Kiniteken man TUHAN
1Masmur Daud. Aku ernalem man TUHAN. Seh kal bodohna kalak si ngerana man bangku nina, "Kabanglah kam ku deleng-deleng desken perik,
2sabap nggo ipegesteng kalak jahat panahna dingen i bas gelap nari nggo irentangna kempak kalak bujur.
3La lit kai pe banci ilakoken kalak bujur, adi palas kebujuren nggo iruntuhken."
4TUHAN lit i bas RumahNa si badia; kesain KinirajanNa lit i Surga. Kerina kalak IperdiatekenNa ItehNa kai sangana ibahan manusia.
5Iujina kalak bujur ras kalak jahat, dingen nembeh kal AteNa kempak kalak si erngena ate man si jahat.
6Ipesusurna batu merara, kertah gara ku babo kalak jahat; jenari iukumna alu angin melas.
7TUHAN adil dingen ngena AteNa perbahanen si mehuli. Kalak si ngelakoken PerentahNa, nggeluh me i bas adep-AdepenNa.