Dual PanelPulah idur kematen nari
1Keleng ateku man TUHAN, sabap IdengkehkenNa aku, IbegikenNa pertotonku.
2IbegikenNa aku tep-tep kali aku erlebuh man BaNa.
3Bahaya kematen ngkeleweti aku, kuburen si mejin nggo ndeheri aku, mbiar dingen aru kal ateku.
4Emaka ningku nderkuh man TUHAN, "Mindo kal aku BaNdu, o TUHAN, pulahi min aku!"
5TUHAN e perkuah dingen bujur kap, Dibatanta e perkeleng kap.
6Ikawali TUHAN kap kalak si la lit si nampatisa, tupung aku i bas kebiaren, TUHAN si mulahisa.
7O tendingku, tenenglah, sabap TUHAN tetap erbahan si mehuli man bandu.
8TUHAN nggo mulahi aku i bas kematen nari, IsapuiNa iluhku janah IkawaliNa perdalanku gelah ula guling.
9Emaka banci aku erdalan i adep-adepen TUHAN, ngenanami kegeluhen i doni enda.
10Aminna pe ningku, "Nggo mesui kal ateku," tapi tetap nge aku erkiniteken;
11Aminna pe aku i bas kebiaren janah ningku, "Ise pe labo terteki."
12Kai banci kuulihken man TUHAN, kerna kerina KiniulinNa man bangku?
13Kupersembahken lau anggur man TUHAN, kukataken bujur man BaNa, erkiteken PengkeliniNa aku, kusingetken me GelarNa.
14I bas perpulungen kerina BangsaNa, kupersembahken me kai si nggo kupadanken BaNa.
15Meherga man TUHAN, adi sekalak BangsaNa mate.
16Suruh-SuruhenNdu kap aku TUHAN, bali ras nandengku, aku pe erdahin guna Kam. Nggo aku IpulahiNdu idur kematen nari.
17Kubaba ateku BaNdu persembahen pengataken bujurku, janahku ertoto man BaNdu.
18I bas perpulungen kerina BangsaNdu, i bas RumahNdu si Badia i Jerusalem, kuendesken BaNdu kai si nggo kupadanken. Pujilah TUHAN!
19(Mzm 116:18)