i Jerusalem nari ngatakenca maka i bas Ia lit Baalsebul. "Pengulu setan e nge si mereken kuasa man BaNa maka TerpelawesNa setan-setan," nina.

23Emaka idilo Jesus kalak ndai, jenari IturikenNa piga-piga perumpaman nina, "Kuga banci setan mpelawesken setan?

24Adi i bas sada negara lit perubaten ras perpecahen tentu la ndekah umur negara ndai.

25Bage pe adi i bas sada jabu turah rusur perubaten, tentu la ndekah umur jabu e.

26Jadi adi kerajan setan erbelah-belah tentu lanai ia erkuasa, janah nggo seh pe kedungenna.

27Ise pe labo ngasup bengket ku bas rumah kalak si megegeh guna ngerampasi erta-ertana, pala iketna lebe kalak si megegeh ndai, emaka banci irampasina.

28Ingetlah! Kerina dosa-dosa ras cakap si enghina Dibata banci ialemi Dibata.

29Tapi kalak si enghina Kesah Si Badia asa ndigan pe la ialemi. Sabap nggo ibahanna dosa si rasa lalap."

30Enda ikataken Jesus sabap piga-piga nggo ngatakenca maka Ia keseluken setan.

Nande Jesus ras senina-SeninaNa (Mat 12:46-50; Luk 8:19-21)

31Emaka reh nande Jesus ras senina-SeninaNa. Isuruhna kalak ku rumah ndilo Jesus, janah ia kerina nimai i darat.

32Ikataken kalak si nterem si kundul i kelewet Jesus e man BaNa nina, "Ah NandeNdu ras senina-SeninaNdu i darat, Kam atena."

33Erjabap Jesus nina, "Ise kin nandengKu? Ise kin seninangKu?"

34Ipernehen Jesus kerina kalak si kundul i KelewetNa jenari nina, "Nehenlah! Enda me nandengKu ras seninangKu!

35Ise si nehken peraten Dibata, ia me seninangKu, turangKu ras nandengKu."


  Share Facebook  |  Share Twitter

 <<  Markus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran