Dual PanelEnde-enden pujin
1Pujilah TUHAN! Pujilah gelar TUHAN, o kam suruh-SuruhenNa,
2si tedis i bas Rumah TUHAN, i bas kesain-kesain Rumah Dibatanta.
3Pujilah TUHAN, erkiteken mehuli kap Ia, pujilah GelarNa, sabap perkuah kap Ia.
4IpilihNa Jakup man BaNa, kalak Israel jadi SikerajangenNa.
5Kueteh maka mbelin kap TUHAN, belinen asang kerina dibata-dibata.
6IbahanNa kai AteNa si IbahanNa i langit ntah i doni, i lawit ntah i bas lawit si mbagesna.
7I bas tampuk doni nari IpenangkihNa embun, IbabaNa kilap i bas paksa udan, IperentahkenNa angin ndarat i bas GudangNa nari.
8I Mesir IbunuhNa kerina si pemenana tubuh, subuk anak-anak manusia ntah asuh-asuhen.
9I jah IlakokenNa melala tanda-tanda ras tanda kuasa, guna ngukum raja Mesir ras pegawaina.
10Melala bangsa-bangsa IkernepkenNa, janah nterem raja-raja si mbisa IbunuhNa.
11Sihon raja Amori, ras Og raja Basan, dingen kerina raja-raja Kanaan.
12Jenari IberekenNa negeri e, man Israel BangsaNa jadi sikerajangenna rasa lalap.
13O TUHAN, rasa lalap me Kam iberitaken selaku Dibata, dingen i bas tep-tep kesusuren, GelarNdu tetap iinget.
14IbelaNdu BangsaNdu, dingen mekuah AteNdu kempak suruh-SuruhenNdu.
15Dibata-dibata bangsa-bangsa ibahan i bas emas dingen pirak nari, eme bekas tan manusia erbahanca.
16Lit babahna, tapi la beluh ngerana, lit matana, tapi la erpengidah.
17Lit pinggelna, tapi la erpemegi, erkesah pe la ia banci.
18Kerina kalak si nggo erbahanca dingen tek man bana, jadi me ia bali ras gana-gana bekasna nggana.
19O kalak Israel pujilah TUHAN, o imam-imam Dibata pujilah TUHAN.
20O kalak Lewi, pujilah TUHAN, kerina kalak si malang man BaNa, pujilah TUHAN.
21Pujilah TUHAN, i Sion, i Jerusalem, si jadi inganna. Pujilah TUHAN!