Dual PanelIsrael ngandung-ngandung i taneh pembuangen
1Kundul kita i tepi lau Babil; iherta tangis nginget Sion.
2Ku batang dalu-dalu si ndeher i je, sisangketken kulcapinta.
3Kalak si naban kita nuruh kita rende, si niksa kita nuruh kita ngende-ngendei ia nina, "Endeken man kami ende-enden kerna Sion."
4Uga kita banci rende man TUHAN, i bas negeri kalak?
5Madin lanai pada ndigan pe aku beluh ngkuit kulcapi, adi aku lupa man bandu o Jerusalem!
6Ndigan pe lanai pada aku beluh rende, adi la kin kam kuinget, adi la kin Kam jadi keriahenku si mbelinna.
7O TUHAN, ingetlah perbahanen kalak Edom, tupung bangsa e naluken Jerusalem. Inget tupung ikatakenna nina, "Radasken saja rata ras taneh!"
8O Babil, la banci la ikernepken me kam, malem me ate kalak si erbalas man bandu, kerna kai si ibahanndu man kami.
9Malem me ate kalak si muat anak-anakndu, dingen si ndampeskenca ku lingling batu.