Alkitab Mobile SABDA
[VER] : [KARO]     [PL]  [PB] 
 <<  Mazmur 119 >> 

Undang-undang TUHAN

1Malem kal ate kalak si geluhna la erpandangen, si ngikutken undang-undang TUHAN.

2Malem kal ate kalak si ngikutken perentah-PerentahNa, si ndarami Ia alu bulat ukur.

3Malem kal ate kalak si erdalan i bas dalan TUHAN, si la pernah erbahan kesalahen.

4O TUHAN, nggo IberekenNdu undang-UndangNdu man kami, gelah ipatuhi kami alu tutus.

5Ateku min maka tutus kal, i bas ndalanken peraturen-PeraturenNdu.

6Adi kerina PerentahNdu kuperdiateken, emaka la aku ijuruken.

7Tep-tep kali kupelajari KeputusenNdu alu tutus, kupuji Kam alu ukurku si bersih.

8Kupatuhi ateku undang-UndangNdu, ula kal aku ItadingkenNdu.

Kepatuhen nandangi undang-undang TUHAN

9Kuga banci anak perana njagai geluhna maka la erpandangen? Eme alu ngikutken KataNdu.

10Alu bulat ukurku kucubaken ndarami Kam, ula pediat aku nilah i bas KataNdu nari.

11Undang-UndangNdu kubuniken i bas ukurku, gelah ula aku erdosa man BaNdu.

12Kupuji Kam, o TUHAN, ajari aku peraturen-PeraturenNdu.

13Usur ateku melaskenca kerina undang-undang si nggo IberekenNdu.

14I bas ndalanken perentah-PerentahNdu meriah kuakap, riahen asangken ndatken erta-erta si melala.

15Kerina KeputusenNdu ku kusur-kusur i bas pusuhku, kupergermetken pelajaren si IberekenNdu.

16Meriah ateku i bas ndalanken undang-UndangNdu, KataNdu la kulupaken.

Keriahen i bas ndalanken undang-undang TUHAN

17Mekuahlah AteNdu man bangku suruh-SuruhenNdu, maka alu bage banci aku nggeluh ngikutken AjarNdu.

18Pemedak min matangku maka aku banci erpengidah, nandangi kebenaren undang-UndangNdu si rejin.

19Geluhku i bas doni enda kentisik ngenca, ula buniken undang-UndangNdu man bangku.

20Getem pusuhku perban tedeh kal ateku, katawari pe kueteh min ateku PeraturenNdu.

21Kalak si meganjang rukur IpandangNdu, kalak si nilah i bas PerentahNdu nari IsumpahiNdu.

22Pulahi aku i bas kalak percian ras si nghina nari, sabap kucikep kap KataNdu.

23Si erkuasa pulung jenari erpekat ngelawan aku, tapi PengajarenNdu kupekusur-kusur i bas pusuhku.

24KataNdu kap si ngajari aku, simereken keriahen i bas pusuhku.

Kebulaten ukur ngikutken undang-undang TUHAN

25Aku terdang i bas abu taneh, pegeluh min aku sue ras PadanNdu.

26Kuakuken kerina perbahanenku, jenari IaloiNdu aku, ajari min aku ndalani DalanNdu.

27Sampati min aku ngantusi undang-UndangNdu, gelah kupekusur-kusur i bas ukurku PerbahanenNdu si mejin.

28Pusuhku dem alu ceda ate, bere min bangku gegeh sue ras PadanNdu.

29Pedauh min aku i bas dalan kepapaken nari, erkiteken KiniulinNdu ajari min aku undang-UndangNdu.

30Nggo kuputusken maka aku tetap patuh man BaNdu, kuperdiateken me AturenNdu.

31O TUHAN, nggo kuikutken aturen-AturenNdu, ula pelepas maka mela kuakap.

32Alu ukur ersurak kuayaki perentah-PerentahNdu, sabap Kam simerekenca maka lit pengertinku.

Pertoton mindo kepentaren

33O TUHAN, ajarken bangku pengertin undang-UndangNdu, gelah kuikutken seh kedungenna.

34Terangken bangku undang-UndangNdu, maka kuikutken, kudalanken alu bulat ukurku.

35Bahan maka kuerti dingen kupatuhi undang-UndangNdu, sabap i bas matuhisa dat aku kemalemen ate.

36Bereken bangku kerincuhen ngikutken undang-UndangNdu, lebihen asangken kerincuhen jadi kalak bayak.

37Jagai min aku maka ula kuayaki si sea-sea, pegeluh min aku sue ras PadanNdu.

38Cikeplah enteguh PadanNdu man bangku suruh-SuruhenNdu, padan si IbahanNdu man kalak si erkemalangen man BaNdu.

39Pedauh min i bas aku nari penaling-nalingen si kubiari, andiko jilena keputusen-KeputusenNdu.

40Metedeh ateku aturen-AturenNdu, bereken bangku kegeluhen si mbaru, erkiteken KebenarenNdu.

Pengarapen nandangi undang-undang TUHAN

41O TUHAN, cidahken man bangku uga belinna keleng AteNdu, jenari kelini aku rikutken PadanNdu.

42Maka banci kujabap kalak si encekuraki aku, erkiteken tek aku man KataNdu.

43Sampati maka lalap banci aku erkata tuhu kerna kebenaren, sabap aku erpengarapen nandangi KeputusenNdu.

44Ateku lalap ngikutken undang-UndangNdu, rasa lalap seh rasa lalap.

45Nggeluh me aku i bas kebebasen, erkiteken kudarami AjarNdu.

46Kumomoken ateku peraturen-PeraturenNdu man raja-raja, dingen la aku ermela-mela.

47I bas ngikutken PerentahNdu, jumpa aku kemalemen ate, keleng pe ateku PedahNdu e.

48Kuhamati dingen kukelengi PerentahNdu, aturen-AturenNdu kuukuri.

Ernalem man undang-undang TUHAN

49Inget min PadanNdu kempak aku suruh-SuruhenNdu, padan si mereken pengarapen man bangku.

50Tupung i bas kiniseran pe terapul aku, erkiteken PadanNdu mereken kegeluhen man bangku.

51Kalak si meganjang rukur, megombang man bangku, tapi la aku nilah i bas undang-UndangNdu nari.

52O TUHAN, kuinget undang-UndangNdu si lit nuria-nuria nari, emaka terapul me aku.

53Adi kuidah kalak jahat ngelanggar undang-UndangNdu, gara kal ateku.

54Kidekah geluhku si gendek i babo doni enda, undang-UndangNdu kujadiken ende-enden pujin.

55Tupung mbages berngi, kuinget Kam, TUHAN, janah undang-UndangNdu tetap kuukuri.

56Malem kal ateku, i bas ngikutken undang-UndangNdu.

Ketutusen ngikutken undang-undang TUHAN

57O TUHAN, Kam saja ngenca ateku, erpadan aku maka tetap kuikutken undang-UndangNdu.

58Alu mesek-sek, mindo aku man BaNdu, cidahken bangku perkuah AteNdu sue ras si nggo IpadankenNdu.

59Nggo kuukuri lagu langkahku, dingen erpadan aku matuhi aturen-AturenNdu.

60Alu lanai alang-alangen, minter kuikutken perentah-PerentahNdu.

61Itogeng kalak jahat siding man bangku, tapi la aku lupa nandangi undang-UndangNdu.

62I bas paksa tengah berngi e, keke aku, kupuji Kam sabap bujur kal PemutusenNdu.

63Kerina kalak si nembah man BaNdu, eme temanku, kerina si ngikutken undang-UndangNdu.

64O TUHAN, doni enda dem alu keleng AteNdu si tetap, emaka ajarilah aku undang-UndangNdu.

Undang-undang TUHAN meherga tuhu-tuhu

65O TUHAN, nggo ItepatiNdu PadanNdu, dingen melias Kam man bangku suruh-SuruhenNdu.

66Bereken man bangku kepentaren dingen pemeteh, erkiteken ernalem aku man perentah-PerentahNdu.

67Ope denga aku iukum Kam, semal aku erbahan salah, tapi genduari kuikutken KataNdu.

68Andiko melias kal Kam, mehuli kal Kam! Ajarken man bangku aturen-AturenNdu.

69Kalak megombang nggo erkata guak kerna aku, tapi alu bulat ukurku tetap kuikutken aturen-AturenNdu.

70Kalak si bage la iantusina undang-UndangNdu, tapi man bangku, eme si mereken kemalemen ate.

71UkumenNdu man bangku payo kap, gelah banci kupelajari aturen-AturenNdu.

72Man bangku ergan undang-UndangNdu, asangken kerina erta-erta i doni enda.

Kebujuren undang-undang TUHAN

73Kam kap si nepa ras si ngkawali aku, bereken man man bangku pengertin, maka banci kupelajari undang-UndangNdu.

74Kalak si nembah man BaNdu, senang ukurna jumpa ras aku, sabap ernalem aku man PadanNdu.

75Kueteh, o TUHAN, maka adil kap KeputusenNdu, erkiteken KesetianNdu maka aku IukumNdu.

76Petetap min ukurku alu keleng AteNdu si tetap, sue ras IpadankenNdu man bangku, suruh-SuruhenNdu.

77Mekuah min AteNdu, gelah aku nggeluh, sabap malem ateku i bas undang-UndangNdu.

78Mela min iakap kalak si megombang, erkiteken guak pengadunna kerna aku, tapi aku, tetap kuukuri PengajarenNdu.

79Rehlah min ndahi aku, kalak si nembah man BaNdu, maka itandaina aturen-AturenNdu.

80Sertalah pendalankenku perentah-PerentahNdu, maka ula pagi kuakap mela.

Pertoton mindo pembebasen

81Mejehe aku nimai keselamaten i bas kami nari, o TUHAN, aku ernalem man KataNdu.

82Nggo latih matangku nima-nimai kai si IpadankenNdu, nungkun Ukurku "Ndigan kin ndia aku IsampatiNdu?"

83Aku kesip desken gajut kulit si lanai ipake, amin bage pe la aku lupa man PerentahNdu.

84Asa kai nari aku dekahna nimai? Ndigan IukumNdu kalak si nindih aku?

85Kalak megombang, si la ngikutken undang-UndangNdu, nggo ikalina lubang nidingi aku.

86PeraturenNdu terteki kap, emaka sampati min aku, alu la ersebap kalak perguak ngelis-ngelis aku.

87Narus aku mate ibunuhna, tapi la kupersilahang aturen-AturenNdu.

88Erkiteken keleng AteNdu si tetap, pegeluh aku, gelah banci aku patuh ngikutken undang-UndangNdu.

Tek nandangi undang-undang TUHAN

89O TUHAN KataNdu tetap rasa lalap, rasa lalap seh rasa lalap i Surga.

90PertetapNdu enteguh rasa lalap, IpajekkenNdu doni, tahan rasa lalap.

91Sinasa lit seh paksa enda, lit erkiteken PerentahNdu, sabap kerina e suruh-SuruhenNdu kap.

92Undang-UndangNdu kap ulu kemalemen ateku, adi lang, nggo me aku mate perban kiniseranku.

93Asa ndigan pe la kupersilahang PerentahNdu, sabap arah PerentahNdu eme aku IpegeluhNdu.

94SikerajangenNdu kap aku, kelini min aku, nggo kuikutken ndalanken PerentahNdu.

95Kalak jahat nggempangi aku, lako munuh aku, tapi kupekusur-kusur ateku i bas ukurku kerna undang-UndangNdu.

96Nggo kueteh maka kai pe lit nge jangkana, tapi perentah-PerentahNdu serta kap.

Kekelengen nandangi undang-undang TUHAN

97Lanai tanggung keleng ateku man undang-UndangNdu, kukusur-kusur i bas ukurku gedang-gedang nu wari.

98Kerina PerentahNdu tetap kuinget katawari pe, emaka pentaren aku asangken imbang-imbangku.

99Pengertinku ngelebihi pengertin guru si ngajari aku, erkiteken kupekusur-kusur PerentahNdu i bas ukurku.

100Belinen kepentarenku asangken orang-orang tua, erkiteken kuikutken kerina PerentahNdu.

101Kerina perbahanen si jahat kusilahken, sabap kuikutken ateku KataNdu.

102AturenNdu la kupersilahang, erkiteken Kam jine gurungku.

103Andiko, entebu kal AturenNdu, tebun asangken tengguli.

104Dat aku kepentaren i bas undang-UndangNdu nari, emaka ciga kal ateku kata la tuhu.

Undang-undang TUHAN mereken terang

105KataNdu kap tendang man nahengku, nerangi dalan si kudalani.

106Padan si nggo kusumpahken, kusehken me, AturenNdu si bujur kupatuhi.

107Mekelek kal kiniseranku, jagai min geluhku sue ras si nggo IpadankenNdu.

108O TUHAN, aloken pertoton pengataken bujurku, jenari ajarken man bangku AturenNdu.

109Geluhku tetap i bas kebiaren, tapi la pernah kulupaken undang-UndangNdu.

110Itogeng kalak jahat siding nangkap aku, tapi la aku nilah i bas PerentahNdu nari.

111Perentah-PerentahNdu tetap jadi sikerajangenku rasa lalap, eme kap si pesenangken ukurku.

112Nggo tetap ateku lalap ngikutken undang-UndangNdu, seh kutampuk umur geluhku.

Undang-undang TUHAN si mereken dame

113Nembeh ateku man kalak si la bulat ukurna ngikutken Kam, tapi undang-UndangNdu keleng kal ateku.

114Kam kap pengawalku dingen pembelangku, kutamaken pengarapenku ku bas PadanNdu.

115O kalak jahat, laweslah i bas aku nari! Kupatuhi me perentah-perentah Dibatangku.

116Bere gegeh man bangku sue ras PadanNdu, gelah banci aku nggeluh. Ula min cengkal pengarapenku man BaNdu.

117Cikep min maka terkelin aku, jenari lalap kuperdiateken PerentahNdu.

118ItulakNdu kerina kalak si nilahken undang-UndangNdu, sura-surana si dem alu tipu, sia-sia me kerina.

119Kerina kalak jahat IpedirepNdu ras sampah, emaka keleng kal ateku PeraturenNdu kerina.

120Nggirgir aku perbahan mbiar man BaNdu, gentar aku erkiteken KeputusenNdu.

Kepatuhen nandangi undang-undang TUHAN

121Nggo kulakoken kai si mehuli dingen si payo, ula aku iendesken man imbang-imbangku.

122Erpadanlah maka Kam si nampati aku suruh-SuruhenNdu, ula pelepas kalak megombang nindihi aku.

123Meser matangku nimai PenampatNdu, nimai pembebasen si nggo IpadankenNdu.

124Bahan min bangku rikut keleng AteNdu si tetap, dingen ajarken min man bangku peraturen-PeraturenNdu.

125Suruh-SuruhenNdu kap aku, bereken min bangku pengertin, gelah banci kuantusi PengajarenNdu.

126O TUHAN, nggo seh paksana Kam bertindak, erkiteken nterem kal kalak la matuhi undang-UndangNdu.

127Keleng ateku man PeraturenNdu, lebihen asangken engkelengi emas murni.

128Eme sabapna kuikutken kerina PerentahNdu; dingen dalan si lepak nembeh ateku.

Kerincuhen matuhi undang-undang TUHAN

129Erdolat kap PengajarenNdu, emaka kupatuhi alu bulat ukurku.

130Adi ituriken AjarenNdu, mereken terang kap, mereken pengertin man kalak si langa erpemeteh.

131Kesah-kesah aku, i bas kerincuhen man PeraturenNdu.

132Tulihken dingen mekuah min AteNdu aku, bali ras PengkelengiNdu kerina kalak si ngkelengi Kam.

133Jaga maka ula aku guling, sue ras si nggo IpadankenNdu, ula pediat aku italuken si jahat.

134Tangtangi aku i bas kalak si nindihi aku, maka banci kuikutken PeraturenNdu.

135Pasu-pasu min aku alu siang AyoNdu, jenari ajarken man bangku undang-UndangNdu.

136Mambur iluhku desken lau belin, erkiteken undang-UndangNdu la ipatuhi kalak.

Peraturen-peraturen TUHAN mehuli dingen bujur

137Bujur kap Kam, o TUHAN, kerina AturenNdu pinter kap.

138Peraturen-peraturen si IberekenNdu, kerina mehuli dingen bujur.

139Gara pernembeh ateku, sabap la iperdiateken imbang-imbangku AjarenNdu.

140Andiko, seh kal teguhna PadanNdu, seh kal ateku jadina.

141Kitik dingen hina kal aku, tapi la kupersilahang AjarenNdu.

142KebenarenNdu tahan rasa lalap, undang-UndangNdu benar rasa lalap.

143Ceda kal ateku dingen getem pe pusuhku, tapi PeraturenNdu mereken keriahen man bangku.

144PeraturenNdu tetap bujur, bereken min bangku pengertin, maka aku nggeluh.

Pertoton mindo pembebasen

145Alu bulat ukurku erlebuh aku man BaNdu, o TUHAN, aloi kal aku, gelah kuikutken PerentahNdu.

146Erlebuh aku man BaNdu, kelini min aku, jenari kuikutken me undang-UndangNdu.

147Ope pultak matawari erlebuh aku man BaNdu, pengarapenku kutamaken ku bas PadanNdu.

148Gedang-gedang berngi matangku la tertunduh, aturen-AturenNdu kuukuri i bas pusuhku.

149O TUHAN, aloi min aku, erkiteken keleng AteNdu si tetap, cidahken min KeadilenNdu dingen jagai min geluhku.

150Nggo ndeher kalak si ngayak-ngayak aku, eme kalak si ndauh i bas undang-UndangNdu nari, dingen jahat ukurna.

151Tapi Kam o TUHAN, ndeher ras aku, dingen kerina PerentahNdu tetap rasa lalap.

152Nai-nai nari nggo kupelajari kerna AturenNdu, maka Kam si erbahanca ia tetap rasa lalap.

Pertoton mindo penampat

153Tatap min kesusahenku dingen tangtangi min aku, erkiteken labo kupersilahang undang-UndangNdu.

154Bela perkarangku dingen kelini min aku, bere maka aku nggeluh sue ras si IpadankenNdu.

155Kalak jahat, kutera pe labo terkelin, sabap la IikutkenNa undang-UndangNdu.

156O TUHAN, seh kal belinna perkuah AteNdu, bere maka aku nggeluh sue ras undang-UndangNdu.

157Nterem imbang-imbangku ras nindih aku, tapi la kupersilahang undang-UndangNdu.

158Ciga kal ateku ngidah penghianat-penghianat e, sabap la iikutkenna AjarenNdu.

159Nehen o TUHAN, uga kelengna ateku aturen-AturenNdu, keleng AteNdu la sambar-sambar, kelini min aku.

160KataNdu kap ulih kebenaren, kerina PenghakimenNdu benar.

Kepatuhen ngikutken undang-undang TUHAN

161Kalak si erkuasa nindas aku la ersabap, tapi nandangi undang-UndangNdu ngenca aku malang.

162Andiko riahna ukurku erkiteken PerpadanNdu, bali ras keriahen kalak si rempet ndatken erta-erta.

163Kerina si la tuhu nembeh dingen ciga ateku, tapi undang-UndangNdu keleng kal ateku.

164Pitu kali sada wari kukataken bujur man BaNdu, sabap bujur kap KeputusenNdu.

165Tuhu-tuhu senang iakap kalak si engkelengi undang-UndangNdu, la lit kai pe si banci erbanca ia guling.

166O TUHAN, kutimai Kam engkelini aku, janah ngelakoken kai si IperentahkenNdu.

167Kuikutken AjarNdu, alu bulat ukurku kukelengi ia.

168Kerina perentah dingen AturenNdu kuikutken, IdahNdu kap kai pe si kubahan.

Pertoton mindo penampat

169Mbera seh sorangku man BaNdu, o TUHAN! Bere min bangku pengertin sue ras PadanNdu.

170Dengkehken min pertotonku, jenari kelini aku sue ras PadanNdu.

171Kupuji ateku Kam rasa lalap, erkiteken IajarkenNdu bangku undang-UndangNdu.

172Rende ateku kerna undang-UndangNdu, sabap bujur kap PerentahNdu.

173Kam min si lalap nampati aku, sabap kuikutken PerentahNdu.

174Metedeh kal ateku PenampatNdu, o TUHAN, undang-UndangNdu jadi keriahen man bangku.

175Bereken man bangku kegeluhen, maka banci Kam kupuji, AturenNdulah si nampati aku.

176Mampa-mampa aku bagi biri-biri si bene, tapi PerentahNdu la kupersilahang. Marilah, darami aku, sabap suruh-SuruhenNdu kap aku.


  Share Facebook  |  Share Twitter

 <<  Mazmur 119 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran